ගමේ ආච්චීට බොදුබල සේනා අගය තේරුණු හැටි... Grand Ma's Law

අද දින සෑමාගේ නිවස ආසන්නව බොදු බල සේනා මහා සම්මේලනයක් තිබුණේය. බොදු බල සේනාවේ ගුණ නොහොද වැයීම වැඩක් නැතිය. එක එකාට එක එක අදහස්ය. ඒවා අපිට වැඩක් නැත්තේය. ගම පුරා තිබු ස්පීකර් නිසා සෑමාටත් එහි කියූ කතන්දර, බණ, ඇසුනේය. ඒ අතර බුද්ධ චරිතය පිලිබද උකහා ගැනීම්ද කැටි වූයේය. ඒ නිසා රසවත් වූයේය. ඒත් අද දින ගමේ පිට්ටනියට ඇදුනු පිරිස් බහුතරයක් බණ අසන හෝ පිළපදින පිරිසක් නොවන බව සහතිකය. ඒවාද අපට වැඩක් නැත්තේය. පිබිදීමක් ඇති වී ඇත්තේය. ඒ පිබිදීමෙන් හෝ සමාජය හොද අතකට හැරෙනවා නම් හොදය. ඇමති මණ්ඩලයට මෙන්ම පාර්ලිමේන්තුවේ සිටින උන්ගේ පතුරු යැව්ව එක නම් මරුය. ඒත් අපි හැමදාම කළෙත් ඒකය. වැඩක් නම් වුණේ නැතිය. බොදු බල සේනාවට හෝ එම වැඩේ සාර්ථකව කරන්නට හැකි වේවා යැයි සෑමාගේ පැතුමය. එසේම බොදු බල සේනාව තවත් එක් හෙළ උරුමයක් නොවේවා යන්න සෑමාගේ පැතුමය. 

බො.බ.සේනා සම්මන්ත්‍රණය ගමේ පිට්ටනියේ පැවැත්වෙද්දී අපේ ගමේ ආච්චී කෙනෙක් සුදු වතින් සැරසී සෑමාගේ නිවසට පාත් වුණාය. ඇය සෑමා පොඩි කාලේ සිටි මෙහෙ එන ඇත්තියක්ය. ආවහම සෑමාගේ තාත්තාගෙන් ආච්චීට කතා කොට බේරෙන්නට බැරිය. ආච්චී කියන ඒවාට තාත්තා හරස් කතන්දර කියද්දී ආච්චී සුදු කෙස් පැලෙන තර්ක ඉදිරිපත් කරන්නීය. එවිට බලා සිටින්නවුන්ට පට්ට ආතල්ය.

“ගියෙ නැද්ද පිට්ටනිය පැත්තේ.. හාමුදුරුවරු මරු කතා කියන්නේ...“

“ගම පුරාම ස්පීකර් නේ.. අපි නම් ගෙදර ඉදන්ම අහගෙන ඉන්නේ..“

“එතැනටම ගිහින් බලන්න එපැයි සෙනග..“

“ඔව් ඔව් මේ පැත්තෙන් ගිය සෙනග අපි දැක්ක.. පාර අයිනෙ හිටියෙ අපි..“

“අපිත් පිට්ටනියටම ගියා..“

“එතකොට කලින් පැන්නේ?? අර තවම වැඩසටහන යනව නේ..“

“ඔව් අප්පා.. අව්ව සැරයි ඉන්න බැහැ.. ඉතිං ආවා.. මෙහෙම බල වේගයක් තියෙන එක හොදයි..“

“එතකොට ආණ්ඩුව? පොලිසිය? නීතිය? මොකද කරන්නේ?“

“ඒව තිබ්බට වැඩක් නැහැනේ දරුවො.. බො.බ.සේනාව කරන ටික නම් මරු..“

“ඉතිං මේව කිව්වම සෙනග හැදෙයිද?“

“කොච්චර බණ කිව්වත් හැදෙන්නෙ නැති රටක් නෙ මේක..“

“ඒක නම් ඇත්ත දරුවො..“

“එහෙනම් මේ සම්මන්ත්‍රණයෙන් වැඩක් නැද්ද?“

“අනේ මන්දා.. ආණ්ඩුවට හොදටම බැන්නා..“

“ඉතිං ආණ්ඩුවට මෙහෙ ඉදන් බැනල වැඩක් නැහැනේ.. කරන්න තියෙන්නේ අරලියගහ මන්දිරේට ගිහින් ජනාධිපතිතුමාව දැනුවත් කරන එක.. අනික ඉස්සර ඉදන් රජ වරුන්ටත් අවවාද දුන්නෙ හාමුදුරුවරු..“

“ඒකත් ඇත්ත නේ.. ඇයි ඉතිං මෙයාලා ගිරිය පුප්පගෙන මෙහෙ කෑගහන්නේ.. පාර්ලිමේන්තුවට හරි ගිහින් ඒකෙ මිනිස්සු දැනුවත් කළා නම් හොදයි නේ..“

“එතකොට ඇයි ආච්චි ගියෙ..“

“අනේ මන්ද පුතේ මාත් ගියා.. බලං ගියාම වැඩක් නැහැනේ මෙහෙම තැන් තැන් වල කෑ ගහලා.. “

“එතකොට ආච්චි මේ වැඩෙන් තේරුමක් නැද්ද??“

“ඒක තමයි.. මෙහෙම තැන් තැන් වල කියවලා හරි යන්නෙ නැහැ. රජයට අවවාද දෙන්න, ආශිර්වාද කරන්න හාමුදුරුවරු ඉන්නෝනි.. “

ආච්චී පටන් ගත්තේ වෙන තැනකින්ය. අවසන් කළේ වෙන තැනකින්ය. බලා සිටි අපිට පිස්සු වගේය. කරන්නට දෙයක් නැති තැන සෑමා උඩුමහලට රිංගා ගත්තේය. ආච්චී ගෙදර යන බව සෑමා දුටුවේ කාමරයේ ජනේලයකින්ය. 

“අනේ මන්ද.. බණ ඇහුවත් ඔය ටිකම තමා.. “

පලි -  සත්‍ය සිද්ධියක් ඇසුරෙන් ලියුවක් මිසක, කිසිම සංගමයකට සමාගමකට පහර දීමක් නොවේය. බො.බ. සේනාව පිළිබද සෑමාට ඇත්තේ මැදහත් සිතක්ය.

Written_by_sAm_ශ්‍රී_Perera_11:32pm_31.03.2013

මෙතැනින්... දෙපයින් නැගිටින්නට වෙර දරණ යශෝධාට ශක්තියක් වෙන්න...