Tuesday, May 27, 2014

කටේ නොතබා අතේ තබන්න.. - Keep It In Ur Hand !!


කෑමක්, බීමක් නීරස නම් අපි කෙලින්ම කියන්නේ අපෝ කටේවත් තියන්න බැහැ කියාය. ඒ දිවට දැනෙන රස අඩු නිසා මිසක පෝෂණය පිළිබඳ ගැටළුවක් නොවන්නේය. එහෙත් කටේවත් තියන්න බැරි අනන්ත දේවල් අපේ උන්/ අපේ එකියන් කටේ දමා ගන්නේ දිව කොහේ තියාගෙන දැයි නොදන්නේය. ඒ මනුෂ්‍යන්ගේ කට හෙවත් මුඛයය. සෑමා පොඩි කාලේ දිනක සිරස එෆ් එම් එකේ ගිය (මතක හැටියට දහසක් මල්) වැඩසටහනේ ඇසූ ප්‍රශ්නයක “යතුරු කටා“ ලොස නම් කළ හැකි සතා කවුරුදැයි ඇසුවේය. එය එක වරම දිය හැකි උත්තරයක් වුවත් එම නාලිකාවට කතා කොට පිළිතුරු කියන්නට ගිය අය විකාර කියවන්නට වූයෙන් වැඩසටහන ආතල් ගුලක් වූයේය. යතුරු කටා නම්, ඉබ්බා විය යුතුය. සෑමා මේ කියන්නට යන්නේ එහෙව් දොර ලොක් කරන ඉබ්බා ගේ යතුර කටේ නොතබා අතේ තබා ගත යුතුය යන පරමාර්ථයෙන්ය.

හදිස්සියට ගමනක් යද්දී දොර ලොක් කළේ දැයි මතක් වන්නේ කිලෝමීටර 10කට  වඩා ගිය පසුය. හොඳ සිහියෙන් යුතුව දොර ලොක් කර තිබුණද හදිසියේ කිසිවෙකු හෝ “ගෙදර දොරවල් ලොක් කරලද ආවේ??“ කියා ඇසූ තැන සිට සිතට ඇති වන්නේ කුතුහලයක්ය. සැකයක්ය. නිතරම මතක් වන්නේ යකෝ දොර ලොක් කළාද කියාය. ඒ තරමට අපට අපිව ෂුවර්ය. දොර ලොක් කර යතුර තබා යෑම පිළිබඳ පැරණිම රසාංගය ඉතා ප්‍රසිද්ධය. එනම් ගෙදර කවුරුත් නැති වෙලාවක ගමනක් යන්නට පිටත් වන්නේ නම් යතුර පෝච්චිය යට හෝ දොර අසල ඇති යම් රහස්‍ය යැයි සිතනා තැනක තැබීමය. පසු කාලෙක එම රසාංගය වෙනස් වී, යතුර කවුරුත් නොහිතනා තැනක තබා දොරේ බෝඩ් එකක් එල්ලීමය. යතුර අහවල් තැන තැබුවා යැයි දොරේ බෝඩ් එකක් ගසා යතුර සඟවා තැබීම කවුරුත් දන්නා විහිළුවක්ය.

දිනක් අපේ අයියා දොර ලොක් කර ගමනක් ගොස් තිබුණේය. ගේට් එක වසා තිබූ නිසා කිසිම අවුලක් නොවුනත් යතුර තිබුණේ දොරේ කටේය. තාත්තා වත්ත පැත්තට යද්දී දොරේ යතුර තිබෙනු දැක දොර ලොක් කොට යතුර රැගෙන විත් තිබුණේය. ඒ වේලාවේ හොරෙක් ආවා නම් ඌට පට්ට ආතල්ය. දොර කටේම යතුර තබා යෑමේ විපාකය ඉතා බරපතල්ය. ඒ සිද්ධිය මතක් වූ නිසාම මේ ලිපියට “කටේ නොතබා අතේ තබන්න“ යන මාතෘකාව එක්වූයේය. ඊටත් වඩා මේ ලිපිය ලියන්නට හේතුව නුවර යන්නට හදිස්සි එකෙකුට යතුරක් කපා දෙන්නට වූ කතාවක්ය.

සිද්ධිය වූයේ පසුගිය සතියේය. සෑමාට මුහුණ දෙන්නට වන්නේ මෙවැනි අධෝ වාත වැඩ වලටය. කොන්ඩේ හරි හැටි ජෙල් පාරක් වත් නොගා රැකියාවට ගියා සෑමා කිරිබත්ගොඩ හොස්පිටල් එකට ගොඩ වූයේය. වාහනය පාර්ක් කොට එළියට බැස්සේ යතුර අතේ තබාගෙනය. නැවත වාහනයට එබී බලන විට ඇතුලේ ජෙල් ඩප්පිය තිබූ නිසා නැවත ඇතුලට ගොස් කොන්ඩේ සකසා ගන්නට සෑමා සිතුවේය. බොන වතුර බෝතලයෙන් ජෙල් කලවම් කොට ගෑමෙන් නම්‍යශීලීව කැමති ආකාරයට කොණ්ඩය මනාව සකසා ගත හැකිය. ඒ නිසාම වතුර සමඟ කලවම් කොට සෑමා කොණ්ඩය සැකසුවේය. නැවත දොර ලොක් කර එළියට බැස යතුර සොයද්දී හිස ගෑ ජෙල් පපුව ගල් කරන්නට සමත් වූයේය. හුටා.. යතුර සීට් එක උඩය. කරන්නට දෙයක් සිතා ගත නොහැකිව වට පිට බලද්දී පාර්ක් එකේ නවතා තිබූ පල්සර් බයික් එකක් දුටු සෑමා ඌව සොයන්නට වූයේය. විටක පල්සරේ යතුර මේ හා සමාන බැවින් උපකාරයක් ගැනීමට එහෙන් මෙහෙන් දෙතුන් දෙනෙක්ට ටෝක් කළ විට ස්කූටියක ආ අයියා කෙනෙක් තමන්ගේ ගෙදර වැඩක් වගේ වැඩේට ඇන්ටර් වූයේය.

මල්ලී මෙතනින් කෝට්ටක් දාමු. යන්තම් ඇරුණු ෂටර් එක පෙන්වමින් අයියා කීවේය. කෝට්ටක් සොයාගෙන දුන් පසු, අඩේ මල්ලි කම්බි කෑල්ල තමා හරි යන්නේ. කම්බියක් හොයා ගමු. පොර බාස් වැඩේට අත ගසා අවසන්ය. බුවා හදන්නේ දොර ගලවා මස් කර අතට දෙන්නටය. ඒත් මීට සමාන යතුරක් සොයා ගත්තොත් වැඩේ ගොඩය. ඒ සමඟම වේගයෙන් ආ වෑන් එකක් එතැනම නැවැත්වූයේය. මැදිවියේ ඩයල් එකක් වෑන් එකෙන් බහිද්දී 

“අයියේ පොඩි උදව්වක් ඕනෙ.. කාර් එක ඇරගන්න යතුර දෙනවද??“ පොර මා දෙස හා වාහනේ අරින්නට දඟලන ඩයල් එක දෙස බලා.. 

“හරි මල්ලි.. ගන්න.. ඉක්මනට වැඩේ කර ගන්න අපි ඇතුලට ගියා ආවා.. නුවර යන ගමන් ආවේ.. හදිස්සියි..“ 

“හරි.. ඔයාලා ඇතුලට ගිහින් වැඩේ කරන් එන්න..“

ඩ්‍රැයිවර් ඩයල් එක ඇතුලට ගියද අනිත් එකා හෙල්ලුනේවත් නැත්තේ අපි වෑන් එක උස්සන්නට ට්‍රයි කරනවා යැයි සිතා විය යුතුය. 

“ඇයි මල්ලි වැඩි පුර යතුරක් නැද්ද??“

“තියෙනවා ඒක පර්ස් එකේ..“

“ඉතිං ඒකෙන් අරින්න බැරිද??“

“අරින්න පුලුවන්.. පර්ස් එකත් ඇතුලෙ නේ.. “

බුවා සද්ද නැත. දොර මස් කරන්නට වෙර දරන අයියා වෑන් යතුර මගෙන් උදුරාගෙන ගොස් තකහනියේ කැරකැවූයේය. 

“හුටා..“

“ඇයි ?????“

“යතුර කැඩුනා මල්ලි. කෑල්ලක් ඇතුලේ..“

ඒ සමඟම ඇතුලට ගිය ඩ්‍රැයිවර් තැන ආවේය. පොරගේ ඇස් දෙක නලලේය.

“අයියෝ මල්ලි ඔයාල මාර මිනිස්සුනේ.. දැන් මම කෝමද නුවර යන්නේ..“ එතැන කඳුලු ගංගාවක්ය. යතුර කැඩුනාට වඩා ඉවසා ගත නොහැක්කේ පොරගේ කෙදිරිල්ලය. ඒ සමඟම එතැනට ආ තවත් ඩෑල් එකක් වන් ෂොට් ලොක් එක ඇරියේය. ඒකත් බයික් එකක යතුරක්ය. කාර් වලට වඩා බයික් යතුරක් අතේ තබා ගත්තා නම් හොඳ යැයි සිතුනේ එවිටය.

ඒ සැනින්ම වටේ සිටි සැට් එකට උත්මාචාර දක්වා වෑන් යතුරක් කපන්නට යන්නට වූයේය. පැය කාලෙන් යතුර කපාගෙන ආපු නිසා වෑන් ඩ්‍රැයිවර් අයියාට සතුටුය. අපේ එකෙක් නම් කිව්වේ මොන යතුරු කපනවද යකෝ, දොර ඇර ගත්ත නම් තොට එතැනින් මාරු වෙන්න නේ තිබ්බෙ කියාය. එහෙම කළා නම් සෑමාට සාප කරමින් ඩෑල් එක තාමත් එතැනය.

මින් සැමා කියා දෙන පාඩම නම්, කටේ තබා යනවාට වඩා අතේ තබා ගැනීම හොඳ බවය. එසේම වැඩිපුර එකක් ඇත්නම් එයද අතේ තබා ගත යුතුය. කටේ තබා යෑමෙන් මාර ආතල්ය. එහෙත් අතේ තබාගෙන සිටීම කරදර අවම කරන්නේය.

Written_bY_sAm_ශ්‍රී_Perera_7:38am_27/05/14

Friday, May 23, 2014

බව්වා සමඟ හයර් යෑම.. - Journey with a Dog !!


සුපිරි වාහන වල වීදුරු අස්සෙන් හොම්බ එළියට දාගෙන යන සැපවත් බල්ලෝ බැල්ලියෝ අප අනන්ත දැක ඇත්තෙමු. උන් නිදන්නේ සුවපහසු ඇඳ ඇතිරිලි උඩය. උපතින්ම වංශක්කාරය. එහෙත් ගෙදර මහ එකා මැරුණු දාට, ඌට සැලකිල්ල අඩුවන දාට වංශක්කාර බල්ලා පැත්ත පලාතක නැත්තේය. ඇත්තේ මවා පෑමක් පමණක්ය. මහපාරේ සිටින අනාථ වූ වල් බල්ලෙකු නිවසට ගෙනැවිත් හදා වඩාගෙන පිරිසිදුවට ඇති කරමින් තබා ගත හොත් තමන් මළ දාට මිනී පෙට්ටිය යට ලඟින්නට හෝ එකෙක් ඉතිරි වන්නේය. ඉන් කියවෙන්නේ වල් එවුන් හොඳයි කියා නොවේය. මහ පොලොවේ පය ගසා ඉන්නා උන් කවදා හරි ඉතිරි වෙන බවක්ය.

සෑමා බලු කතා අනන්ත ලියා ඇත්තේය. පොලිස් කතාද එමටය. ඒ නිසා බව්වෝ හෝ පොලිස් කතා ලියනා විටක රසිකයන් වැඩිය ගණන් නොගන්නෝය. එහෙත් මේ කතාව ලිවිය යුතුමය. මන්ද ගුණවත් බල්ලෙකු අගය කිරීමට කල් නොමැරිය යුතුය. ඔබ කුලී රථයක නැගී ගමනක් යන්නට පිටත් වන්නේ නම් ඔබ රථයට නගිනා විටක කොහේවත් සිටින බල්ලෙකු ඇවිත් ඔබ සමඟම ඒ රථයට නගිනා විට ඔබට ඉවසිය හැක්කේද? එහෙත් මේ සිද්ධියේදී ඔබ ඉවසනවා නිසැකය. මන්ද ඌ ගුණවත් නිසාය. ඌ රථයේ ගමන් ගන්නා ඔබට කරදරයක් හිරිහැරයක් වන ලෙසට නොහැසිරෙන නිසාය. ඌ ඔබට හා රථ හිමියාට ආරක්ෂාව සලසන නිසාය. කියවාගෙන යන විට මඤ්ඤං විය හැකිය. එහෙත් මෙකී බව්වා ත්‍රී රෝද රථ හිමිකරුවෙකුගේ පෙර ජාති බැඳීමක් විය හැකිය.

කිටියා දිනක් රාජකාරී අවසන් වී පැලවත්තේ සිට නිවසට ආවාය. ඒ ත්‍රී රෝද රථයක නැඟීගෙනය. නිවස අද්දර නතර කළ තුන් රියේ රියදුරු අසුනට යටින් දිව දොට්ට දමාගෙන එළිය බලාගෙන සිටියේ බල්ලෙක්ය. ඒ බල්ලා හා සබැඳි දිගු කතාව අසා ගන්නට අංකල් සමඟ කතා කරන්නට හෝ බව්වාගේ ෆොටෝ එකක්වත් ලබා ගන්නට සෑමාට නොහැකි වූයේය. නමුත් පැලවත්තේදී රථයට ගොඩවන අවස්ථාවේ ඒ තුල සිටියේ ඩ්‍රැයිවර් අංකල් බවත්, අංකල් රථය පණගන්වා හෝන් එක නාද කළ පසු කොහේ හෝ සිට දිව ආ බලු කුක්කා එහි නැගී සීට් එක යට සිට හොම්බ දොට්ට දමා ගත් බවත් කිටියා කීවාය. අංකල් ජයවර්ධනපුර පැත්තේ ඉඩම් හිමියෙකු බවත් තම දරුවන් දීග දී, තමන්ගේ වගා කටයුතු බලාගෙන නිදහසේ හයර් එකක් දුවාගෙන ජීවත් වෙන පුද්ගලයෙකු බවත් කිටියා කතා බහේදී සොයා ගෙන ඇත්තේය. ඒ අතරම බව්වා ගැන අංකල් පවසා ඇත්තේ, අංකල් හැමදාම ෆ්‍රයිඩ් රයිස් එකක් මිලට ගෙන ත්‍රීවීල් පාර්ක් එක අසල සිටින බල්ලන්ට කෑමට දෙන බවක්ය. ඉන් වඩාත් සතුටට පත් බලු කුක්කා අංකල් වෙනුවෙන් සිකියුරිටි ජොබ් එකට බැස ඇත්තේය. අංකල් කොහේ ගියත් බව්වා අංකල් සමඟ ගමන් කරන්නේය. ඒ අතර ට්‍රැෆික් වලදී තමන්ට අවශ්‍ය කටයුතු කර ගැනීමට බව්වා රථයෙන් බැස ගොස් නැවත නියමිත වේලාවට රථයට ගොඩවන්නේය. චූ පාරක් දමන්නට රථයෙන් බැස්සත් මාර්ග තදබදයේ තිබෙන වාහන වලට කකුල නොඋස්සා තාප්ප කැබලි වලට වග කියන්නට බව්වා බුද්ධිමත්ය.

බව්වා සමඟ හයර් යන අංකල් ගැන දැන ගන්නට වූයේ ඒ කතාන්දර ටික පමණක්ය. අනෙක් කාරණය නම් ෆොටෝ එකක් ගන්නට බැරි වීමය. එදා අංකල් සමඟ කතා කළා නම් ෆොටෝ ගත්තා නම් මේ ලිපිය මේ වනවිට ලියා හමාරය.

නැවත සෑමාට අවස්ථාවක් එළැඹුනේ කිටියා මෑත දිනයකදී පැලවත්ත පැත්තෙන් ගෙදර ආ නිසාය.

“මම මේ පැත්තෙන් වීල් එකක එනවා.. අර අංකල් හිටියොත් ඒකෙම එන්නම්..“

ඒ වදන් කිහිපය ඇසුනු සැනින් සෑමා සතුටට පත් වූයේය. කියූ පරිදිම අංකල් පාර්ක් එකේ සිටි නිසා ඇය එහි නැගී ගෙදර ආවාය. කලින් වූ අතපසු වීම් නැවත නොවන්නට සෑමා සූදානමින් සිටියේය. අංකල් හමුවී කතා බහ කොට බව්වාගේ ඡායාරූපයක්ද ගන්නට සෑමාට හැකි වූයේය. ඉන්පසු අංකල් වෙනුවෙන් බව්වා සිකියුරිටි ජොබ් එකද කරනා බව කියැවෙන කතාවක් අංකල් කීවේය.

දිනක් බීමත්ව ආ ඩයල් එකක් අංකල්ගේ රථය නවත්වා ඇත්තේය. ඔහු මෝටර් බයික් එකත් නවතාගෙන කියා ඇත්තේ තමන්ට හොඳටම සූර් නිසා බයික් එකත් වීල් එකේම දමාගෙන තමන්ව නිවසට දමන ලෙසය. බයික් එකක් පටවාගෙන්, වෙරි කාරයෙක් බයික් එකේ දමාගෙන යාම කිසිම ත්‍රී රෝද රථ රියදුරෙකු කරනා වැඩක් නොවේය. අනික මහ රැයක එවන් දෙයක් කිරීම අනාරක්ෂිතය. අංකල් වැඩේ ප්‍රතික්ෂේප කරද්දී ඩයල් එක අංකල්ගේ කොලර් එකෙන් අල්ලාගෙන සත්තමක් දමා ඇත්තේය. එහිදී වහා ක්‍රියාත්ම වූ බව්වා ඩෝප් පුද්ගලයාගේ ඇඟට පැන සපා කා ඇත්තේය. නොනැවතී බව්වා සමඟ පොර බඳින අතර ඔහු අංකල්ට ආයාචනා කර ඇත්තේ තමාව ඉන් මුදවා ගන්නා ලෙසයි. අංකල් බව්වා තමන් ලඟට ගෙන පිටත් වෙන්නට රථය පණ ගන්වා ඇත්තේය. ඩෝප් ඩයල් එක පාර එහා පැත්තට ගොස් බයික් එක මත හිදගෙන නැවත අංකල්ට ගල් ප්‍රහාරයක් එල්ල කරද්දී බව්වා නැවත ක්‍රියාත්මක වී බීමත් පුද්ගලයාගේ ඇඟට පැන ඇත්තේය.


එලෙස තමන්ට ආරක්ෂාව දෙන ආදර බව්වා ගැන අංකල් කරුණු කාරණා කීවේ සිනා මුසු මුහුණින්ය. සතෙකු හෝ මිනිසෙකු හෝ, තමන්ගේ හොඳම මිතුරෙකු බවට පත්ව තමන්ගේ කටයුතු සොයා බලන්නේ නම් එයින් තමන්ට ලැබෙන සතුට අපමණ බව අංකල්ගේ වචන අතර සැඟවී තිබුණේය.

“අංකල්.. මම ගන්නද බව්වගේ ෆොටෝ එකක්..“

“හා.. ගන්න.. ගන්න..“



පලි - මෙය බ්ලොග් එකක පළවෙන බවක් අංකල් නොදන්නේය. දැක්කොත් බව්වාව සිපගනීවි.

Written_by_sAm_ශ්‍රී_Perera_8:12am_23/05/14

Tuesday, May 20, 2014

මිතුරන් පෙඟවීම... - Soaking Others !!


කොල්ලන්ට බොන්නට පුරුදු කිරීම හොඳ නැති වැඩක්ය. දෙපයින් සිටගෙන සිටියදීම අපාගත වෙන වැඩක්ය. මන්ද ඇල්කොහොල් වලින් සරීරයට කරන හානිය වැඩිය. ඊටත් වඩා ඇල්කොහොල් වලින් විකෘති වූ මනසින් සිදු කරණා කටයුතු ඉතාම හානිකර නිසාය. බොහෝ විට සමාජයට හානියක්ම වන්නේය. ඒ නිසා බොන උන් තමන් පාඩුවේ බොන එක හැරෙන්නට නොබොන එකාට පොවන්නට තැත් කරන්නේ නම් ඉතා වැරදිය. බොන සමහරුන් ගේ අසාව තරමට බොන එකාට පදම වැඩි කොට වැට්ට වීම හෝ, නොබොන එකාව බීමට ඇඳ ගැනීමය. ඒ අතරින් නොබොන එකාට බොන්නට වද කිරීම මා දැක ඇති අප්‍රසන්නම සිද්ධියක්ය. එසේ වද කිරීම විටක සාධාරණ වන්නේ නොබොන එකෙක් බොන තැනකට ප්ලග් වී බයිට් ටික විනාස කරනා විටකදීය. එවන් තැනකදී ඔහුට/ඇයට බයිට් කන්නට එපා යැයි තර්ජන කරනවාට වඩා එහෙව් බයිට් මරුවන් බොන තැනට වද්දා ගැනීම නොකළ යුතුය.



දිනක් අප සැට් වී සිටි තැනක බයිට් මරුවන් දෙදෙනෙකු සිටි නිසා අපි කළේ ලඟම තිබු බණ ගෙදරින් බත් පිඟන් දෙකක් බෙදාගෙන විත් උන් දෙන්නාට පරිත්‍යාග කිරීමය. එවිට වැඩේ ශේප්ය. එදා අපි සැට් වූ තැන බණ ගෙදරක් තිබුණේ නැති බවත්, අප සැට් වී සිටියේ බණ ගෙදරම පිලිකන්නේ බවත් සිහි වූයේ පහුවදාය. එසේම දිනක් බයිට් එකට කොත්තු තුනක් ගන්නට ගොස් අපිට මහා වාසියක් වූයේය. බොන අතරතුර බයිට් අහවර වීම දරා ගත නොහැකි අපරාධයක්ය. මහ පොළොව නුහුලන්නේමය. ඒ අතර මැදදී කොත්තු තුනක් ගන්නට කඩේ ගොස් අපේ එකෙක් කඩෙන් එළියට දුවගෙන ආවේ “දුවලා යමල්ලා“ කියාගෙනය. ඌ කිව්වේ කොත්තු තුනකට සල්ලි දුන් තැන බෑග් එකේ කොත්තු හතරක් දමා ඇති බවක්ය. එය මහා වාසියක් ලෙස සිතීම සහ වහා දුවගෙන ගෙදර ඒම සාධාරණය. අපේ රටේ ආර්ථික පසුබිම හමුවේ එය හිඟන්නාගේ පාත්තරයට ලම්ප් රයිස් එකක් වැටුණා හා සමානය. එසේ දුවගෙන විත් බෝතල් අඩිය බලා පහුවදා උදේ මේසය මත තිබූ බිලේ සටහන් වූයේ කොත්තු හතරකට බිල් කර ඇති බවක්ය. කාපුවා බීපුවා සියල්ල ආතල් නැතුව ගියේ අනේ අපරාදේ දුවගෙ ගෙදර ආවේ කියා සිතමින්ය.

ලියන්නට ගියේ බොන්න පුරුදු කරන එක ගැනය. ඉහත ඒවා අතුරු කතාය. මෑත භාගයේ මා මිතුරෙකුගේ වෙඩින් මඟුල් ගෙදරකදී අපේ ටේබල් එකට සැට් වූයේ පැරණි මිතුරන් රැසක්ය. ඒ අතර කාන්තා පිරිමි භේදයක් නැතුව අසුන් ගෙන සිටියෝය. මා එහා පැත්තේ සිටියේ කාන්තාවක්ය. ඇය හොඳ මිතුරියක්ය. වෙඩින් මඟුල් ගෙදර දුන්නේ ෂොට් නිසා බෝතලයක් මේසය මැත තබා ආතල් බොඩිය බැලීම හෙවත් බෝතල් අඩිය වෙනතුරු හිස් කිරීමේ සතුට ලබන්නට නොහැකි වූයේය. නමුත් ට්‍රේ එක මතින් රැගෙන එන ෂොට් ගණන ටේබල් එක වටේ සිටින පිරිමි හිස් ගණනට වඩා එකක් වැඩි වූයේ ෂොට් එකට තිබූ එක් කාන්තා දායකත්වයක් නිසාය. පිරිමි ක්‍රීඩකයන් මෙන්ම කාන්තා ක්‍රීඩකයන්ද පිටියේ එක ලෙස දස්කම් දක්වන බවක් සෑමා දන්නේය. පිරිමි ක්‍රීඩකයන්ට වඩා කාන්තාවන්ට දරා ගැනීමේ මෙව්වා එක වැඩි නිසාම වැඩේ නැගලා යන බවක් පෙනෙන්නට තිබුණේය. අවසන ෂොට් අහවර වී ටේබල් එක මතට වැඩම කරවූයේ බීර බෝතලයක්ය. එය ගත කළ කලවම්ව සූර් වන බව ෂුවර්ය. එහෙත් කාන්තාවන්ට සම තැන් දිය යුතු නිසා සෑමා ග්ලාස් එකට පෙන නොඑන්නට වත් කළ බීර අඩිය කාන්තා ක්‍රීඩිකාවක් අසලින් තැබුවේය.

“එපා.. මම ගන්නෙ හාඩ් ලිකර් විතරයි..“

ඇත්තෙන්ම දක්ෂය. ලෙදර් බෝල ගසනා උන්ට සොෆ්ට් බෝල් ගසන්නට ඉඩ දීම මහා අපරාධයක්ය. කවදාවත් නොබොන උන්ට බොන්නට ග්ලාස් ලං කොට නැති සෑමා එදා ඉගෙන ගත්තේ අගනා පාඩමක්ය. හාඩ් ලිකර් බොන හැම එකාම බියර් නොබොනා බව ඉගෙන ගත යුතුය. එවන් අයට බලහත්කාරයෙන් පෙවීම නොකළ යුතුය. සැර බීම බොන හැම එකාම බියර් බොනවා යැයි සිතන පහත් මානසිකත්වය බැහැර කළ යුතුය. එසේම බීර වත් නොබොනා උන් පහත් නොකොට උන්ව පැසසිය යුත්තේ බොන යහළුවෝ රැසක් මැඳ නොබොනා එකම එකා බවට පෙන්වා දෙමින්ය.

දිනක් අපේ මිත්‍රයෙක්ට පිරිසක් බලෙන් පොවා ඇත්තේය. එය සම්පූර්ණව බලෙන් පෙවීමක් නොව මිතුරාගේ කැමැත්තෙන් සහ අකැමැත්තෙන් රස බැලීමට දුන් පළමු ෂොට් එකක්ය. එක දෙක වූයේ රස උතුරා යන තරම් තිබූ නිසාය. බොන්නට දී ඇත්තේ බියර්ය. මිතුරා සාදය අවසන ගෙදර යා යුතුය. වැඩි කතා බහක් නැති අයෙකු බොන්නට ගත්තාම කතන්දර වැඩි විය යුතුය. කියවීම අප්‍රමාණ විය යුතුය. අප දැක ඇති බේබදු සාහිත්‍යය එයය. එහෙත් වැඩි කතා නැති අපේ මිතුරා බීමතින් සිටියදීද නෝ කතාය. බලා ගත්තු අත බලාගෙන සිටින්නේය. එය මහත් ගැටළුවක් වූයේ අපේ අනෙක් සැට් එකටය. යකෝ මූට මක් වෙලාද? කියමින් බිරන් තට්ටු වී සිටිය සැට් එකම දැන් කරන්නේ කුමක්දැයි සිතනවා වෙනුවට මිත්‍රයා කතා කරන මට්ටමට එන තුරු මධ්‍යසාර සරීර ගත කළෝය. වැඩේ ගොඩ යන පාටක් නැත්තේය. මිතුරා බොන ෂොට් එකක් පාසාම තම වචන අමතක වී නිරුත්තර වූයේය. කතා කරනා දේ නෑසෙනාක් මෙන් ඇසි පිය නොහෙලා බලා ගත් අතම බලා සිටියේය. දැන් කරන්නේ කුමක්දැයි සූර් වූ අනෙක් මිතුරන් අසද්දී මිතුරා සිනාවක් වත් මුව අගින් නොතබා ඔහේ සිටියේය. නම කියා කතා කරන විට පවා පැත්ත වත් නොබැලුවේය. 

සියල්ල අවසන මංගල බීම බිවු අපේ මිත්‍රයා රැගෙන යාමට ගෙදරින් අවේ තාත්තා සහ අයියාය. දෙදෙනාම කිසිදා නොබොන තම සහෝදරයා, පුතා රැගෙන යාමට පැමිණ මිතුරන් සමඟද කතා කොට කාර් එකට නැඟුනෝය. එහෙත් කොල්ලා තවමත් එළියේය. කාර් එකට නගින්නේ නැතිය. පසුව මිතුරන් බලහත්කාරයෙන් මෙන් කාර් එකට නැග්ගූවේ ගෙදර උදවියට නොදැනෙන පරිදිය. තාත්තා සහ අයියා කාර් එකේ ඉදිරි අසුන් ගෙන ඉදිරිය බලා සිටි නිසා වැඩේ ලේසි වූයේය. මිතුරා කාර් එකට නැඟුනේය. ඒ සමඟම යතුර කැරකැවී කාර් එක ස්ටාර්ට් වෙද්දී එහා පැත්තේ දොර නැවත ඇරුණේය. ඒ අප  මිත්‍රයා නැග්ග පැත්තේ නොව එහා පැත්තේ දොරය. කෙල්ලා ඒ සැනින් එලියට බැස “බ්‍රාාාාස්“ හඬ නංවමින් සරීර ගත වූ සියළු මධ්‍යසාර තාර පාර මත පතිත කළේය.

“මොකද මේ??“

“කෑම අප්සට් වගේ කිය කිය  හිටියා අංකල්.. මූට අප්පිරයාව වෙන්න ඇති..“

කියූ මිතුරන් තාවකාලිකව කොල්ලාව ගොඩ දැම්මේය. පසුවට සිදු වූ සියල්ල දන්නේ මිත්‍රයා පමණක්ය. එසේම අද තාමත් මිත්‍රයා නොබොන කොල්ලෙක්ය. ඒ ගැන අපට ආඩම්බරය.

Written_bY_sAm_ශ්‍රී_Perera_7:17am_20/05/14

වැඳගත් - බ්ලොග් රෝල අක්‍රිය වී තිබු නිසා එය ඉවත් කර නැවත එල්ලීමට ගියෙමි. එතැන් පටන් බ්ලොග් රෝල layout එකට දමා ගැනීමට නොහැකිව කල් මරමි. තවමත් එසේමය. “සාර්ථකව ඇඩ් වුණ“ බව කීවද එය එසේ ඇඩ් නොවේ. උපකාර අවශ්‍යය. (tosamindika@gmail.com)
ඉහත කරදරය නිසා බ්ලොග් කියවීමට නොහැකි වන්නේය. :(

Friday, May 16, 2014

අද නම් ඇරලා.. - Its Open Today !!




ඉවසුවා..
පෙරේදා...
වගෙම ඊයෙත්..



සෙට්වෙලා..
හිටියා..
වෙසක් බලන්නට හිතන්..



නැවැත්තුවා..
ලොරිය..
ටික දුරක් ගිහින්...



ඇරලා..
බාර් එක..
වෙනදා වගෙම අදත්..



නිමිත්ත - වෙසක් බලන්නට යන ලොරි බාර් එක ලඟ නවත්වනු දුටිම් !

Written_by_sAm_ශ්‍රී_perera_16/05/14

Friday, May 2, 2014

16+ වනසමුද? Shall we Destroy 16+ ???





මා රූපවාහිනී නරඹන්නේදැයි යමෙක් ඇසූවිට පිළිතුර “නෑ“ යන්නයි. මන්ද මා හට රූපවාහිනීයේ බලන්නට දෙයක් නොමැති නිසාය. ප්‍රවෘත්ති බැලීමට පමණක් මා රූපවාහනීයට ප්‍රමුඛ තැන දෙන්නේ එය හුදෙක් ටෙනිසන්, බන්දු රඟන ටෙලිනාට්‍යයකට, චිත්‍රපටයකට වඩා ආතල් නිසාය. එහෙත් රූපවාහිනීයේ ආතල්ම යුගයක් තිබුණු බව කිව යුතුය. ඒ කාලේ සවස් ජාමයේ බැලූ දොස්තර හොද හිත, ගලිවර්, පන්පසිඳුවන්, මායා බන්ධන, ටිං ටිං, වැනි කතාන්දර හැරුණු විට අපව ජීවත් කරවූ නැවත බලන්නට ඊලඟ දවස උදාවෙන තුරු ඇඟිලි ගණිමින් සිටි වැඩ සටහන් කිහිපයක් ඒ දවල් වල තිබුණේය. මෑත යුගයේ අපව ජීවත් කරවූයේ සිරස නාලිකාවෙන් හඬ කවමින් ඉදිරිපත් කළ සූරපප්පා, කව්ද බෝයි, ගාර්ෆීල්ඩ්, සහ තවත් මඟ හැරුණු කතා කිහිපයක්ය. ටයිටස් මාමා වියෝවූ පසුව රූපවාහිනීයේ ලමා කතා යුගයේ නැවතීමක් සනිටුහන් වෙද්දී සිරස නැවත එයට ජීවය දුන්නේය.

ඒ ලමා කාටූන් කතන්දර හැරුණු විට අපට රූපවාහිනීයේ බලන්නට දෙයක් නැති තරම්ය. මෙගා නාටක රැල්ල ආ දා සිටන් එයට ගොදුරු වූ බහුතරයක් දැනට සුවය ලබමින් සිටින අවධියක තැනින් තැන පෙනෙන නාටක කිහිපයකට ප්‍රේක්ෂකයන් ගොදුරුව ඇත්තේය. ඒ අතර දිවෙන වාර්ථා වැඩසටහන් කිහිපයක් වන වෙනස, අටපට්ටම වැනි ඒවා රූපවාහිනී ප්‍රෙක්ෂකයාට තම රූපවාහිනීය නිවසේ පොලවේ නොගසා තබා ගැනීමට හේතුවක් සදා දී ඇත්තේය. ඒවාත් නැති නම් රූපවාහිනී පොලොවේ ගසා හමාරය. එලෙස බලන්නට දෙයක් නැතිම තැන අප කරන්නේ රූපවාහිනීය වසා දැමීම මිස වෙළඳ දැන්වීම් බැලීමෙ නොවේය. එහෙත් බත් පිඟාන අතට ගත් තැන සිට රූපවාහිනීයේ කුමක් ගියත් ඒ දෙස බලමින් බත් පත අහවර කරන ඇත්තෝද වන්නේය. එහි එතරම් ගැටළුවක් නැත්තේ බත් පත කෙසේ හෝ අවසන් කරන එකම ක්‍රමය ලෙස රූපවාහිනීය යොදා ගන්නා නිසාය.

“ඔබ අකැමැතිම රූපවාහිනී වැඩසටහන කුමක්ද ?“

කියා සෑමාගෙන් කිසිවෙකු තවමත් අසා නැතිය. නමුත් එය 16+ නොවන බව කිව යුතුය. මන්ද මා එයට අකැමැති වන්නට එය බලා නැතිය. පිරියක් නැති නිසා බලන්නේද නැතිය. එහෙත් 16+ සිරසින් ඉවත් කළ යුතු බවට මහා රැල්ලක් ගොඩ නැගෙමින් තිබෙන නිසාම වැඩසටහන කෙසේදැයි සොයා බලන්නට සෑමාට සිදුවූයේය. එසේ නම් 16+ වැඩසටහනට විරුද්ධ පිරිස සිදුකර ඇත්තේ එම වැඩසටහන ප්‍ර මෝට් කිරිල්ලක්ය. එය බලන තත්වයට ජනතාව පත්කිරිල්ලක්ය. කෙසේ හෝ සෑමා වැඩසටහන බැලුවේය. එහි සිටින පොඩි කොලුවා උගේ ආතල් එක ගන්නේය. කට හැඩ කරමින් වචන කමින් ජනතාව සතුටු කරන්නට වෙර දරන්නේය. ඒ අතර අතුලගේ (??) කෙල්ල හැඩ කරමින් කඩු හපමින් ජනතාව තුටු කරන්නීය. දෙදෙනාම අසාර්ථක නිසා ඔවුන් ද්වේශයෙන් තොරව අතහැරීම හැර කුමක් කරන්නද? උන් ගන්නේ උන්ගේ ආතල් එකය. තමන් වැඩසටහන හොඳටම කරනවා යැයි මහ උජාරුවෙන් සිටිනා උන්ගේ සිත දවාලිය නොහැක. අනෙක උන්ටම වෙන්වූ පහත් රසිකත්වයක් ඇති උන් ඒ වටා රොක් වී ඇත්තේය. උන්ට උන්ගේ ආතල් ගන්නට දී අපි නම් කුමට රඟමුද?

ඇත්තටම 16+ වැඩසටහනට එදිරිව ක්‍රියා මාර්ග ගන්නට පොර බඳිනා වෙලාවේ අපට කරන්නට වෙන වැඩ ඇත්තේම නැද්ද? මා මෙලෙස පෙරලියක් කරන්නට කැමැත්තේ මෙවන් ආතල් දෙන වැඩසටහන් වලට නොව නයි.ටී.ඇන් නාලිකාවේ යන “විමසුම“ වැනි වැඩසටහන් වලටය. කරේ තියාගෙන බොරු කෙලිනා, හැමදාම එකම තැටිය සහ එකම ජවනිකා ටික කරකවමින් ණයට කහිනා උන්ට එදිරිව පෙරලි කරනවා මිසක ලමා ආතල් වලට තෙල බෙදන්නට මෙතරම් පිරිස් කැප වෙන්නේ මන්දැයි මට වැටහීමක් නැතිය. දේශපාලනය නිසා ඒවාට ද්වේශ කරමින් “විමසුමට“ කෙලින්නට අදහසක් ආවා නොව, 16+ එකට වඩා විමසුම සිඟිතිම ආතල් එකක් බැවින් එවැනි අදහසක් පහල වූයේය.

16+ වැඩසටහනට විරුද්ධ වන්නට සාධාරණ හේතු මොනවාදැයි මා කිහිප දෙනෙකුගෙන් විමසුවෙමි. ඒ අනුව බහුතරයක් කියා සිටියේ උන් ඒ වැඩසටහන කරන කාල වේලාව ලමා කාටුන් වලට ලබා දිය යුතු බවය. එසේ තමන්ට අවශ්‍ය වේලාවට ලමා කාටුන් බැලීමට නම් නාලිකාව තමන්ගේ විය යුතුය. මන්ද ප්‍රේක්ෂකයාට කැමති ආකාරයට ටයිම් ලයින් වෙනස් කර දුන් රූපවාහනී නාලිකා ඉතිහාසයක් සෑමා නොදන්නා නිසාය. එම වේලාවට කාටුන් බලන්නම අවශ්‍යය නම් වෙනත් නාලිකාවක් දමාගෙන කාටුන් බලන්නට උත්සාහ නොදරන්නේ ඇයි දැයි ඇසූ තැන එයට පිළිතුරු දුන් පිරිස් කීවේ “සූර පප්පා“ වැනි කාටුන් යන්නේ සිරසේම පමණක් නිසා අනිත් නාලිකා වැඩක් නැති බවක්ය. පවුලේ නාලිකාව, යැයි කියනා එකවත් පවුලේ අය කැමති වැඩසටහන, පවුලේ අය කැමති වේලාවට විකාශය කරන්නට තැත් කර තිබෙන්නේද? එවන් ඉල්ලීම් ඉටු කර දෙන්නේද? මා දන්නා ඉතිහාසය තුල නම් අපට කැමති වැඩසටහන නැවත විකාශය කර ගැනීම එතරම් පහසු නොවන්නේය. එයට හොඳම උදාහරණය බොහෝ කළකට ඉහතදී විකාශය වූ ආනන්ද වික්‍රමගේ මහතා ඩබල් ඇක්ටින් කළ “පටලැවිල්ල“ නාට්‍යය. එය නැවත බැලීමට කැමැත්ත ආ බොහෝ දෙනා නැවත විකාශයක් ඉල්ලා සිටියද නොලැබුණු බව සැබෑය.

16+ වැඩසටහනට එදිරිව පෙත්සමක් අත්සන් කරන්නට මට ලින්ක් එක ලැබුණු මොහොතේ සිට මා කල්පනා කළේ එයට විරුද්ධ වීමට සාධාරණ හේතුවක්ය. වැඩසහන බැලීමෙන් මට දැනුනේ උන් දෙන්නා අවුල් සහගත බව පමණක්ය. එසේම සාධාරණ හේතු මත ඒ වේලාව ලමයින්ට කාටුන් බැලීමට වෙන් වන්නේ නම් අගනා බවද හැඟුනේය. අපේ ගෙවල් පැත්තේ ඇන්ටී කෙනෙක් තම දරුවා හවස් ජාමයේ ක්ලාස් යැව්වේ කාටුන් බැලීම වැලැක්වීමට බව ඇය ප්‍රසිද්ධියේම කියා සිටි අවස්ථාව මට මතකයට නැගෙන්නේය. ඇගේ බුද්ධි මට්ටම අනුව කාටුන් ලමා සිත් දූෂණය කරන්නක්ය. එය ඉතා ලොල් සහගත අදහසක්ය. එහෙත් වැඩසටහනකට එදිරිව පෙළ ගැසී තේරුමක්, වැඩක් තිබේදැයි සිතා බැලිය යුතුය. එසේ වැඩක් තිබේ නම්, සුගතියක් තිබේ නම් විරුද්ධ විය යුතු එකම වැඩසටහන මෙය නොවන්නේය. එසේ නම් මීටත් පෙර අප පෙළ ගැසිය යුත්තේ ගුවන් විදුලි නාලිකාවල සමහරක් නිවේදක නිවේදිකාවන්ට එදිරිවය.

16+ වැඩසටහනට එදිරිව මා තවමත් අත්සන් තබා නොමැත්තේ එය සිදුකිරීමට තරම් වැඳගත් හේතු සාධක මා නොදුටු නිසාවෙන්ය. එහෙත් එය විකාශය වීම නවතාලමින් කාටුන් විකාශය කර ගන්නට හැකි වේ නම්, එලෙසම විකාශයෙන් තොර කිරීමට අවශ්‍ය අනෙකුත් වැඩසටහන් වලට (මීටත් වඩා මෙලෝ රසක් නැති ඒවා ඇති නිසා) විරුද්ධව නැගී සිටින්නේ නම්. ඒවාට සාධාරණ හේතු සාධක ඇත්තේ නම් ඒවාට විරුද්ධ වීමට හැකියාව ඇත්තේය. සියල්ල සිදුවන්නේ කවුරුත් කියනවාට නොව, ප්‍රායෝගිකව සිතා බලා වැඩකට ඇත්තේ නම් පමණක්ය.

පලි - බොහෝ අය වැඩසටහන ඉදිරිපත් කරනා දෙදෙනාට චෝදනා කරනවා මිසක (ඇත්තෙන්ම මාත් අකැමැතිය.) වැඩසටහනේ වරදක් නොදකින්නෝය. (වැඩසටහනේ වරදක් මා දැක නැත්තේය. එය හුදෙක් චාර්ට් ෂෝ එකක් වැනිය.) කමෙන්ට් වලින් පහර දෙන්නේත් නිවේදකයාට සහ නිවේදිකාවටය. එසේ නම් උන් දෙන්නා මාරු කරන්නට නොකියා වැඩසටහනට කෙලින්නට යන්නේ කුමන පදනම මතද? යන්න සිතා ගත නොහැකිව මෙම ලිපිය ලියා දක්වන ලදී.

Written_by_sAm_ශ්‍රී_Perera_11:03pm_02/05/14

Thursday, May 1, 2014

කම්කරු දිනය? දේශපාලුවන්ගේ දිනය? - Labor's Day or Politicians Day ??


සොලවමින් කොඩි
තබයි පෙර අඩි
තර කරයි මඩි
ඉතිරි දිනකදි



එක දිනක් ඇති
කම්කරුවො එති
පාට කොඩි ඇති
සෙවනෙ සැනසෙති



ලොකු කරන් ඇස්
පුරවගෙන බස්
පාලකයො ගොස්
කන්න දෙති මස්



කෑම එක ෆ්‍රී
බෝතලය දී
පාට කොඩි දී
දිනය තොපෙ කී
දවසෙ සැනසී



දිනයෙ කම්කරු
මහ එවුන් බොරු
කියාගෙන මරු
කරයි කම්කරු
දිනය මහ සරු



පායපන් හිරු
හෙට දිනත් සරු
වේවි යැයි සිතු
රැවටේය මතු



sAm_ශ්‍රී_Perera_9:15am_01/05/14
Related Posts Plugin for WordPress, Blogger...