Friday, March 18, 2016

කරන්ට් නැති කතා - Power Cut Stories !!!


මේ ටිකේම කරන්ට් නැත්තේය. ඒ අස්සේ රස්නය නිසා රජයට සිදුවන බලපෑම වැඩිය. සදුදා සිට සෑමා සිටියේ ගෙදරින් පිට නිසා කරන්ට් සීන් එක වැඩිපුර දැනුනේ නැතිය. පුත්තලම, හලාවත, පැත්තේ සිට ගෙදර පැමිණි අද සෑමාට විදුලි අර්බුදයේ තරම තේරුණේය. පහුගිය ටිකේ සිටියේ හෝටල වලය. පොඩි සෑමා නින්දේය. කිටියා කොලුවාට අත කඩාගෙන පවන් ගසන්නීය. ඒකත් ශිෆ්ට් එකටය. ඊලඟ ශිෆ්ට් එකට පෙර මෙය ලියා අහවර කල යුතුය.


ඉස්සර කාලයක් එක දිගට විදුලිය විසන්ධි වූවා මතකය. සෑමා පාසල් යන ඒ කාලයේ සිටියේ චන්ද්‍රිකා මැඩම්‍ ය. ඇය ඒ කාලයේ මොකක්දෝ ජෙනරේටරයක් ගෙන්වනවාදෝ මොකක්දෝ කියා හැම රෑකම විදුලිය කැපුවාය. මතක විදියට රෑට තඩි ලොරියක පටවාගෙන අහවල් ජෙනිය ගෙනියන බවක් කීවාය. විදුලි රැහැන් වල ගෑවෙන නිසාම විදුලිය කැපුවාය. රෑට ට්‍රැෆික් නැති නිසාම ඒක රැගෙනයාම පහසු බවත් කීවාය. සෑමාට මතක ඒ ටිකය.

අවට පරිසරයම නිහඩය. ඇසෙන්නේ එහා ගෙදර සිටින මහප්පාගේ නැශනල් රේඩියෝවේ හඩ පමණක් ය. ඉස්සර සිටන් ම එහෙමය. මහප්පා කොච්චර කරන්ට් එක තිබුණත් රේඩියෝවට බැටරි පහ දැමීම අමතක නොකරන්නේ ය. මෑතක ස්වර්ණවාහිනී යේ ගිය රාජ සභාව කොමඩිය ඉස්සර අපි ඇහුවේ ස්වදේශීය සේවයේය. ඒත් ඔය නැශනල් රේඩියෝවෙන්‍මය. මහප්පාගේ ඇද වටේ රේඩියෝවට වටවී අපි ගුණදාස මදුරප්පෙරුම හා මහින්ද පතිරගේ කවුදැයි රූප සටහන් මවා ගත්තෙමු. පසුව ඔවුන් රූප පෙට්ටියට වැඩම කළ පසු සත්‍ය රූප අපට පසක් වූයේය.

මතක හැටියට මැඩම්ගේ කාලයේ සෑමාට කාර් බැටරියක් තිබුණේය. ඒ නම් පහළ බද්දට දී තිබූ කඩ කාමරයේ බැටරි කඩයෙන් ඉවත්ලූවක් ය. ඒත් ඒ කාලයේ සෑම්ගේ ගෙදර තිබූ ඩබල් ඩෙක් කැසට් ප්ලේයර් එක පත්තු කිරීමට එය ප්‍රමාණවත් වූයේය. කරන්ට් නැති විට එය දිනකට පැය කිහිපයක් වැඩ කළේය. ආතල්‍ ය. කලුවරේ ඉටිපහන් එලියේ තැන් තැන් වල වැටී සිටින ගෙදර උන් නිහඩව ගීත අසන්නෝය. ඒ ඇසුණු ගීත අද ඇසෙනා ගීත වලට වඩා රසවත්ය. වික්ටර්ගේ ගීත සෑමාගේ තාත්තා මිමිණුවා සෑමාට තවමත් මතකය.

ඉස්සර නම් කරන්ට් යන එක එච්චර ගැටළුවක් නොවුණේ මන්දැයි සෑමාට ගැටළුවක්ය. සමහර විට දැන් තියෙන තාක්ෂණික දියුණුවත් සමඟ ඉස්සර විදුලිය නොමැති වීම ගැටළුවක් නොවන්නට ඇතිය. ඉස්සර නම් කළේ රෑ පානේ රූප පෙට්ටිය වටකරගෙන සිටීම පමණක්ය. දැන් නම් කොල්ලන්ට, කෙල්ලන්ට මෙන්ම පරණ පරපුරටද විදුලිය නැතුවම බැරිව ඇත්තේය. ලැපක්, ෆෝන් එකක්, ටීවි එකක්, ලයිට් එකක්, ෆෑන් එකක් නැතුව සිටීම ජනතාවට ඉවසා සිටීමට බැරි තත්වයට පත්ව ඇත්තේය.

නොපැතූ මොහොතක විදුලිය විසන්ධි වූ සැනින් ගිණී පෙට්ටිය සෙවූ අතීතයක් සෑමාට මතකය. දැන් නම් අතේ තිබෙන ස්මාර්ට් ෆෝන් එකේ ෆෑලෑෂ් එක ඔන් කර ගිණි පෙට්ටිය සොයා ගැත හැකිය. ඒත් ඉස්සර එහෙම නැතිය. පරණ ගෙදර තිබූ කාලයේ අම්මා ඉව්වේ දර පෝරණු ලිපකය. ඒ පෝරණු බිත්තිය  පුරාම කළු පාට වී තිබුණේ දැවුණු දර වල දැලි වලින්ය. ඒ ඇරත් පෝරණුවේ පැත්ත බිත්තියක නිතරම එල්ලී තිබුණු කුප්පි ලාම්පුව නිතරම පත්තු වී තිබුණේ මන් දැයි සෑමා තවමත් නොදන්නේය. ඒ ලාම්පුව සහිත බිත්තිය වඩාත් කළු පැහැ ගැන්වී තිබුණේ ලාම්පුවේ දුම නිසාමය. ඒ කාලයේ විදුලිය විසන්ධි වූ මොහොතක ඉටිපන්දම් දල්වන තුරු එළිය දුන්නේ, සහනයක් සැලසූවේ පෝරණුවේ එල්ලා තිබූ කුප්පි ලාම්පුවය.

විදුලිය නැතිව හෝ ඇතිව ඒ මතකයන් සිහිනයන් පමණක්ය. අතීතයන්ය. අතපත ගෑ හැකි දුරක නොවේමය. සුන්දරය. නැවත ලඟා විය නොහැක්කේමය. විදුලිය කැපුණු මුල් දවස්වල බුකියේ ෂෙයාර් වී තිබුණේ වටිනා පෝස්ට් එකක්ය. එය කරන්ට් නැති නිසා කාමරයෙන් එළියට බැස්ස සයිබරේ කොල්ලෙක් ගේ පෝස්ට් එකක්ය.  කොල්ලා කරන්ට් නැති නිසා එදින නිවැසියන් සමඟ දොඩමලු වී ඇත්තේය. නිවසේ වෙනස්කම් දැක ඇත්තේය. ගෙදරට අලුත් පුටු සැටියක් ගෙනවිත් ඇත්තේය. අක්කාට දරු පැටියෙක් ලැබිලාය. අල්ලපු ගෙදර උන් තාප්පයක් ගහලාය. ඒ මදිවට ගෙදර උදවිය හරි මිත්‍රශීලී හොඳ කට්ටියක් බවද හෙතෙම කියන්නේය. සයිබරයේ නොහදුනා ලොවක තනිවී, ලඟ පාත උන් අමතකව සිටියදී විදුලිය විසන්ධි වී සිටියදී හෙතෙම මෙලොවට බහින්නේ විදුලිය විසන්ධි වීමත් සමඟය. පහුවදා හාඩ්වෙයාර් එකට ගිය සෑමාට හාඩ්වෙයාර් එකේ ඩෑල් එකද කීවේ එවැනිම කතාවක්ය. තම පුත්‍රයා කරන්ට් නැතිව, ෆෑන් වැඩ නැති ග්‍රීශ්මයෙන් කාමරයෙන් එලියට වැඩම කර ඇත්තේද එවැනිම පසුබිමක් තුල බවය.

තාක්ෂණය මිනිසුන් දුරස් කළ අයුරු ඛේදනීයය. බස්සීගේ කවි ලියවිල්ල පෝස්ට් එකට මඟ පෑදුවේය.


Written_by_sAm_ශ්‍රී_Perera_10:59am_18/03/16

Wednesday, March 9, 2016

උඹ කෝමද මට කලින් ඇතුලට යන්නෙ?? - How You Jailed Before ME !!!


ලියන්නට යන්නේ ක්‍රිබ් කතාවක්ය. ක්‍රිබ් එක නොදන්නා එකෙක් සිටිය නොහැකි බව සෑමා සිතා සිටියේය. එහෙත් එය එසේම නොවන බව තේරුණේ මෑතකදීය. ඒ නිසා ක්‍රිබ් යනු කුමක්දැයි සරලව සඳහන් කළ යුතු බව සිතෙන්නේය. ගැඹුරු විග්‍රහ, පැහැදිලි කිරීම්, සහ නිවැරදි කිරීම් සඳහා පහළ කමෙන්ට් තීරුව ඔබට වෙන්වන්නේය. CRIB හෙවත් ක්‍රිබ් යනු Credit Information Bureau of Sri Lanka ය. මෙමගින් ඔබගේ ණය තොරතුරු වාර්ථා පරීක්ෂා කර බැලිය හැකිය. ඔබ බද්ධ ණය කරුවෙකු/ ඇපකරුවෙකු ලෙස සම්බන්ධවූ ණය පහසුකම් පිළිබඳව නිරීක්ෂණය කළ හැකිය. ඔබේ ණය ගෙවීමේ ක්‍රමවත් බව හෝ අක්‍රමවත් බව පිළිබඳව තොරතුරු ක්‍රිබ් එකෙන් බලා ගත හැකිය.


කෙසේ හෝ සමාජ වහරේ ක්‍රිබ් එකට යනවා කියන්නේ කිසිවෙකුගේ මූල්‍ය ගණුදෙනු අක්‍රමවත් බව කියවෙන්නක්ය. ලීස් එකක් ඇරියස් වුණොත් ක්‍රිබ් එකට ගියා කියන්නේ වාහනේ අයිතිකාරයා පොලොවේ පස් කන සීන් එකක්ය. එලෙසම ක්‍රිබ් එකට ගියා කියා ඇඟ බේරා ගන්නා උන්ද අනන්තය. එය සිද්ධ වන්නේ මෙලෙසය. කිසිවෙක් තවත් අයෙකුට තමන්ගේ ණය ලබා ගැනීමකට, ලීස් එකකට, හෝ කිසියම් ගණු දෙනුවකට ඇප වන ලෙස ඉල්ලා සිටිනා විට, එය මඟ හැරීමට ඇති උපක්‍රමය ක්‍රිබ් එක පිටින් යැවීමය. අත්සන් කරන්න නම් පුලුවන් මචං, ඇප වෙන්න නම් පුලුවන් මචං, “ඒත් මම ක්‍රිබ් එකේ ඉන්නවා නේ“ කියූ විට අනෙකා වෙන අතක් බැලිය යුතුය. ක්‍රිබ් එකේ ඉන්නා එකෙකුට තවකෙකුට ඇප වෙන්නට නොහැකිය. ඒ නිසා ක්‍රිබ් එකේ ඉන්නවා යැයි කීමේ අවාසියක්ද නැත්තේය.

සෑමාට ක්‍රිබ් කතාවක් පත්තු වුණේ ලඟකදීය. ඒ ඌ ක්‍රිබ් ගිය නිසා නොවේය. අපේ එකෙක්ව තවත් එකෙක් ක්‍රිබ් එකට යැවූ නිසාය. සෑමාගේ මිත්‍රයා විමල් නම්, විමල්ගේ මිත්‍රයා දාස නම් කතාව දිගටම ලිවිය හැකිය. නැති නම් ඇත්ත නම් දැම්මොත් සෑමාට වන්නේ ක්‍රිබ් කෙසේ වෙතත් හිරේ යන්නටය.

විමල් හිත හොද එකාය. ඒ නිසා ඕනෑම ගින්දරකට පැනීමට ඔහුට සිත් දෙන්නේය. කොතරම් මිතුරන් සිටියත් මූල්‍ය ගණුදෙනුවකදී මිතුරුකම් පසෙකලා ටිකක් වැඩි දුරකට සිතිය යුතු බව සෑමා උගත්තේය. ඒ ගැන නම් උගත් පාඩම් බොහෝය. එහෙත් විමල් හිත හොද එකා නිසා දෙවරක් නොසිතන්නේය. කිසිවෙකුට ගණුදෙනුවකට ඇප වෙන්නට පෙර උගේ මූල්‍ය තත්වය පිළිබඳව සොයා බැලිය යුතුය. එලෙසම අත්සන ගසන්නට පෙර “මචං උබ කෝමද මේක දැන් ගෙවාගෙන යන්නේ?“ කියා හෝ ඇසිය යුතුය. විමල් එසේ ඇසුවාද නොඇසුවාද සෑමා නොදන්නේය. අසන්නට ගියේ ද නැතිය. එහෙත් එලෙස ඇසීමට සිත තබා ගත යුත්තේය. එය ඇප වන්නාටත් වඩා, ණය පහසුකම් ලබා ගන්නාටද කරන්නාවූ උපකාරයක් ලෙස සෑමා දකින්නේය. නැතිනම් අයෙකුගේ ජීවිතයක් පවා විනාශ වෙන මට්ටමට කටයුතු දුර දිග යා හැකිය. කිසියම් අයෙක් ලීසිං කම්පැණියකට ගොස් ගිණි තබා ගත් සීන් එකක්ද සෑමාට මතකයේ ඇත්තේය. ඒ නිසා ඇප වන්නාද, ණය පහසුකම ගන්නාද, සියල්ලට කලින් ටිකක් කතා බහ කළ යුතුය.

කෙසේ හෝ විමල් ඇප අත්සන ගසා ඇත්තේය. දාසයාද ණය පහසුකම අරගෙන වාහනය අරගෙන ඇත්තේය. දාස යනු පොලු කාරයෙක් නොවේය. බිස්නස් කරනා නිසා ඇති කල මුදල් බොහෝය. නැති කල බිංදුවටම බැස නැවත නැග එන්නේය. එලෙස නැති කලෙක දාසයා වාරික කිහිපයක් අතපසු කර ඇති බව විමලේ කිව්වේය. ඒ අනුව ඇප වූ විමලේට ලීසිං කම්පැනි එකෙන් කෝල් එක ආවේ සෑමා ඉන්නා තැනකදීමය. තමා වරක් දාසයාව වාරික ගෙවනා මෙන් දන්වා සිටි බවත්, නැවතත් කියා සිටිය හැකි බවත් විමලේ කම්පැනියට දන්වා සිටියේය. එහෙත් කම්පැනියෙන් කතා කළ පුද්ගලයා නැවත නැවතත් අපේ විමලේට බලපෑම් කළේ විමලේව බිය ගන්වන ආකාරයෙන්ය. එවිට විමල් කෙලින්ම කියා සිටියේ වාරික ඇරියස් නම්, වාහනය සීස් කරනා ලෙසය. තමාට ඉන් කිසිම හානියක් නැති බවත්, දාසයා නිසා තමන් ක්‍රිබ් එකට වැටී ඇති නිසා සීස් කිරීමෙන් තමන්ට ක්‍රිබ් එකෙන් නිදහස් විය හැකි බවත් විමලේ කියූ තැන කම්පැනි මහතාගේ හඬ බාල වූයේය. හෙතම නැවත ඉල්ලා සිටියේ වාරික සියල්ල ගෙවන ලෙස මිත්‍රයා දැනුවත් කරන ලෙසටය.

මා මිත්‍ර විමල් ඉන්පසු ඇමතූවේ දාසයාටය.

“මොකක්ද මචං උබෙ ඇරියස් ටික තාම ගෙව්වෙ නැද්ද?“

“හරි බං මම මේ මාසෙ වැඩේ සෙට්ල් කරන්නම්.. ඇයි උබට ලීසිං එකෙන් කතා කළාද??“

“ඒකනෙ බං... බලපං.. උඹ නිසා මාව උන් ක්‍රිබ් එකටත් දාලා..“

“පිස්සුද බං?? උන් උබව කොහෙ දාන්නද?? උබට කලින් උන් මාව දාල ඉන්න එපෑ...“



පලි - ක්‍රිබ් එක නොදත් මිතුරෙකු වෙනුවෙන් අපි විනාඩියක නිහඬතාවයක් පැවැත්වූ අතර, 
එහෙව් එකෙක්ට ඇප වූ මා මිත්‍රයා වෙනුවෙන් නිහඬතාවයක් පැවැත්වීමට නොහැකි තැන මේ පෝස්ට් එක ලියැවුණේය.
Related Posts Plugin for WordPress, Blogger...