Google+ Followers

Sunday, November 22, 2015

හොස්පිට්ල් එකේ අභිරහස - ෂර්ලොක් හෝම්ස් කතාවක් !!


හෝම්ස් මහත්මයා ඔබ දන්නවද ඒ සිද්ධ වුණේ පස්වෙනි ඝාතනය.

ඔබේ ගණනය කිරීම නම් හරි වොට්සන් මහත්මයා, ඒත් ඔබ දන්නවාද එය අත්වැරදීමක් බව?

අත් වැරදීමක්, ඔබ තවමත් ඉන්නෙ පාසල් අවධියේ වොට්සන් මහත්මයා. එකම රෝහලක, විශේෂ ප්‍රතිකාර අංශයේ මරණ පහක් සිද්ධ වෙනවා. ඒ සියල්ලම එකම ආකාරයට. මුළු නගරයම ඩෝසන් වීදියේ තියෙන රෝහලට විරුද්ධව කැරලි ගසන්න සූදානමින්. ඔබ කියනවා එය මිනීමැරුමක් නෙවේ අත් වැරදීමක් කියල? ඔබ කරන්න යන්නෙ මිනීමරුවා රැක ගන්න හොස්පිට්ල් එක බිල්ලට දීමක්.

වෙට්සන්, ඔබ කරන්න යන්නේ මගේ විශ්ලේෂණාත්මක රහස් පරීක්ෂක දැනුම පිළිබඳ සැක කිරීමක්. ඔබට අමතකද විශේෂ ප්‍රතිකාර අංශයේ ජනෙල් බැම්ම? කවදාවත් නොඅරින ඒ බැම්ම මත තිබුණු නියපොතු කැබලි.

ඔව් හෝම්ස්. ඔබ මා සමඟම ගොස් ඒ කොටස් එකතු කර ගත්තා. එහි විශේෂයක් මා දකින්නේ නැහැ.

ඇත්ත එය මටත්  විශේෂයක් නැහැ. ඒත් ඔබ දන්නා සියළු රෝගීන් මරණයට පත් වුණේ රාත්‍රී කාලයේ බවත්.

ඔව්. ඝාතකයාට පහසුම වේලාව එය වෙන්න පුලුවන්. එහෙත් ඔබ රාත්‍රි කාලයේ වූ මරණ හෝ ඝාතන නියපොතු සමඟ ගලපන්නේ කොහොමද? ඇත්තටම හෝම්ස් මෙවර ඔබ හිතන්නේ වැරදි ආකාරයකට.

ඇත්තටම ඔව්. මම හිතන්නේ වැරදි ආකාරයට. රාත්‍රී මරණ, කටින් කඩා දැමූ නියපොතු, දුටු විගස මට සිහිවන්නේ මා කාලයක් ඇසුරු කළ මාගේ මිතුරියක්. ඇය බොහෝ විට රාජකාරී කළේ රාත්‍රී කාලයේ. නිදිමත නිසා ඇහැරී ඉන්නට ඇය බොහෝ කටයුතු කළා. විටක අපි නොසිතන දෑ. ඇය ඇගේ නියමල මතුවන තුරු නියපොතු කටින් කඩා දමන්නට පුරුදු වුණේ රැකියාවේ ඇති කාර්යය බහුලකමත්, රාත්‍රී කාලයේ ඇහැරී සිටීමටත් අවශ්‍ය නිසා.

හෝම්ස් ඇය හෙදියක්ද?

ඔන්න වොට්සන් ඔබ ඒ ගමන කියන්නට යන්නේ මිනී මරුවා හෙදියක් කියලා. අනික රෝහලක. රාත්‍රීයේ. ඔබ හිතනවද රෝහලක රාත්‍රි රාජකාරී කරන හෙදියක් තම ඇසි නොපියවා තබා ගැනීමට කටයුතු කරයි කියලා. කොහෙත්ම නැහැ වොට්සන්. ඔවුන්ට ඇති තරම් ඇඳන් තියෙනවා. ඔවුන් රාත්‍රි රාජකාරියට වඩාත් ප්‍රිය අතිකාල දීමනා වැඩිපුර ලබන්නත්, රාත්‍රියක නිවසකදීටත් වඩා සුවට නිදන්නටත් අවශ්‍ය නිසා වෙන්මයි.

හෝම්ස් ඔබ නම් විහිළුකාරයෙක්. ඔබ ඔය උරන පයිප්පයේ යම් කිසි විහිළු කුඩක් මිශ්‍ර වෙලා ඇති. ඇත්තටම. 

වොට්සන්. ඇත්තටම මේක මිට විහිළුවක්. ඔබ හිතනවද ඝාතකයෙක් මෙච්චර සාක්ෂි මට ඉතිරි කරයි කියලා.

මිනී මැරුම් පහක් හෝම්ස් සහෝදරයා. කිසිම හෝඩුවාවක් නැති ඒවා. ඔබට එතරම් සාක්ෂි ලැබුණයි කියන්නෙ කෝමද? මාත් ඔබ සමඟ හිටියා. ඔබ මා දුටුවේ නියපොතු කිහිපය පමණයි. ඔබ ඒ එක සාක්ෂියෙන් ගොඩක් දුර ගිහින්. හරියට පාසල් කාලේ ආදර කතාවක් වගේ. කෙල්ල හිනා වුණාම කොල්ලා ඒ කෙල්ලව මානසිකව විවාහ වෙලත් ඉවරයි. ඔබ හරි බොලඳයි හෝම්ස්. පාසල් කාලේ ආදරයක් මතක් වෙලාද?

වොට්සන්. ඔබ නොදුටුවාද මේ මිනී මැරුම් පහ කළේ කඩිසර අයෙක් කියලා. සමාවෙන්න. ඔබ කියන ආකාරයට ඒවා මිනී මැරුම්. මම කියන ආකාරයට ඒ අතපසුවීම් පහම කළේ මහ කම්මැලියෙක්.

කම්මැලියෙක්. අනික අතපසු වීම්. හෝම්ස් මිත්‍රයා මට ඔබව කලකිරෙන මට්ටමට ඔබ ආසන්නයි. 

එපා වොට්සන් මිත්‍රයා. කළබල වෙන්න එපා. විශේෂ ප්‍රතිකාර අංශයේ විදුලි පේනු 2ක් නිතරම කිසියම් යන්ත්‍ර වලට සවි කරල තියෙන්නෙ. අනිත් එකම එක පේනුව තියෙන්නේ ඇඳට මදක් ඈතින්. එම පේනුව මෑත දිනයක භාවිත කරලා නැති තරම්. ඔබ දැකල ඇති නිතරම භාවිත කරන පේනු හීරීමකට ලක් වෙනවා. ඒ යන්ත්‍රවල ප්ලග් සවි කරන්නට ගලවන්නට නිතරම භාවිත වෙන නිසා.

ඔව් හේම්ස් ඔබ හරි. එය හෝඩුවාවක් ලෙස ඔබ දැකීම මට නම් විහිළුවක්. 

වොට්සන් මම කැමතී ඔබත් එම රෝහලේම වැඩිදුර ප්‍රතිකාර අංශයට ඇතුලත් වෙනවා නම්. ඔබට තේරෙයි මේ අතපසුවීම් පහටම සම්බන්ධ කුමන අයෙක්ද කියල දැන ගන්න.

ඔබ?? හෝම්ස් වොට්සන් ගේ ජීවිතය සීමා කරන්නද යන්නෙ?

නැහැ වොට්සන්. ඔබ මගේ මිත්‍රයා මාව විශ්වාස කරන්න. අනෙක ඔබට දැන් විවේකයක් අවශ්‍යයි. අද දහවල් ඇතුලත් වෙලා, කාර්යය මණ්ඩලයේ  උදව්වෙන් නීරෝගී ඔබව අපි රෝගි ඇඳකට දමන්නම්. විශේෂ ප්‍රතිකාර අංශයේ නොමිලේ ලැබෙන ඔක්සින් මාස්ක් එකත් එක්කම ඔබ අද රැය විවේක ගන්න.

ඔබට ඇත්තටම මෙය විහිලුවක් හෝම්ස්.

මාව අවිශ්වාස නම්, ඔබ කියන ආකාරයේ ඝාතකයා අල්ලා ගැනීමට පමණක් උදව් වන්න වොට්සන්.

******

වොට්සන් කොහොමද හුස්ම ගැනීම ඉතාම පහසුයි නේද?

ඔව් හෝම්ස්. මේ මම අද දවසට ගන්නා අවසන් හුස්ම පොද වෙන්න බැරි නැහැ. ඔබ කෙරේ මා අවිශ්වාසයක් නැති නිසාමයි මෙහි ආවේ. 

ස්තුතියි වොට්සන්. අද රැය ඔබ විශේෂ ප්‍රතිකාර අංශයේ ගෙවන්න. මා ඔබ සමඟම මේ රෝහලේම රැදෙන්නම්.

බොහොම හොදයි හෝම්ස්. හදිසි අවස්ථාවක් වුවොත් මා ඔබ අමතන්නම්.

******

මිත්‍රයාගේ උපාය සාර්ථක කර ගැනීමට වොට්සන් විශේෂ ප්‍රතිකාර අංශයේ ඇඳක් මත හුස්ම ගන්නේය. ඒ ඔක්සිජන් ලබා දෙන මැෂින් එකක ආධාරයෙන්ය. වොට්සන් තනිවම ඇස් කරකවමින් බලා සිටින්නේ ඉතා අපහසු ආකරයේ රෝගියෙකු ලෙසින්ය. එහෙත් ජීවන බය කෙතරම් දැයි මේ ඔහුට දැනෙන ප්‍රථම අවස්ථාවය. ඇසෙන්නේ මැෂින් වල සියුම් හඩ පමණක්ය. ඒ අස්සේ  ඔරලෝසුවේ තප්පර හඬය. රාත්‍රී නවය පසු වූයේය. දහයද ගැටළුවක් නැතුව ගෙවුණේය. රාත්‍රී එකොලහට විශේෂ ප්‍රතිකාර අංශයේ දොර හැරුණේය.

හෙතෙම එතරම් උස නැති සිහින් සිරුරක් ඇති, අපිලිවෙල අයෙක්ය. හැද සිටියේ රෝහලේ සුළු සේවකයින්ගේ ආකාරයේ ඇඳුමක්ය. හෝම්ස් කියු ආකාරයෙන්ම කලබල නැතිය. මෙවර පැමිණෙන්නේ හෝම්ස් කියූ කම්මැලි ඝාතකයාය. නැත. හෝම්ස් කියූ අයුරින් නම් ඒ කම්මැලි අතපසුවීම් කරන්නාය.

අත තිබූ මොප් එක පැත්තකින් තැබූ හෙතෙම ඇඳ අසල වූ පුටුව ගෙන හිද ගත්තේය. ඇත්තටම ඔහු කළබල නැතිය. ඉන්පසු මොහොතක් වටපිට බලමින් සිට ඔහු පුටුව මත නිදිමතේ කිරා බාන්නට වුයේය. හෝම්ස් හරිය. මොහු කම්මැලිය. එහෙත් වොට්සන්ට ඇඳෙන් නැගිටීමට නොහැකිය. තමන් අසාධ්‍ය රෝගියෙක්ය. එහෙත් කම්මැලි ඝාතකයා තමන්ට පහර දුන්නහොත්, තමන් ඝාතනය කළහොත් ඝාතකයා කම්මැලි යැයි කියා හිත හදා ගත නොහැකිය. ජීවිතය අතැර යන්නට වන්නේය. වොට්සන්ට තමන්ගේ හද ගැස්ම තමන්ටම ඇසෙන මට්ටමට පත් වුණේ එවිටය. මැෂින් අවශ්‍ය නැතිය. නොමිලයේම තමන්ගේ හදවත ගැහෙන හඬ ඇසෙන්නේය.

ඝාතකයා නැගිට සිටියේය. තමා අත වූ වැක්‍යුම් ක්ලීනරය අතට ගත්තේය. ඇඳ අසල වූ ප්ලග් දෙකම මැෂින් වලට සම්බන්ධ කොට භාවිතයේ පවතින බව දුටුවේය. තමන්ට දුරින් ඇති පේනුව දෙසද නෙත් හෙලුවේය. ඔහු ඇත්තටම කම්මැලිය. දුර තිබූ පේනුව දෙස බලා දිගු ඈණුමක් ඇර ඔහු ඇඳ අසල තිබූ පේනුවෙන් ඔක්සිජන් මැෂින් එකේ ප්ලග් එක ගලවා පිරිසිදු කිරීම ඇඹුවේය.

හරියටම ඔහු පැය භාගයක් පමණ වැක්‍යුම් ක්ලීනරය භාවිත කළේය.

වොට්සන් මැෂින් එකෙන් හුස්ම ගන්නා රෝගියෙකු නොවුනේ වෙලාවටය.

sAm_ශ්‍රී_Perera_10:15pm_22/11/15

Tuesday, November 17, 2015

උස එකකට කොක්ක ගසනා හැටි.. - How to Hang on Roof !!

කොක්ක ගසනවා කිව්වාම ගොඩක් උන් හිතන්නේ කෑල්ලක් සැට් කර ගැනීම ගැනය. අනික උස එකකට කොක්ක ගසනවා කිව්වාම බොහෝ සතුටු වෙන්නේ කෙල්ලට වඩා මිටි කොල්ලෝය. එහෙව් ආදර කතා සෑමා බොහෝ දැක ඇත්තේය. ඉස්කෝලෙ යන කාලේ සමහර කෙල්ලෝ කොල්ලන්ට කියන්නේ අනේ අපි මැච් වෙන්නේ නැහැ කියාය. ඔයා කොටයි කියාය. මම උසයි කියාය. එවිට සිත් තැවුලෙන් ගෙදර එන කොල්ලෝ එල්ලෙන්නේ උළුවස්සේය. මැරෙන්නට නෙවේය. උස යන්නටය. එලෙස බාල්කයේ හෝ උළුවස්සේ එල්ලී බාර් දානවා යනුවෙන් ව්‍යායාම කරන්නේ කෙල්ල කෙරේ ඇති අප්‍රමාණ සෙනෙහස නිසාය. එහෙව් කොල්ලෝ මේ පෝස්ට් එක නොබැලුවාට කම් නැත. මේ කියන්නට යන්නේ උස තැනක ඇති පරාලයකට හෝ ලීයකට ලණුවක් දා ගන්නා ආකාරයය. බොහෝවිට මෙය වඩා වැදගත් වන්නේ මඳුරු දැලක් වැනි දෙයක් එල්ලීමේදීය. කාමරයේ නෙට් එකක් එල්ලන්නට දඟලන බොහෝ අය අතපය කඩා ගන්නේ තාක්ෂණය නැති නිසාය. ඉනිමඟ රැගෙන එන්නට ඇති කම්මැලි කම නිසා කොහේ හෝ අඩිය තමා අඩමානයේ නැග බිම වැටෙන්නෝය. බොහෝ අය නෙට් එල්ලන්නේ ඇද මතට පුටුවක් තබා ඊට අඩිය තබාය. එවිට ඇදේ මෙට්ටය තුල පුටු කකුල් එරීයාමෙන් පුටුව පෙරලී යා හැකිය. සිදුවන්නේ විනාශයක්මය.

දැන් කෙලින්ම උපක්‍රමයන් ටික පහදා දිය යුතුය. මේ ක්‍රමයට කොච්චර උස එකක් වුණත් කොක්ක ගැසිය හැකිය. එල්ලිය හැකිය. සමහරු කියන්නේ උස ගස් ඉරන්නේ බිම පෙරලලා කියාය. මේ ක්‍රමයට වහලය බිම පෙරලිය යුතු නොවේය. අවශ්‍ය වන්නේ පහළ බඩු සැට් එකය.
අවශ්‍යය ද්‍රව්‍ය -
  • වහලයට තරම් දිග කොස්සක්, හෝ ලීයක්
  • ඉස්කුරුප්පුනියනක්
  • ලණුවක්, නූලක් හෝ පටියක්
මුලින්ම නියනෙහි නූල හෝ ලණුව ගැටගසා ගත යුතුය. එය පහත ආකාරයෙන් විය හැකිය.



ඉන්පසුව නියන කොස්ස මිට පැත්තේ කෙළවරට යන්තමින් සවි කර ගත යුතුය. එය ඉතා හොදින් තද නොකළ යුතු අතර පහ වසරේදී සෙලවෙන දතක් ආකාරයෙන් නොගැලවෙන ගැලවෙන මට්ටමේ විය යුතුය. පොඩි තට්ටුවකින් වැටෙන මට්ටමින් සවි වී තිබිය යුතුය.

දැන් වැඩේ සැට්ය. කොස්ස නියන සහ ලණුව එක හුස්මට අතට ගෙන දැන් ඔබ යා යුත්තේ මදුරු දැල එල්ලිය යුතු පරාලය ලඟටය. එතැනට ගොස් නියන පරාලය උඩින් තමා වහලයේ වදින ලෙස සෙල විය යුතුය. එලෙස සෙලවෙද්දී නියන බුරුල් වී ගැලවී වැටිය යුත්තේ පරාලයේ එහා පැත්තෙන්ය. කියනා දේ නොතේරෙන උන්ට පහල රූප රාමුව උපකාරී විය හැකිය.

දැන් නම් වැඩේ ගොඩය. කෙල්ලගේ සහ කොල්ලාගේ අතර මැද ඇති කොට්ටය මතින් එහා පැත්තට පනිනා ආකාරය සෑමා පහදා දී අවසානය. කොට්ටය පැන්නාට පසු කරනා දේ සෑමා පැවසිය යුතු නැත. එලෙසම පරාලය එහා පැත්තෙන් දා ගත් ඉස්කුරුප්පුව හෝ නියන නිවැරදි ආකාරයට පහලට ගැනීම කළ යුතුය. ඒ සදහා නූල කෙලවර අල්ලාගෙන සෙමින් සෙමින් සෙලවිය යුතුය. නියන පහලට රූටා එන තුරු නූල සොලවා නියන අතට ගන්න. නියන ගලවා දමා නුලෙහි අවශ්‍ය පරිදි මදුරු දැල හෝ අවශ්‍යය දෑ එල්ලා ගත හැකිය.

Written_by_sAm_ශ්‍රී_Perera_6:56pm_16/1/15

Sunday, November 15, 2015

ප්‍රංශ.. - France !!




ලංකාවෙ අපිට මහ ගේමක් නෑ ඕං

කඩයක් ගානෙ අපෙ උන් ඇද්දෙ දාම්

එහෙව් ගේම අනිත් පැත්තට කරපු උන්

තමන්ගෙ ඉත්තො කැපෙන්න දුන්න නම්

ඒකට අපි කිව්වෙ ප්‍රංශ අදිනවා කියල ආයුබෝං !!

Wednesday, November 4, 2015

ඇට්ටේරියා ගසක බැඳි ආදරය... 2



සිතුම් ගත් ගැම්ම ඉස්තරම් වූයේය. අකිලයාගේ අත ගිලිහුණේය. ක්ලාස් අහවර වී අන්තිම බස් එකේ ගෙදර එද්දී ෆුට් බෝඩ් එකේ සිතුම් එල්ලෙද්දී, අකිලයාවත් එල්ලා ගැනීමට උත්සාහ කළ දිනය අකිලයාට සිහි වුයේය. සියළු උත්සාහයන් අතහැර සිතුමාට ගෙදර යන්නට දී අකිලයා ආපසු හැරී බස් හෝල්ට් එකට විත් හිට ගත්තේ ඉවසීමෙන්, ප්‍රශ්න ඇති නොකරගෙන, ජීවිතයට මුහුණ දෙන ආකාරය ප්‍රගුණ කර ඇති නිසාය. එදා සිතුමා ඊලඟ නැවතුමෙන් බැස අකිලයා සොයාගෙන නැවත ආ සැටි අකිලයාට මතකය. ඒ සිද්ධිය මතක තිබියදීත් අකිලයා පැත්කට වී බස් එකක් එනතුරු මෙන් බලා සිටියේය. අත්ලෙහි වූ පොරි ගොටුවකට විසිවෙන්නට පහර දෙන්නේ යම් සේද එසේම සිතුමා ඉදිරියට පැන බයික් එකේ සිටි අනංගයාට පා පහරක් එල්ල කළේය. හෙල්මට් එක පාර එහා පැත්තේ කාණුවටද, බයික් එක පාර මැදටද විසිව ගොස් අනංගයාගේ කකුලක් බයික් එකට යටව තිබුණේය. කෙහෙල් ලෙල්ලක් මත නැගි එකෙක් බේරා ගන්නට අල්ලා ගන්නට වෙලාවක් අසල උන්ට නොලැබෙන්නේය. එලෙසම කරකියා ගත දෙයක් නොමැතිව, කිසිවක් සිතා ගන්නට කාලයක් නොමැතිව අනංගයාගේ මිත්‍රයන් දෙදෙනා බලා සිටියෝය.

වරදෙහි බැඳෙන්නට පෙර ඔවදන් දෙන මිතුරන් කොහෙවත් නැතිය. වරදෙහි බැදී කෙළ වූ පසුව උපදෙස් දෙන්නට මිතුරන් බොහෝය. මිතුරන්ගේ දෙමාපියන්ද බොහෝය. අනංගයා බයික් එකට යටව සිටියදී දිව ආ මිතුරන් දෙදෙනා බයික් එක උස්සනවා වෙනුවට කළේ ඔහුට ඇඩ්වයිස් කිරීමය. ඒ හැටිය. ඔහු බයික් එක උස්සපං කියා කෑ මොර දෙද්දී මිතුරන් දෙදෙනා බිමට නැමුනේ තම මිත්‍රයා ගොඩ ගැනිමටය. උන් දෙදෙනාටම පහර දී සිතුමා වැඩ පෙන්වන්නට ගියේය. එක් වරක් වීරයෙකු වූ පසු තවත් වැඩ දැමීම මෝඩ කමක් යැයි සිතුමාට තේරුණේ පසුවය. අනංගයාගේ කකුලක් තුවාල වී තිබියදීත් ඔහුගේ මිතුරන් දෙදෙනා සිතුමා අල්ලාගෙන එක් කනේ පහරක් දුන්නේ එලොව තරු පෙනෙන්නටය. හුලං පිරුණු කන් ගුල් අතරන් සිතුම්ට ඇසුණේ එකම දෙයක්ය. “අහු වෙයන් උබ... අහු වෙයන් උබ... අහු වෙයන් උබ... අහු වෙයන් උබ...“

තුන් දෙනෙකුට සිතුමා තනියෙන් නෙලද්දීද අකිලයා සිටියේ බස්හෝල්ට් බම්බුවට හේත්තු වෙලාය. උන් වගේ උන් පොල් පිත්තෙන් කැපිය හැකිය. එහෙත් මිතුරන් අත් හැරිය නොහැක. අකිලයා කීවේ නම් සිතුමාට සිහිය නැති වුණොත් හොස්පිට්ල් ගෙන යාමට තමන් හොද සිහියෙන් සිටිය යුතු නිසා සීන් එකට එන්ටර් නොවූ බවක්ය. සිතුමා දිවි පරදුවට තියා ගේමට එන්ටෑරු වුවත් අනේ තැන්කියූ කීමටවත් කුසුම්ගේ දිව නොනැමුණේය. කෙල්ලකගේ හැම අහු මුල්ලක්ම නැමෙන්නේය. එහෙත් දිව නොනැමෙන්නේය. කිසියම් කාලකන්නි වැඩක් කොට අනේ සොරි මෙයා කීමට නම් දිව නැමෙන්නේ තැන් හතර පහකින්ය. අකිලයාට කෙන්ති ගියේ සිතුමා එක්ක නොවේය. කුසුම් එක්කය. එය නැවත නැවතත් සිතුම්ට මතක් කරන්නට ඔහු පෙළඹුනේය. සිතුම්ට ගාණක් නැතිය. අකිලයා පසුව බුවනෙකයාවද වැඩේට සැට් කර ගත්තේය. ඒ සිතුම් ඉන්නා තැන කුසුම් වැනි කතකට පෙම් බැදීමේ ආදීනව කියා දීමටය.

මුද්දර එකතු කරන කාලයේදී කරපු අමාරුම වැඩේ ලියුම් කවරයෙන් මුද්දරය ගලවා ගැනීමය. දන්නා උන් කවරය වතුරේ දමා මුද්දරය ආරක්ෂිතව ගලවා ගන්නෝය. එහෙව් බැරි එකා දිව හපාගෙන මුද්දරය අමු අමුවේ ගලවන්නට දගලන්නෝය. සිදුවන්නේ මුද්දරය පළුදු වීම පමණක්ය. කුසුම් ගෙන් සිතුම් ගලවා ගත යුත්තේ බුද්ධියෙන් සිතා බලාය. සිතුම් නම් මුද්දරය කුසුම් නම් තැපැල් කවරයේ ඇලවී ඇත්තේ දිවෙන් කෙල ගා නොවේය. රබර්කිරි බාල්දියක එබීමෙන්ය. සිතුම් මැදි කරගත් බුවනෙක සහ අකිලයා මුද්දරය පලුදු නොකර ගැලවීමේ කටයුත්ත ඇරඹුවෝය. සුපුරුදු ස්ථානයේදීය. සිතුම්ලා සැට් වෙන්නේ එතැනය. වල බසින්නේ එතැනය. කොණ්ඩය කපා ගන්නට ගොඩ වදින්නේද එතැනටය. එතැන ගමේ සැලුන් එකය. එළියේ ඇති අබලන් බංකුව උන්ට සෝෆා සැට් එකක්ය. පසෙක වූ ඇට්ටේරියා ගස සෙවන සලසන්නේය. 

“සිතුමා තෝ දන්නවද ඕකි මහ ඇට්ටර බඩ්ඩ..“ ආරම්භය එසේය. එතැන් පටන් අම්මාගේ අප්පාගේ හිස්ට්‍රියද, අක්කාගේ දැගලිල්ලද. අයියාගේ මැර කම්ද ඇට්ටේරියා ගස යට බංකුව මත තබන්නට වූයේ බුවනෙක හා අකිලයා විසින්ය. උන්ට උවමනා වූයේ මුද්දරය ඉරා දැමීම නොව මුද්දය ගලවා ඇල්බම් එකේ දැමීමය. එහෙත් කාලකන්නි මුද්දරය බලන්නේම දෙකට ඉරී යන්නටය. බලු නකුටට ගල් තබා හෝ කෙලින් කිරීම අසාර්ථක උත්සාහයේ යෙදී සිටියේ මිත්‍රයන් දෙදෙනාය. සිතුම් බල්ලාගේ දෙපැත්තෙන් අල්ලාගෙන සිටියේ බුවනෙක හා අකිලයාය.

“බ්‍රාාාාස්“

මහ පාර අයිනේ පෙනෙන දුරින් නැවැත්වූයේ උස ට්‍රේල් බයික් එකක්ය. බයික් එක පැදන් ආ එකා ආම් කට් එකක් ගසාගෙන සිටියේය. පිටු පස එකා දිග රැවුලක් සහිත අයෙක්ය. අතේ වක් පිහියක්ය. දෙදෙනාම හයේ හතරේය. එච්චර උස ට්‍රේල් බයික් එකක සිට කකුල බිම ගාන්නට හැක මට්ටම් උන්ය. බයික් එක පිටුපස එකා එක වරම අඩිය ගසා බැස්සේ ගේමක් නැතුවය. වක් පිහියෙන් බෙල්ල කසමින් ආ හෙතම කලබලයක් නොපෙන්වා ඇවිදගෙන ආවේ සිතුම් සිටින දිශාවටය. ඔහුව අනුගමනය කරමින් බයික් එකේ ස්ටෑන්ඩ් එක ගසා අනිත් පුද්ගලයාද ඒ දෙසට ඇදුනේය.

පෑඩ් ගැලවී යන තරම් සද්දෙට වැදුනු බ්‍රේක් පාර නිසා සිතුම්, බුවනෙක හා අකිලට ඔවුන්ගේ පැමිණිම වෙන වෙනම පෙන්වීමට උවමනාවක් නොවීය. බ්ලෙන්ඩරයට දැමූ පොල් කුඩු මෙන් සිත තුල දස අතේ කැකෑරෙන කුසුම් ගේ සිද්ධියෙන් තිදෙනාම වික්ෂිප්ත වූවෝය. අකිලයා සුපුරුදු නිර්භීත ස්වරූපයෙන් එතැම වූ කෙටි තාප්පයෙන් එහා වත්තට පැන්නේය. බුවනෙකයා දිව ගොස් සැලුන් එකට රිංගුවේය. කොණ්ඩය කපන පුටුව මත හිඳගත් හෙතෙම සැලුන් එකේ අයියාට කියා සිටියේ තමන්ගේ කොණ්ඩය කපන ලෙසය. කිසිත් නොදත් සැලුන් එකේ ඩෑල් එක බුවනෙකයා වැසෙන්නට රෙද්දක් දමා බෙල්ලෙන් ඉහල පමණක් පෙනෙන්නට ඉතුරු කළේය. සිතුමා තනි වූයේය. බයික් එකෙන් ආ දෙදෙනා ලගම එන්නේය. කිසිවක් හිතා ගත නොහැකිව සිතුමා බංකුවට අඩිය තබා ඇට්ටේරියා ගසෙහි අත්තක එල්ලුනේය. එල්ලී අතු කිහිපයක් උඩට නැගුනේ ජීවිතාශාවේ තරම තේරුම් ගනිමින්ය.

බයික් එකෙන් ආ දෙදෙනාගේ කලබලය වැඩි වූ බවක් සිතුම්ට දැනුනේ තම හදවතේ වූ ගැස්මේ තරම වැඩි වූ බැවින්ය. ගසේ අතු සෙලවෙන බවක් දැනුනේය. එය තම හද ගැස්මට සමාන බවක්ද දැනුනේය. වක් පිහියක් අතින් ගත් පුද්ගලයා බංකුව අසලට විත් වටපිට බැලුවේ කිසිවක් සොයනා පරිදිය. අනෙක් පුද්ගලයා ගසේ කඳ අතගා බැලීය. විටක ගසේ මුල පිරික්සීය. ඔවුන් අමු මැරයන් විය හැකිය. උන්ගේ සෝදිසිය උපරිමයෙන්ය. පොලිස් බල්ලන් මෙන්ය. වැටුනු වැලි කැට පවා ඉව කර බලනා තරම්ය. සිතුම්ට චූ බර හැදුනේය. 

වක් පිහිය අතින් ගත් මැර අයියා එක් වනම ගස උඩ බැලීය. මේසය උඩ තැබූ මාළු කැබැල්ල දුටු බලලෙකු මෙන් හෙතෙම සිතුම් දෙස නෙත් හෙලීය. මාළු කැබැල්ල පැහැදිලිය. බලලාද සූදානම්ය. සිතුම් සිත හදා ගත්තේය. මැර අයියා සිතුම් ඇමතීය. වක්පිහියෙන් බෙල්ල කැසීය.

“මල්ලී.. තමුසෙ මොකද ඔතන කරන්නේ..“

“මං.. මේ.. මං.. මං...“

“මං මං නෙවේ අයිසේ.. මේ පිහිය උඩට දාන්නම් පුලුවන්නම් ඔය උඩ හරියෙන් පොතු ටිකක් රැහැලා බිමට දානවකෝ..“

“ඒ.. ඒ මොකටද අයියා..“ සිතුම් මැර අයියාගේ කෝචෝක් එකට පිලිවදන් දුන්නේය.

“රෙද්දක් කියවන්න එපා අයිසේ.. මේ ලෙඩෙක්ට සිංහල බෙහෙත් වගයක් හොයනවා. බැරි නම් කියපං අපි යට හරියෙන් පොතු ටිකක් කපාගෙන යන්නම්..“

** අහවරයි **

Written_by_sAm_8:53pm_04/11/15

Monday, November 2, 2015

ඇට්ටේරියා ගසක බැඳි ආදරය...


දෙකේ පන්තියේදී කෙල්ලෙක් විරිත්තුවොත් ටීචර් ලගට දිව යන සිතුම්ට එදා ලැබුණේ කුමන ශක්තියක්ද යන්න සිය මිත්‍රයන්ටද ගැටළුවක්ය. විස්කිරිඤ්ඤාවක් උඩ විසිකර බිම වැටෙන්නට යන කාලය යම් ප්‍රමාණයක් වේද ඒ කාල ප්‍රමාණය ඇතුලත සිතුම් තුන් දෙනෙකුට බිම වැටෙන්නට තඩි බා අවසන්ය. උන් හයේ හතරේ එවුන්ය. එලෙස කීවේ සිතුම් දස අත නෙලද්දී බස් හෝල්ට් එක අස්සට වී බස් එකක් එනතුරු මෙන් බලා සිටි අකිලයාය. බස් එකක් එනතුරු සිටින්නාක් මෙන් රඟපෑවේ නැති නම් හෙතෙම අද බලා සිටින්නේ හ(ර්)ස් එකක් එනතුරුය. නොඑසේ නම් අකිලයා මේ වන විටත් අවසන් ගමන් ගොස්ය. සිතුම්, අකිල සහ බුවනෙක යනු එකම පොල් ගසේ හනසුය. පිට පොත්ත පමණක්ය. ඇතුලතින් එතරම් වැඩක් නැතිය. එකම පාසලේ එකම පන්තියේ මුල්ලකට වී සිටින තිදෙනාටම කෙල්ලන්ගෙන් කරදරය. තිදෙනාගේම මුවින් හැමදාකම පිට වූයේ එකම වාක්‍ය ඛන්ඩයක්ය. “මේකුන්ට තියෙන විසේ.. මුං කොල්ලන්ට හපන්“ කියාය. 

සිතුම්ගේ සිත තාප්පයට ඇලවූ පෝස්ටරයක් ලෙස ඇලවී තිබුණේ කුසුම්ගේ මුවේය. ඇය සිතුම් දෙස නොබැලුවාම නොවේය. විටක ඈත එන බස් එකකට අප අත දමන්නේ අප යායුතු බස් එක එනවා කියාය. එහෙත් ලඟට ආ බස් රථයේ බෝඩ් එක වෙනස් නම්, යන්නේ වෙන තැනකට නම් අප කරන්නේ බස් එක නොදැක්කා මෙන් සිටීමටය. අත නොදැම්මා මෙන් රැඟීමය. සිතූ හමුවේ කුසූගේත් හැසිරීම එලෙසය. ඇය සිතුම් දෙස බලන්නීය. හදවතට අත දමන්නීය. කළඹන්නීය. එහෙත් සිතුම් ඇගේ සිත මානයේ දැවටෙද්දී ඇය පසකට වන්නීය. එය කාන්තාවන්ට හුරු පුරුදු දෙයක් බව සිතුම්ට කියා තිබුණේ සීයාය. සිතූ ගේ ආච්චී නාන තොටේදී දිය රෙද්ද කඩා නැවත අදින්නේ සීයා දෙස බලාය. ඉන් ෆෝම් වන සීයා ආච්චීගේ පස්සට තට්ටුවක් දමා ඇත්තේ දිය යට සිටියදීය. එහෙත් ආච්චී පෙර පෑ රාගාධික බැල්ම තමා සතු නොවන්නක් මෙන් ගඟ උතුරන සද්දෙන් කෑ ගසා ඇත්තීය. එදා සීයා ගෙදර විත් ඇත්තේ අමුඩය පවා ගඟට පූජා කිරීමෙන්ය. පසු කළෙක සීයාගේ බලහත්කාරකමකින් ආච්චී සීයාට නතු වී ඇත්තීය. එයද පිළිනොගන්නා ආච්චී සිතුම්ට පවසන්නේ ඇය, සීයා ගැන දුක සිතී මේ ගමන ආ බවය. ඒ උදාහරණය සීයා තමන්ට දුන් ආභරණයක් කොට සිතුම් කුසුම් වෙනුවෙන් සැදි පැහැදී සිටින්නේය. එලෙසම ඇය ලඟට යන්නට වාරයක් එනතුරු සිතුම් බලා සිටින්නේය.

සුපුරුදු උදෑසනක්ය. හිරු නැගුනේ නැගෙනහිරින්ය. සිතුම් බස් නැවතුමට ආවේය. කුසුම්ද තාත්තාගේ ෆුට් සයිකලයේ නැගී පැත්තට ඉඳගෙන විත් බැස්සේ බස් නැවතුමෙන්ය. ටියුෂන් යෑමට නිසා දෙදෙනාම පාට ඇඳුමින් සැරසී දෙපැත්ත බලා සිටියෝය. කුසුම් සිතුම් දෙස නොබලන්නේ ගමේ බස් හෝල්ට් එක නිසාය. ඇගේ පියාද ඇය බස් රථයකට නගිනාතුරු වෙනදාට බලා සිටින්නේය. එහෙත් එදා ඔහු ඇය හෝල්ට් එකේ තබා නැවත ගෙවල් පැත්තට හැරුණේය. තමාට උරුම නැති වෙනත් ආදර කතන්දර සිතුම්ට සිහි වන්නේය. වෙන කෙල්ලන් බසයට නඟින තුරුම ඇගේ දෙමාපියන් බලා සිටින්නෝය. ඔවුන් දෙමාපියන්ට සමුදී ගොස් කෙලින්ම ඉඳගන්නේ තම සහකරු අසලය. ඉන්පසු සිදුවන්නේ ක්ලාස් එකේ සර් කියා දිය යුතු පාඩම් මාලාව ඇයට ඔහු විසින් කියා දී නිවසට පිටත් කිරීමය. ඒ සිතුම් දන්නා අන් අයගේ ආදර කතන්දරය. එහෙත් සිතුම්ට ඇත්තේ අනෙකක්ය. බලා සිටීම, බවුන් වැඩීම, හැර අන් දෙයක් සිතුම්ට නොතිබියේය. සුපුරුදු පරිදි අකිලයාද පැමිණ සිතුම් එහා පැත්තේ හිට ගත්තේ සිතුම්ගේ දැහැනට බාධාවක් නොවන පරිදිය.

කුසුම් ඇගේ ලේන්සුව ගෙන නහය වසා ගත්තාය. අකිලයාද ඇඟිලිතුඩින් තම නාස් කුහර සිරකර ගත්තේය. සිතුම් දිගු හුස්මක් ගෙන සෙමින් පිට කළේ සිත සැහැල්ලු කරගෙන කුසුම් දිහා නොනැවතී බලා සිටින්නටය. අකිලට, කුසුම්ට ස්වසනයට බාධාවක් වූ නගර සභාවේ කුණු ටැක්ටරය පරිසරය කලතමින් ඔවුන් පසුකර ගියේය. ටැක්ටරයෙන් බිම වැටුණු තැඹිලි කෝම්බයක් පිටුපසින් ආ වාහනයේ ටයර් එකට යට වී පාරෙන් පිටතට විසික් වුයේය. ඒ සමඟම ආවේ ට්‍රේල් වර්ගයේ බයික් එකක්ය. මෑතකදී පාසල හැර ගිය තරමේ උන් කොල්ලෙකු කුසුම් අසල නතර වූයේය. පසු පසින් ආවේ තවත් බයික් එකක්ය. එහි සිටියේ කලින් බයික් එකේ ආ කොලුවාගේ මිතුරන් දෙදෙනෙක්ය. සියල්ල පසෙකට වී නිහඬව බලා සිටින්නට සිතුම්ට හා අකිලට සිදු වූයේය. ප්‍රථමයෙන් ආ කොලුවා මොනවදෝ මිමිණුවේය. කුසුම් නිහඬය. පාර දෙස බලාගෙනමය. නැවතත් ඔහු කුසුම්ගේ ලේන්සුවෙන් ඇද්දේය. අනෙක් උන් දෙන්නා මහ හඬින් සිනාසෙන්නට වූවෝය. සමහර විකට කතා වලට හිනා යන්නේ නැතිය. එවිට කරන්නේ ප්‍රධාන චරිතය කුමක් හෝ කියද්දී පසුබිමින් හිනා හඬක් කතාවට මුසු කිරීමය. මෙතැනදී ඒ කාර්යය පැවරුණේ කොලුවාගේ මිත්‍රයන් දෙදෙනාටය.

සිතුම් රතු පැහැ වූයේය. අකිල සිතුම් දෙස බැලුවේය. සිතුම් විමසුවේ මොකක්ද බං අතන වෙන්නේ කියාය. අකිලයා සද්ද නැතිය. ඔහු කියා සිටියේ කුමක් වුවත් නොදැක්කා සේ සිටීම තැනට සුදුසු බවය. එහෙත් එය කළ නොහැකිය. තමාට ආදරය නොකළත්, කුසුම් සිතුම් දෙස විටක බලා මදහසක් පාන්නීය. බොහෝ විට බස් එකේදී කොන්දොස්තර ඇය අසලට එද්දී ඇය සිතුම් දෙස බලන්නීය. එවිට හද තුලින් මෝරා එන සෙනහස සිතුම්ට වචන මතක් කර දෙන්නේය. “හරි.. ඒ නංගිට ටිකට් මම ගන්නම්“ ඒ පැහැදිලි වචන කන වැකුණු තැන සිට ඇය නැවත සිතුම් දෙස බලන්නේ බස් එකෙන් බහින විටය. ඒ කෙසේ වෙතත් සිතුම් තවමත් ඇයට ආදරේය. ඇය වෙනුවෙන් ටිකට් පොතක් වුවද මිලට ගැනීමට තරම් ඔහු ඇයට ආදරේය.

සිතුම් ඉදිරියට ඇදුණේය. අකිල අතකින් ඇද්දේ සිතුම් නවතා ගන්නටය. එවලෙහිම බර්ත්ඩේ කේක් එකක් මත තැබූ ඉටිපන්දමක්, බලා සිටින්නවුන්ගේ සුභ පැතුම් ගීත අහවර වෙද්දී “පුහ්“ ගා ක්ෂණීකවම නිවෙන්නාක් මෙන්, කුසුම්ගේ දෑසේ බැල්ම ක්ෂණිකවම සිතුම් වෙලා ගත්තේය. එය අකිලයාගේ දෑත අතැර ඉදිරියට පනින්නට තරම් ගැම්මක් සිතුම්ට ලබා දුන්නේය.

- සිතුම්ට වෙච්ච දේ ඊලඟ පෝස්ට් එකෙන්..

Written_by_sAm_ශ්‍රී_Perera_02/22/15

Thursday, October 29, 2015

සුදුමල් පොකුර කැරකෙන රෝදයට යටවේ...


සිංදු ඇනෝ කියා බ්ලොග්කරුවෙක් සිටින්නේය. මල වදයක් ඇත්තේ උගෙන්මය. පෝස්ට් එකක් දැම්මොත් එතැනට ගැලපෙන සිංදුවක් ඔබන්නේය. අසා ඇති ගීත මෙන්න අසා නැති නාට්‍ය ගීත පවා ගෙනත් කමෙන්ට් කර ගැලපෙන ආතල් එකක් දෙන්නේය. ඒ නිසාම ගීත ගැන යමක් ලිවිය යුතු යැයි සෑමාට සිතුණේය. ගීත කිව්වාම සෑමාට ඇත්තේ භාණ්ඩාගාරයක්ය. ඒ සෑමා හිතං ඉන්න හැටිය. ලොකු සීන්ය. ගම්පහ ගෙට්ටුවේ සෑමා ගොඩ ගියේ ගීතයෙන් ගීතය කරන්නට ගොස්ය. අඩියක් ගැසූ විට භාණ්ඩාගාරය උපරිමයෙන් ඕපන් වෙන නිසා සිංදු හදලා හෝ කිවිය හැකිය. එදා ගීත උපන්නේ අඩිය නිසාය. කුඩා කළ සිටම ගයන්නට බැරි වුවත් ගීත අසන්නට තිබූ ප්‍රියතාවය නිසා ගී පද වැල් සෑහෙන ප්‍රමාණයක් සෑමාට මතකය.



බොහොමයක් ගීත අපට බොක්කට වදින්නේ කොහෙන් හෝ කොනකින් අපේ ජීවිතයට සම්බන්ධ නිසාය. එලෙස සමහර ගීත ලයිෆ් එකේ කොනකට බද්ධ වූ හැටි හා එවන් ගීතවල කික් එක පෝස් එකක් මඟින් සමාජ ගත කළ යුතු යැයි සෑමා සිතීය. ඒ චින්තනය සිත දරාගෙන ගීත එකින් එක මතක් කළ සෑමාට සිතුනේ සියල්ල එක පෝස්ට් එකකට ගැබ් කළ නොහැකි බවය. එනිසා වෙනම කැටගරියකට දමා පෝස්ට් කිහිපයක් ලිවිය යුත්තේ යැයි සිතුණේය. මේ ලියැවෙන්නේ සැමාගේ ලයිෆ් එකේ ටැග් වූ ගීතයන්ය. මොන්ටිසෝරි යද්දී ෂර්ට් එකේ ටැග් වූ හොටු ලේන්සුව මෙන් ලයිෆ් එකේ එදා මෙදාතුර ටැග් වූ ගීත ගැන මෙලෙස ලියැවෙන්නේය.

අද මෙන් එදා හාඩ් ඩිස්ක් නැතිය. සීඩී නැතිය. තිබුණේ කැසට් පීස් පමණක්ය. බොහොමයක් ඔරිජිනල් ඒවා පට්ට ගසා ඒ උඩින් එෆ් එම් නාලිකාවල යන ගීත රෙකෝඩ් කරන්නේ නිවසේදීමය. කැසට් පීස් එකේ උඩ පැත්තේ ඇති ප්ලාස්ටික් කැබැල්ල කැඩූ විට පීස් එකේ කිසිවක් රෙකෝඩ් කළ නොහැකිය. එලෙස කරන්නේ ඔරිජිනල් එකේ ආරක්ෂාවටය. එසේ කැඩුණු ඒවාට කඩදහි කැබලි ඔබා නැවත රෙකෝඩ් කළ හැකි පරිදි සකසා ගත හැකිය. ටේප් කැඩුණු ඒවාද සෙලෝ ටේප් කර නැවත භාවිත කෙරෙන්නේය. ඒවා ඉන්පසු භාවිත කළ යුත්තේ ඉතා පරිස්සමෙන්ය. නැවත කැසට් පීස් එක FF ෆාස්ට් ෆෝවර්ඩ් හෝ RW රිවයින්ඩ් කරද්දී හෝ එතැනින් කැඩී යා හැකිය. එහෙමත් නැවත කෙළ වුණහොත් ටේප් එක එළියට ඇඳ දමා ගලක් එක් කෙලවරක ගැට ගසා ගල් මාට්ටුවක් ලෙස ගසකට පැටලීම සිරිතය. එලෙස පැටලුණු සුළඟට හෙල වෙද්දී දැනෙන්නේ මාර ආතල් එකක්ය.

සෑමාගේ ගෙදර කැසට් පීස් සැට් එකක් තිබුණේය. ඒ අතර අම්මා ගත් ඒ කාලේ ජනප්‍රිය වූ ගීත සහිත කැසට්ද තිබුණේය. සෑමාට හොඳටම මතක ප්‍රින්ස් උදය ප්‍රියන්තගේ “සුදුමල් පොකුරක්“ ගීත සැට් එක තිබූ කැසට් එකය. අතුලගේ සැනසෙන් නැලවෙන්න සුදෝ කැසට් පීස් එකද තිබුණේය. අපි ඒ කාලේ පිංකාට කියන්නේ ඒ සිංදුවය. පිංකා කියන්නේ පුංචීටය. අම්මාගේ නංගීය. අම්මාගේ නංගී අපට පිංකාය. පිංකාට අපෙ අම්මා කිව්වේ “සුදෝ“ කියාය. ඉතිං පිංකාට තද වූ විට “සැනසෙන් නැලවෙන්න සුදෝ...“ කියූ විට තවත් මලය. ඒ කැසට් පීස් අම්මා දිවි හිමියෙන් සුරැකියේය. මන්ද අපි ඊට උඩින් අපේ ආරයේ සිංදු රෙකෝඩ් කරන නිසාය. අපේ ගෙදර කැසට් සැට් එකේ පීස් දෙකක් දැමිය හැකිය. A එකෙන් ප්ලේ කළ හැකි අතර, B එකෙන් ප්ලේ කිරීම හා රෙකෝඩ් කිරීම යන දෙකම කළ හැකිය. එහි වටිනාකම වූයේ කාගේ හෝ කැසට් එකක් සැට් වුණොත් ඉන් කොපියක් ගසා ගැනීමට හැකි වීමය.

අපි කැසට් රේඩියෝ එක දාගෙන ඉන්නා විට අම්මා බලන්නේ B එකේ හෙවත් රෙකෝඩ් කරන පැත්තේ කැසට් එකක් තියෙනවාද කියාය. ප්ලේ කරන්නට එක බට්න් එකක් එබිය යුතු බවත්, රෙකෝඩ් කිරීමට බට්න් දෙකක් එබිය යුතු බවත් ඇය දන්නීය. නඩුව පත්තු වෙන්නේ බට්න් දෙකක් ඔබා ඇති විටකය. ඒ නිසා සෑමා බොහෝ විට පරණ කැසට්වල රෙකෝඩ් කරද්දී පවා බට්න් සැට් එක වැසෙන්නට යමක් තබන්නට උත්සාහ කළේය. නැති නම් වන්නේ බැනුම් කෝටියකට එකක් වැඩියෙන් අසන්නටය. තත්වය මෙසේ තිබියදී දිනක් සෑමා අම්මාට අතේ මාට්ටු වූයේය. ඒ ප්‍රින්ස්ගේ සුදුමල් පොකුරක් කැසට් පීස් එකේ සිංදුවක් රෙකෝඩ් කරමින් තිබියදීය.

රේඩියෝවේ එෆ්.එම් එකක වාදනය වුණේ අපූරු ගීතයක්ය. ගීතය තවත් දුර යන්නට නොදී රෙකෝඩ් කර ගත යුතුය. ඒ සඳහා කැසට් පීස් සෙවීමට කාලයක් නොතිබුණේය. සෑමා කලබල වී රෙකෝඩ් කරන කොටස ඇතුලේ තිබූ කැසට් පීස් එක උඩින්ම සිංදුව රෙකෝඩ් වෙන්නට දැම්මේය. රෙකෝඩ් වෙන අතරතුර බැලූ කළ ඇතුලේ තිබුණේ සුදු මල් පොකුරක්ය. පීස් එකේ මුලන්ම යන්නේද ඒ ගීතයමය. පිය ගුණ ගීයක්ය. අම්මාට මාට්ටු වුණොත් බඩුය. එහෙත් සිංදුවට දැනටමත් කෙළවී ඇති බව ෂුවර් නිසා සෑමා හිත හදා ගත්තේ දැන් රෙකෝඩ් වෙන ගීතය අවසන් වූ පසු කැසට් පීස් එක පැත්තකින් තබා මාරු වෙමි කියාය. සිංදුව අහවර වෙන්නට මොහොතක් තිබියදී අම්මා බට්න් දෙකක් ඔබා තිබෙනු දැක සෑමාට කෑගැසුවේය.

“මොකද මොකද මේ බට්න් දෙකම ඔබලා..“ කියද්දීම සිංදුව අහවර විය. සෑමා ක්ෂණිකව රෙකෝඩින් නැවැත්තුවේය. දැන් වැඩේ ලෙසටම සැට් වී ඇත. අම්මා පෙරැත්ත කළේ දැන් ප්ලේ කරලා පෙන්නපං කියාය. නැවත මුල් තැනට ගැනීමට පීස් එක රිවයින්ඩ් කළ සෑමා හිත හදාගෙන ප්ලේ බට්න් එක එබුවේය. මියුසික් එක අපුරුය. ගීතය පටන් ගත්තේය.

කැරකෙන රෝදේ පුංචි කරත්තේ
ඉඳගෙන මම ඉන්නේ
පදික වේදිකා පසු කර යන්නට
තල්ලු කරන් පුතුනේ

කැඩුණු පාවහන් කුඩ නිමවාලා
දවසේ වියදම සරි කරවාලා
අඳුර වැටෙන්නට කලියෙන් ගෙදරට
තල්ලු කරන් පුතුනේ

කිරි කැටි දෙ අතේ සවි බල දියවේ
පමා වුණොත් අප මහ මග තනි වේ
අම්මා මග ඇති නෙත් හරවා ගෙන
තල්ලු කරන් පුතුනේ

ගීතය එඩ්වඩ්ගේය. අම්මා සද්ද නැත. ප්‍රින්ස් ගේ සුදුමල් පොකුරට කෙළ වූ බව අමතකය. රෙකෝඩ් වූ ගීතයද අවුලක් නැතිය. අම්මාට මතු වූයේ එකම ගැටළුවක්ය. 

“අයියෝ අන්තිමට මම කෑගහපු ටිකත් රෙකෝඩ් වෙලානේ.. ඒකත් නැත්තම් නියමෙට තියෙනවා“

Written_by_sAm_ශ්‍රී_Perera_7:06pm_29/10/15

Monday, October 26, 2015

අම්මා මොනවාද අපිට කළේ ?? - “පෝයට එකක්“


http://www.pinsiri.com/wp-content/uploads/2012/11/Amma1.jpg


“අම්මා මොනවාද අපිට කළේ ??“

අවසන අසන්නේ එපමණය. කුසට ආ දා සිට දහදුක් විඳ තැනකට එන්නට මඟ පාදන්නේ ඈය. ඉන්පසු ඇය වෙනුවෙන් වෙලාවක් නැති පුත්‍රයෝ, දියණියෝ, ඇය තමන් වෙත දැක්වූ අවධානය නොදක්වන්නෝය. ලෙඩකට දුකකට බෙහෙත් ගැන්මට යාම මොහොතකින් හෝ පමා කරන්නෝය. ඒ තමන්ගේ කාර්යය බහුලත්වය නිසා බව කියන්නෝය. තමන් කුඩු කළ ලෙඩකවූ විටක ඇය තමන්ව රැගෙන ගියේ එම මොහොතේමය. ඇය එකී කාර්යය කල් නොදැමුවාය. 

“අම්මා මොනවාද අපිට කළේ ??“

ඇය ඔබට උගන්වන්නීය. ඇය ඔබේ සහෝදරයන්ට, සහෝදරියන්ට උගන්වන්නීය. එක ලෙසම සියලු දෙනා ඉල්ලනා දේ ලබා දෙන්නීය. ඒ ඔවුන් ඔවුන්ගේ ඉගෙනීමේ අවශ්‍යතාවයන් මතය. අවශ්‍යතාවයන් විවිධ වුවද ඒ සියල්ල එක ලෙස ඉටු කරන්නීය. ඉන් අයෙක් අධ්‍යාපන මට්ටමින් පරතෙරටම යා හැකිය. අයෙක් අතර මැද ඇන ගන්නට පුලුවන්ය. පසුව විවිධ වෘත්තීය මට්ටම් වලට වැටෙන්නෝය. අදායම් මට්ටම් විවිධ වන්නෝය. ඉන් ඉක්බිති සමාන අයිතිවාසිකම් ඇතිව, අවශ්‍යතාවයන් සමානව සැපුරුණු බව අමතක කළ ඇත්තෝ ප්‍රශ්න කරන්නෝය.

“අම්මා මොනවාද අපිට කළේ ??“

ඔවුන් වැඩිවියට පත්ව විවාවන්නෝය. දරු මල්ලන් හදන්නෝය. ගෙවල් දොරවල් හදන්නෝය. විටෙක ඉඩම් කඩම් මිලට ගන්නෝය. ඉන්නට ඉඩමක් නොලද්දෝ ප්‍රශ්ණ කරන්නෝය. ගෙවල් නොලද්දෝ, හැදූ නිවසට අම්මාගෙන් උපකාර නොලද්දෝ ප්‍රශ්ණ කරන්නෝය, දරුමල්ලන් බලන්නට උදව් නැත්තෝ ප්‍රශ්ණ කරන්නෝය, උක්ත සියල්ල නොපිරිහෙලා ඉටු කළද ප්‍රශ්න කරන්නෝය.

“අම්මා මොනවාද අපිට කළේ ??“

විටක ඔහු ලබන්නේ හොඳ බිරිදක්ය. විටක ඔහු ලබන්නේ නපුරු බිරිදක්ය. විටක ඇය ලබන්නේ හොඳ සැමියෙක්ය. විටක ඇය ලබන්නේ නපුරු සැමියෙක්ය. තමන්ගේ බිරිඳ ඇගේම අම්මාට සලකන්නේ නම් ප්‍රශ්න අඩුය. තමන්ගේ ස්වාමියා ඔහුගේම අම්මාට සලකන්නේ නම් ප්‍රශ්න අඩුය. ඔවුනොවුන් මාතෘ, පිතෘ උපස්ථානයේ වටිනාකම දන්නෝය. ඔවුන්ගේ එම කර්තව්‍යයට බාධා නොකරන්නේ නම්, ඇය හෝ ඔහු හෝ ඔබේ දෙමව්පියන්ට සලකන්නේද දෙවරක් නොසිතීමෙන්ය. කොටින්ම කිවහොත් ඇය ඇගේ අම්මාට සලකන්නේ නම්, ඇය අනලස්ව ඔබේ මවට එනම් ඇගේ නැන්දම්මාට සලකන්නීය. ඔහු ඔහුගේ අම්මාට සලකන්නේ නම්, ඔහු අනලස්ව ඔබේ මවට එනම් ඔහුගේ නැන්දම්මාට සලකන්නීය. තම සහකරුට, තම සහකාරියට තමන්ගේ අම්මාගේ වටිනාකම නොහැඟේ නම් ප්‍රශ්න කරන්නේද මෙලෙසමය.

“අම්මා මොනවාද අපිට කළේ ??“

ඔවුන් දරුවන් ලබන්නෝය. ඔබේ දරුවන්ට මෙන්ම සොහායුරු, සොයුරියන්ගේද දරු මල්ලන්ද ඇය හදා වඩා ගන්නීය. එක ලෙසම ආදරය දක්වන්නීය. මුලින්ම උපන් පුංචි එකාගේ සිට අලුත උපන් පුංචි එකා දක්වාම ආච්චී දක්වන්නේ එකම ආදරයක්ය. මුලින් උපන් පුංචි එකාට කළ හරිය, අන්තිම එකාට කරද්දී බෙහෝ අයට අමතක විය හැකිය. අපිට නොකළ තරම උන්ට කරනවා යැයි හැගෙන්නේය. නැවතත් ප්‍රශ්න කරන්නේය. එහෙත් ඇය නිහඬය. ඇයි පිළිවදන් නොදෙන්නේ ඇය කළ තරම ඇය මෙන්ම සමාජයද දන්නා නිසාය. එහෙත් ප්‍රශ්නය නොනැවතී නැගෙන්නේය.

“අම්මා මොනවාද අපිට කළේ ??“

පිම්මේ දුවන ඇය එක වර නවතින්නීය. උණුසුම් වූ ලය විටක සිසිල් වන්නේය. හතිලමින් නොනැවතී දිවූයේ එකෙකු නිසා නොව හැම දෙනාම නිසා බව පසක් වන්නේය. එදා දුටුවේ උන්ට කළ හරිය මිස තමන්ට කළ හරිය නොවේය. තමන්ට කළ බව දැනෙන්නේද එදාටය. එහෙත් ප්‍රමාදය. කළ යුතුව තිබුණේ තමන් ලද හරිය සිහිපත් කර ඇයට තුති පිදීමය. එහෙත් ඇයට ඒ සතුට ජීවමානව ලබා නොදුනේ ඔබය. නැතිනම් අම්මා පුතා, අම්මා දුව, අතර බාධකයක් වූ ඔබේ සහකරු හෝ සහකාරියය. නැතිනම් කිසියම් හෝ සාධකයක්ය. උණුසුම් වූ ඇය ලඟ තුති පුදන්නට නොහැකිව, වචන අහිමිව, සුසුම් හිරවී හැඬුවාට පලක් නැතිය. හුස්මක් නැති ඇය ලඟ වකුටු වී තමා වෙනුවෙන් කළ කී දෑ ගණන් කළාට වැඩක් නැතිය. ඇය කළ හරිය ඇයට මතක් කර තුති පුදන්නට ඔබ ප්‍රමාද වැඩිය. එහෙත් ඔබ ඇය වෙනුවෙන් නොකළ ගුණ වැයීමේ ලැජ්ජාව වසා ගත යුතුය. නැවතත් ඇසිය යුත්තේ..

“අම්මා මොනවාද අපිට කළේ ??“


Written_by_sAm_ශ්‍රී_Perera_11.07pm_26/10/15

Thursday, October 22, 2015

මගේ පද සැරයි... - My Thoughts, So Hot !!!


තල දිගේ නලල්
ඇඳි ඇඳී තෙපුල්
පියන් ඇස් තදින්
සිඹිමි මං හොරෙන්

තෙපුල් මත වෙලී
උරහිසේ ගැටී
පපුතුරේ ඇඳී
කලබලෙන් විදී

ලැම මතින් මිදී
උදරයේ හිදී
නාභියේ තුඩේ
පොපියමින් ලගී

සිහින් ඉන කෙලවරේ
දෙපා යුග අතරෙහී
රස ගඟුල් ඇහිරුණේ
සිහින් තොල් මැතිරුණේ

අසනි වැසි ඇඳ වැටී
අහස් කුස ගිගුරුවේ
මුළු රැයම තෙත් වුණේ
මල් යහන බීරිමේ..

Monday, October 19, 2015

ක්ලබ් කතාවක්... - A Club Story !!!


අද කාලේ ක්ලබ් එකක් කිව්වාම මතක් වෙන්නේ හොඳට බොන ඒවාය. නටන ඒවාය. ආතල් ගන්නා ඒවාය. කොටින්ම කිව්වොත් නයිට් ක්ලබ්ය. වැඩි මුදලට බියර් බොන්න ඒවාය. වැඩි මුදලට අඩියක් ගසන ඒවාය. සැපක් ගන්නට ගොස් වැඩි මුදලකට කෙලවා ගන්නා ඒවාය. ඩාන්ස් කරන්නට ගොස් පදම වැඩි වී කකුල් හතරෙන් එන ඒවාය. මොක කිව්වත් අතේ සල්ලි වැඩි නම් ජනතාවට ආතල් ඒවාය.

ඒ කෙසේ වෙතත් ඉස්සර නම් ක්ලබ් කිව්වොත් ඇත්තටම සැපය. මුලින්ම සිහිවන්නේ ස්පෝරට් ක්ලබ්ය. බැට්, බෝල අනිවාර්යෙන් තිබෙන එවන් ක්ලබ් එකල්හි තරුණ ජනතාවගේ සෙට් වෙන තැනය. කැරම් බෝඩ් ද අනිවාර්යය අංගයක්ය. ක්‍රිකට් ගසන්නට සැට් වී හදිසි වැස්සක් වැටුනොත් ඉන්ඩෝ(ර්) හෙවත් ගෘහස්ථ ක්‍රීඩාවක් ලෙස කළේ කැරම් ගසන එකය. එතැනින්න එහාට කාඩ් පැක් එකද එවන් ස්පෝර්ට් ක්ලබ් වල නැතිවා නොවේය. ජාත්‍යන්තර ක්‍රීඩාව ඕමිය. ඕමි බැරි උන් දිග ඇර ගන්නේ කැරම් බෝඩ් එකය. ෂොට් නොදන්නවා වුවද ඩිස්ක් එකෙන් ගසා අනුන්ගේ ඉත්තෙක් හෝ වලට දැමීමට හැකි උන් සිටීම කැරම් බෝඩ් එකෙහි ජීව ගුණය රඳවා ගැනීමට හැකි වූ එක් කරුණක්ය. උක්ත ක්‍රීඩා සියල්ල හැරුණු කොට ඉදහිට හෝ අඩියක් පුඩියක් ගැසීමද ක්‍රීඩා සමාජයේ, ස්පෝ(ර්)ට් ක්ලබ් එකේ අනිවාර්යය අංගයක්ය.

http://pachagune.blogspot.com/2011/06/blog-post_29.html

සෑමාගේ ගමේ පැරණිම ස්පෝර්ට් ක්ලබ් එක ගාමිණී ක්‍රීඩා සමාජය විය යුතුය. පරම්පරා ගණනක් අතින් අත මාරු වූ එම ක්‍රීඩා සමාජය තවමත් තිබෙනා බව සිහිවන්නේ වෙසක් කාලයටය. ඒ ඔවුන් සැට් වී දෙන දන්සැල නිසාය. ගාමිණී ක්‍රීඩා සමාජයට නම ලැබුණු හැටි සෑමා නොදන්නේය. එහෙත් ක්‍රීඩා සමාජය එකල්හි බොහෝ දුරට සක්‍රියව තිබූ බව සෑමා දන්නේය. ඊට හේතුව සෑමාගේ පියා හෙවත් කේ.ඒ.ඩබ්ලිව් පෙරේරා මහතා එහි විවිධ තරඟවලට සහභාගිවී ලද කුසලාන තවමත් නිවසේ ඇති නිසාය. එදා ක්‍රීඩා සමාජවල ක්‍රිකට් වලට වඩා තැනක් තිබුනේ එල්ලේ වලට බව සහතිකය. එසේම දුවන, පනින, පිහිනන තරඟ පවා සරුවට තිබී ඇත්තේය. කෑලි පස්සේ පන්නන උන්, සරුංගල් පස්සේ දුව උන් නිසා මැරතන් වලට නිසි පුහුණුවක් ලැබී ඇත්තේය. වැටවල්, කඩුලු, හොර පොල් කැඩිලි, කොටු පැනිලි වගේ ඒවා සරුවට තිබී ඇති නිසා පනින උන්ද, කෑලි නානවා බලන්න යන උන් ඇලේ, දොලේ, ගඟේ කෙල්ලන්ට පේන්න වැඩ දාන නිසා පිහිනීමද ප්‍රගුණ කර ඇත්තා සේය.

තත්වය එසේය. සෑමාට මෑත අතීතයේ මතක මහප්පලෑ නිවසේ තිබූ ක්ලබ් එකය. තිබුණේ ක්‍රීඩා දෙකක්ය. එකක් කැරම්ය. අනෙක ඕමිය. බෝඩ් එක ලැබී තිබුණේ සෑමාගේ අයියා ක්‍රීඩා සමාජයකට එකතු කළ බඩු නිසාය. ඊටත් කලින් පරම්පරාගත කැරම් බෝඩ් එකක් තිබුණේය. චැම්පියන් එකක් නෙවේය. ඒත් පරම්පරා ගාණක් ගැසූ පාරවල් නිසා බෝඩ් එක පට්ට පොලිෂ්ය. වල ලගින් තිබූ සැනින් ඇතුලට යන්නේ සුරුස් ගාලාය. වල වටේ පිත්තල ෆ්‍රේම් එකක්ය. වලවල් නම් ඉරී තිබුණ නිසා පරණ මේස් කුට්ටම් අල්ලා තිබුණේය. කැරම් ගසන්නට හතරක් ඉඳගෙන සිටියදී ඕමි ගසන්නටද හතරක් සිටින්නෝය. ඒ තරමට ක්ලබ් එක නැගලා ගියේය. තේ වතුර, බිස්කට්, අරවා මේවා සියල්ල ලොකු අම්මා ගෙන්ය. ක්‍රීඩා කරන අට දෙනා හැරෙන්නට තවත් සැට් එකක් පරාද වෙන උන් නැගිටන තුරු වටේට වී සිටින්නෝය. ඒ තරමට ජනතාවක් ක්ලබ් එකේ සිටියෝය. පට්ට ආතල්ය. මැච් එකක් තිබුණත් බලන්නට සැට් වෙන්නේ එහේය. සරලව කියන්නට ඇත්තේ අන්න ආතල් කියා පමණක්ය. ඒ ආතල් දැන් නැති පොඩි උන් පව්ය. ඒ ආතල් ආයෙත් නොඑන අපි ඊටත් වඩා පව්ය.

සෑමාට ක්ලබ් ගැන මතක් වූයේ සමීපතම මිතුරෙක් නිසාය. උන්ට නම් ආතල්ය. ඒ උන්ට තාමත් ක්ලබ් එකක් තියෙන නිසාය. හවසට, සති අන්තයට කස්ටිය සැට් වී කැරමක් ඕමියක් ගසන නිසාය. ක්‍රිකට් ගසන නිසාය. දිනක් මිතුරාගේ නිවසට යන අතරමග කොල්ලෝ සැට් එකක්ය. ඉඩමක් මැද, පාළු තනි ගෙයක්ය. ඒ වටේ කොල්ලෝ සැට් එකක්ය. මා සිටියේ උගෙ වාහනයේය. මග නවතා උන්ට සැලයුට් දමා හවස එන්නම් කියාගෙන ගිය අපේ එකා හඬ අවදි කළේය. “ඒ අපේ ක්ලබ් එක බං“ එතැන් සිට ක්ලබ් කතාය. ආතල් ඒවාය. ආතල්ම එක කීවේ එදා නොවේය. පසු දවසකය. මෙතැන් සිට සෑමාගේ මිත්‍රයා සුජීය. මෑතක සිට උගෙ කාඩ් එක සුජී වූයේද අර “සුජී“ ෆෝන් කෝල් එක නිසාමය.

සුජියා දිනක් ක්ලබ් එකේ තවත් එකෙක් සමඟ අඩියක් ගසන්නට ගොස් ඇත්තේය. පොඩි අඩි නොතබන සුජියා සුපුරුදු පරිදි තඩි අඩියක් ගසා අඩි පොලේ ගසමින් පැමිණ ඇත්තේය. සුජියා පොඩියට අඩියක් ගසන්නට සෑමා සමඟ තවත් 4 දෙනෙක් සමඟ ගිය විදිහ සෑමාට තවමත් මතකය. එදාද බියර් පොඩි අඩි ගසා බිල ආවේ මහ ගාණක්ය. අහවල් දෙක උකස් නොකොට බේරිලා ආවේ එතැන සිටි නොබොන එකාද සම්මාදම් කරගෙනය. කෙසේ හෝ සුජියා මිත්‍රයා සමඟ ගෙදර එමින් සිටියදී සුපුරුදු පරිදි ක්ලබ් එකේ සෙනඟය. ජනතාවට ආචාර දක්වා සුජියා ක්ලබ් එකේ ජනතාවගෙන් ඇසුවේ “මොකෝ වෙන්නේ“ කියාය. උන් නොකියා කීවේ බූරු ගසනවා කියාය. සුපුරුදු පරිදි සුජියා “හරි මචං එන්නම්“ කියාගෙන පිටත් වී ඇත්තේ මිතුරාද සමඟය.

සුජීගේ නිවස වටේම පාරය. එක පැත්තකින් ඇතුල්ව අනිත් පැත්තෙන් යා හැකිය. තරමක වටයක් ගැසිය යුතු වුවත් වාහනය හරවන්නේ නැතිව වටෙන් යන්නට ලැබීම සහනයක්ය. සුජියා තම මිතුරා සමඟ ක්ලබ් එකේ උන්ට දොස් කියන්නට වූයේය. 

“බලපං මෙහෙම චාටර් වෙනවද බං, ගමේ උන් දැන ගත්තොත් ක්ලබ් එක වහන්න වෙන්න.“

“සිරාවට, මුන්ට තේරෙන් නැද්ද, ඕව අපිට ගැලපෙන වැඩ නෙවේ යකෝ“ සුජීගේ මිතුරාද පොහොර දමන්නට විය.

“කාඩ් පැක් එකක් තියන් ඕමි ගැහුවට කමක් නෑ බං. සල්ලිවලට බූරු ගහන එක ..? අපි ගමේ පිළිවෙලකට ඉන්න කොල්ලෝ. ක්ලබ් එකේ උන් කියලත් එහෙමට චාටර් උන් නැහැනේ බං. ඕවට ගියාම අපිටත් කෙලවෙනවා.

“ඒක ඇත්ත බං. මාව ඔතනින් දාපං. මම ගෙදරට පයින් යන්නම්.“

“එල කිරි.. මාත් මෙහෙම්ම ගිහින් නිදා ගන්නවා බං..“

එදිනම නැවත යලි හමු නොවනට වෙන්වූ දෙදෙනා සමුගත්තෝය. මිතුරා මඟ අතැරියා සුජියාට නිවසට යනවාට වඩා ක්ලබ් එක පැත්තට යන්නට සිතුනේ බූරුවා ගසා කීයක් හෝ එකතු කර ගැනීමටය. මිතුරා මගින් බැස්ස නිසා නැවත ඒ පාරේම යෑම ඉල්ලං කෑමක් නිසා සුජියා කළේ වට රවුමෙන් නැවත ක්ලබ් එකට සැපත් වීමය. ක්ලබ් එකේ ෆුල් හැපනින්ය. සැට් එකම වටවී බූරු ගසන්නෝය. අඩියක් පුඩියක් ගසා සිටි සුජියාට ක්ලබ් එකේ උන් පට්ට වෙල් කම් චියර් එකක් දුන්නෝය. එහෙත් ඒ අස්සේ සිටි එකෙක් සද්ද නැතිව බිම බලා සිටියේය. සුජියාටද ඔහු දෙස බැලුවේය. ඔහුද හිස ඔසවා සුජියා දෙස බැලුවේය. දෙදෙනාගේ ඇස් යා වී විනාඩි කිහිපයකට පෙර දෙබස් යලි සිහි වූයේය.

තමා මඟ හලා ගිය සූදුවට අකැමැති මිත්‍රයා තමාටත් පෙර ක්ලබ් එකට ඇවිත්ය.

ගෙදර ගොස් නිදා ගන්නවා යැයි කියූ සුජියා මිත්‍රයාට පසුව ක්ලබ් එකට ඇවිත්ය.

සුජියා රැගෙන ආවාට වඩා මුදලක් කුදලාගෙන ගියේත්, සුජියාගේ මිතුරා තුන් හතර ගුණයක මුදලක් කුදලාගෙන ගියේත් ඔවුන් සූදුව කෙරෙහි ඇති අපරිමාණ අකැමැත්ත නිසා සහ ඒ කෙරෙහි ඇති නොදැනුවත් කම නිසා බව කිව යුතුමය.

Written_by_sAm_ශ්‍රී_Perera_11:35pm_19/10/15

Sunday, October 18, 2015

බ්ලොගට වෙච්ච දේ... - What Happened to the Blog !!


අද නම් ලියනවමයි බ්ලොගක්.

මොනවද ලියන්නෙ තියෙන්නේ ?

අරූගෙ බූරුව ගහන්න ගිය කතාව,

අහ් ඒක මරු...

විලි ලැජ්ජ නැතුව ලියන්න පුලුවන්ද ආයෙත්..?

ඇයි බැරි ?? 

කතා සැට් එකක්ම තියෙනව නේ...

මතක් කර කර පෝලිමට ලියල දානවා. 

ඉස්සර නම් සතියට කතා තුනයි. සොරොව්ව කැඩුණොත් කතා ඊටත් වැඩිය.

කමක් නෑ සතියට එකක් වත් දානවා...

ඉරිද නේ.. උදේම එකක් ලියල දාන්නෝනි..

ඔව්.. බූරුව ගහපු කේස් එකෙන්ම පටන් ගන්නවා..

එලකිරි...

ගූගල් එකට sign in වෙලාම ඉන්න හින්ද අවුලක් නැහැ. නැත්තං බ්ලොගට වෙන පාස් වර්ඩ් තිබ්බ නම් ඒකත් මතක නැහැ.

ඔව් අලුත් පෝස්ට් එකක්..

සිලෙක්ට් කරලා ලියන්න ගත්තා වචන පනහක් විතර..

“බබා...“

ඇහුනෙ නැහැ වගෙ ඉන්නෝනි. නැත්තං ලියන්න වෙන්නෑ...

“ඇහුනදෝ....“

දැන් නම් කතා කරන්නම වෙයි.. ලඟට ආවොත් කෝමත් ඉවරයක් නැහැ...

“ඇයි ??“

“පාන් රාත්තලක් ගේනවද?“

විනාසයි. ඇහුන්නෑ වගෙ ඉන්න බෑනේ...

මුකුත් නොකියා නැගිට්ටා, පර්ස් එක හෙව්වා ඒකත් මිසින්..

මේසෙ උඩ සල්ලි. අතට අරන් ගියා...

“ම්හ්.. මෙන්න...“

මේසෙ උඩ පාන් රාත්තල. පැත්තක ලැප...

“ලියන්නෝනි බ්ලොගට වෙච්ච දේ... “



Written by sAm_ශ්‍රී_Perera_7:32am_18/10/15

Sunday, June 28, 2015

පායලා දේදුන්න.... - Unexpected Rainbow !!





ටියුන් වෙන අතර පොඩි රේඩියෝ කට්ටා
ඇසෙනා ගීතයක මගේ හිත හිට්ටා
ඉපැරණී ගීතයම ගයන්නේ වික්ටා
ලියන්නට සිත් වුණේ කවක් මට පට්ටා


 කුරුල්ලට ගී ගයන්න තනන්නේ වික්ටා
කුරුල්ලා ගේ (gay) දැයි නොදන්නෙමි ගැත්තා
ගීතය ගයන්නට ඇගේ හඬ ඉල්ලා
"දේදුන්නට හැඩය දෙන්න නෙත් බැමිත්" ඉල්ලා


අපූරුයි පද වැලම අවසනින් කොඳුරා
හැපි හැපී ඉල්ලයි ඇගෙන් ඔහු ඉඳුරා
මොක වුනත් කමක් නැත වටේටම දීලා
"එපා මැණික සිත පමණක්" කාටවත් දෙන්ටා


සුන්දරයි සම්මතයි කොල්ලෙකුයි කෙල්ලෙකුයි
බැදෙයි ප්‍රේමෙන් ලොවට අරුමයක් නොම වෙයි
දේදුන්න ගැන කිව්ව ගීයෙ පද සිහිවෙයි
පාන්දර බුකියම දේදුන්න වාගෙයි


නොදන්න උන් රැල්ලකට අසු වෙලා
දේදුන්නෙ පාට මැද තම රූපෙ දමාලා
දන්න උන් තමන්ගේ කට සද්ද වසාලා
පැත්තකට වී මේක ආතල්ද අසාලා


ගේ සීන්, ලෙස් සීන් කමක් නැත කියාලා
ආදරේ තිබේ නම් කමක් නැහැ නේ ඩලා
කෙල්ලෙක්ට බැදි තැල්ල තම අතින් ගලෝලා
කොල්ලෙක්ට බඳින්නේ තෝ කෝම අසාලා


වැල සයිට් අහු මුල්ල පීරමින් ගිය එවුන්
ආප්පේ කැටගරිය පුල පුලා බලපු උන්
කෙල්ලෙක් කෙල්ලෙක්ගෙ නලලෙ බැදි තැල්ල රන්
වැරදීද ? හරි නැද්ද ? අහපු හැටි සමාජෙන්


දැන නොදැන දේදුන්න දාගත්ත උන්දෙලා
හවසකට සමූපෙට ගොඩ වෙන්න ගිහිල්ලා
වෛයි වර්ණ දේදුන්නෙ පාට ඇත සැගවිලා
විවිධ සේවා දෙන්න උන් ඇත්තෙ පෙළඹිලා



Written_by_sAm_ශ්‍රී_Perera_2:05pm_28/06/15

පලි - ලංකාවේ බහුතරය ඇමරිකානුවන් බව සමාජ ජාලා වෙබ් අඩවි වලින් දුටු නිසා සමූපකාරයේ දේදුනු පැහැය දැක අපේ දේ අගයන්නට පද බැදි කයියකි.

Thursday, June 25, 2015

අම්ම ගහයි බැට් එකෙන්.. - Mother will Punish from a Bat !!


කාලයෙන් කාලයට අලුත් වාක්‍යයන් එන්නේය. ඉස්සර කාලයක් කිව්වේ “අම්මා ගහයි බැට් එකෙන් කියාය.“ බැට් එක එන්නට ඇත්තේ ක්‍රිකට් එල්ලේ පටන් ගත් කාලයේ විය හැකිය. නැත්තම් අම්මා ගහන්නට ඇත්තේ කොස්සෙන්, ඉදලෙන් හෝ ඉලපතින් විය හැකිය. ඉස්සර බත් බෙදන කෑම බෙදන වෙලාවක නම් සෑමා, අයියා හෝ අක්කා, වලියක් දා ගත්ත හොත් අම්මා පොල් කටු හැන්ද දික් කළාය. ඉන්පසු කියන්නේ “කට වහපල්ලා, නැත්තං හැන්ද යවනවා ගිරිය දිගේ..“ කියාය. කවදාවත් ගිරිය දිගේ හැන්දක් ගොස් නැති බව දන්නා අපි සද්ද වසන්නේ බයටය. කෙසේ හෝ අම්මා ගහයි බැට් එකෙන් භාවිතය දැන් අඩුය. 

දිනක් සෑමා ක්‍රිකට් බැට් එකක් අතේ තියාගෙන සිටියදී, සෑමාගේ මිතුරෙක්ට ඔහුගේ අම්මා කිසියම් හේතුවක් නිසා බනින්නට වූයේය. එවිට මිත්‍රයා සෑමාට කිව්වේ “මචං ඔය බැට් එක අම්මට දියන් කියාය.“ සිද්ධිය එතරම් පැහැදිලි නොවුණ සෑමා ඒ ඇයි බං ඇසූ විට ඔහු කීවේ “එතකොට අම්ම ගහයි බැට් එකෙන් බං...“ කියාය. ඒ කාලේ කවුරුන් හෝ එකෙක් බැට් එක යෙදාගෙන මේ කතා හදන්නට ඇතිය. ඉස්සර ක්‍රිකට් ගහන්න ගෙදරින් පාන්දර එළියට බැස්සාම කොල්ලෝ ගෙදර එන්නේ හවස් වෙලාය. විටක ගෙදර ඉන්න උන්ට කොල්ලන් කැන්දන් එන්නට පිටියට යන්නට සිදු වන්නේය. ක්‍රිකට් ගහන කාලයේ මේවා අප අත්විද ඇති සිද්ධීන්ය. විටක ගෙදරින් එන අම්මා හෝ තාත්තා අපේ එවුන් සෙල්ලම් කරන බැට් එකම දෝතින් ගෙන තම පුත්‍රයාට පහර දෙන්නේය. “මේ මහ රෑ වෙනකල් තොපි අහවල් එකක් කරනවද? හවස් වෙද්දි ගෙදර එන්නෙ නැතුව..“ කියමින් සෙල්ලම් කරන උන්ව ක්‍රීඩා ගාරයට යවන්නේ පිටියට කඩා වදින දෙමව්පියන්ය. ඒ හේතුව මත අම්ම ගහයි බැට් එකෙන් වාක්‍යය කරලියට එන්නට ඇත්තේය. 

අද කාලේ එළිමහන් ක්‍රීඩා විරල නිසාත්, ලැපට කම්පියුටරයට ගැතිව ඇති නිසාත් “අම්ම ගහයි බැට් එකෙන් වාක්‍යය“ කාලීන නොවන්නේය. අද කාලයට ගැලපෙන්නේ නම් “අම්ම බුකිය හැක් කරයි..“ වගේ එකක්ය. බැට් එකෙන් කෙලිනවට වැඩිය බුකිය හැක් කලොත් අම්මාගෙන් බේරෙන්නට බැරි වෙන නිසා අද කාලේ උන්ට ඒක ගැලපෙන්නේමය.
මදුරු තලා බැට් එක

සෑමාට බැට් එක මතක් වූයේ අනෙකක් නිසා නොව මදුරුවන් තලන බැට් එක නිසාය. කොයිල් එකෙන් මැට් එකට, මැට් එකෙන් රෙපලන්ට් එකට ක්‍රමයෙන් විකසනය වූ මදුරු තැලිල්ල දැන් බැට් එකෙන් කෙළවර වී ඇත්තේය. පාර අයිනේ බැට් එකක් වනමින් සිටිනා අයෙකුගෙන් ගත් බැට් එකේ ආතල් එක ඇත්තේ මදුරුවෙක් මැරෙද්දීය. විටක කරදර කාරී මැස්සන්ටද කෙලිය හැකිය. පවක් කිරීම කොච්චර ආතල් දෙන්නේ දැයි සිතෙන්නේ, විටක කලකිරෙන්නේ එවිටය. බැට් එකේ දැලට හසුවන මදුරුවන් චටාස් ගා කැබලි ඉතුරු නොවන්නට අධික විදුලි ධාරාවකට හසුවන්නෝය. ගිණි පුලිගුවක් විසිවෙමින් උන්ට වෙච්ච දෙයක් නැති වන්නේය. ඉස්සර අපේ උන් කියූ අම්ම ගහයි බැට් එකෙන් කතාව දැන් කාලයේ ගැලපෙන්නේ මදුරුවන්ටය. දැන් ඉන්න උන් බැට් එකෙන් කෙලින්නේ මදුරුවන්ට නිසාය.

මදුරු කරදරයේදී සෑමා කැමතිම ආරක්ෂක ක්‍රමය වූයේ නෙට් එකය. මොකා හිටියත් නෙට් එක දැම්මා නම් ආතල්ය. බොහෝ විට නෙට් එකේ එලියට වඩා ඇතුලේ මදුරුවන් සිටින අවස්ථාද නැතුවා නොවේය. එහෙව් විටක කළ යුත්තේ එලියේ සිටින සියළු මදුරුවන් නෙට් එක ඇතුලට කැදවා නෙට් එක ගැට ගසා තබා නිදහසේ නෙට් එක නැතිව නිදා ගැනීමය. එලෙසම හැමදාම උදේට නෙට් එක ගැට ගසා තැබීම තරම් වදයක් ලොවෙත් නැත්තේය. විටක අම්මා බනින්නේ ඇයි යකෝ නෙට් එක අකුලන්නේ නැත්තේ කියාය. එවිට සෑමා පිලිවදන් දුන්නේ “කමක් නැහැ ඉතිං.. අද රෑටත් නිදා ගන්නවා නේ“ කියාය.

කෙසේ හෝ මදුරු බැට් එක අතට ගත් මොහොතේ සෑමාට මතක් වුණේ අට වසර පන්තියේ සිටි විශ්වයාය. ඌද කොත්තා සමග සෙට්ව සර්කිට් හදන එකෙක්ය. දිනක් පොඩි පෙට්ටි කැබැල්ලක සර්කිට් එකක් අමුනා, බැටරියක් ඔබාගෙන ඔහු පාසල් ආවේය. පෙට්ටියෙන් පිටතට කම්බි කනු දෙකක් දමා තිබුනේය. පෙට්ටියෙන් පිටතට ඇති ස්විචයක් ඔන් කර ස්වල්ප මොහොතක් තබා කම්බි කනු දෙක අපේ උන් ඇගේ ගෑව්වේ විශ්වයාය. කුණු හරප කිහිපයක් කියමින් අපේ උන් විශ්වයාට බැන්නේ එයින් අධි ධාරාවක් පිට වූ නිසාය. ගැජට් එක තුල තිබූ තඩි කන්ඩෙන්සරයෙන් ධාරාවක් ගබඩාකරගෙන සිට එකවර මුදා හරින්නේ යැයි අපට තේරුම් ගියේ පසුවය. එම යාන්ත්‍රණම බැට් එකේ ඇත්තේය. ඒ කාලයේදීම කොත්තා සහ විශ්වයා අපට වද නොදී, ගුටි නොකා එම පර්පථය ගොඩ දැම්මේ නම් මදුරු බැට් එක ගොඩ දාන්නේ අපේ එවුන් දෙන්නෙක්ය.

බැට් එකේ සර්කිට් එක
මදුරු බැට් එක විටක වැඩ කරන්නේ නැතිය. මදුරුවෙක් වැදුනත් ඌ පාඩුවේ ඉගිල යන මොහොතක් ඇත්තේය. එවිට බැට් එකේ කරන්ට් එක මදිය. චාර්ජ් කළ යුත්තේය. එවන් අවස්ථාවක බැට් එක චෙක් කරන්නට බට්න් එක ඔබා දැල ඇල්ලීමෙන් සෑමා නියම සැපක් ගත්තේය. කෙසේ හෝ අත් දෙකින් හෝ බැට් එකෙන් මරුවත් පව පවමය. මදුරු සිගිත්තන් සිගිත්තියන් දවසට විස්සක් තිහක් බාන්නට සෑමාට සිදුවන්නේ පොඩ්ඩා නිසා මේ දිනවල නෙට් භාවිතය බැරි නිසාය. ඒත් මැරෙන මදුරුවා නිසා සිදුවන පව අවම කරගත හැකි පියවරක් සෑමා සොයා ගත්තේය. මදුරුවා මැරීමට බට්න් එක යොදා බැට් එක එක වරක් වැනීමෙන් මදුරුවා සිහිසුන්ව වාගේ බැට් එකේ රැදී සිටින්නේය. නැවත බට්න් එක එබුවොත් ඌ සදා සොත්තීය. අඩු කැබැල්ලක් වත් ඉතුරු නොවන්නට දුමක් දාන්නේය. උක්ත පියවර දෙකෙන් එකක් පමණක් අනුගමනය කොට, මදුරුවා සිහිසුන් මොහොතේදී බිම අතෑරියොත් පව අඩු වන්නේ යැයි සෑමා සොයා ගත්තේය. එම සිහිසුන් මොහොතේ මදුරුවා බිම දැමූ සැනින්, කූඹි පැමිණ තම ආහාරය සපුරා ගන්නෝය. ඒ නිකංම නිකන් මදුරුවෙක් අනුභව කිරීමෙන් නොවේය. BBQ මදුරුවෙක් අනුභව කිරීමෙන්ය. ඒ නිසා සෑමා හිත හදාගෙන ඇත්තේය. තමන් මදුරුවන් නොමරන බවත්, කූඹින්ට BBQ මදුරුවන් කෑමට දමන ලෙස සිතා, කුසගිනි නිවනා පුණ්‍ය කර්මයක් කිරීමෙන් සෑමා නිතර සැනසෙන්නේය.

ඔබේ නිවසේත් මදුරු කරදරයක් ඇත්තේ නම්, කූඹින්ට BBQ මදුරුවන් කෑමට දමනා බැට් එකක් ගෙන, කූඹින්ට කෑම දැමීමේ පුන්‍ය කර්මයක් කොට දෙලොව ශාන්තිය උදා කරවා ගන්න.

Written_by_sAm_ශ්‍රී_Perera_25/06/15_6:35am

Monday, June 22, 2015

පාන් කතාවක්... - Bread Talks !!


ඉස්සර පාන් නම් රසය. බරය. ගුණය. ඒ කාලේ තිබ්බේ දර පෝරණු පාන්ය. දැන් තාක්සනය නිසා වැඩිපුරම ඇත්තේ කරන්ට් පාන් හෙවත් විදුලි අවන්වලින් හදනා පාන්ය. ඔය කියන කරන්ට් පාන් මාකට් එකට එන්නට පටන් ගත් කාලයේ මාර ඉල්ලුමක් තිබ්බේය. දර පෝරණු පාන්කරුවන් පාන් කියා ගත නොහැකි තත්වයකට ඇඳ වැටුනේ කරන්ට් පාන් මාකට් වූ කාලයේය. ඒත් ඔවුන් නොසැලී දුක්ඛිතව තම රාජකාරිය කළෝය. ඒ දුකෙහි ඵල ඔවුන් නෙලන්නේ මේ කාලයේය. මන්ද කරන්ට් පාන් වලට ඇති මාකට් එක දැන් අහිමි වී යන නිසාය. කොහේ හෝ තැනක තඩි අකුරින් දර පෝරණු පාන් ඇත කියා ගසා ඇත්තේ නම් එතැනින් පාන් ගන්නට බත් නොකන ජනතාව පෙළඹී ඇත්තෝය. ඒ නිසා කරන්ට් පාන් මාකට් එක බැසී දර පෝරණු පාන් මාකට් වෙනු ෂුවර්ය. කාලයේ හැටි ඒමය. අමුඩය මාකට් නැති වී ජොකාට බැස, නැවත අමුඩය ගසන කාලයට එළැබෙන්නේ කාලයේ විපරියාසයෙන්ය.



හරි බරට, හරි ප්‍රමිතියට තිබුණු කාලයේ පාන් රාත්තලක් කන්නා වැඩ්ඩෙක්ය. එහෙම කාපු එකෙක් සමාජයක් මැද කතා කරන්නේ යුග පුරුෂයෙක් ආකාරයෙන්ය. පාන් පෙත්තක බටර් ගා සීනි දමා කෑවත් බඩ පිරෙන කාලයක් තිබුණා කියා අපද දන්නේය. දැන් නම් පාන් රාත්තල පෙති දෙකකට කපා කෑවත් බඩ පිරෙන්නේ නම් නැතිය. පාන් වලට සැට් වෙන්නේ බටර්, ජෑම් නොව පරිප්පු හොද්ද බව සෑමා ඉන්තේරුවෙන්ම දැන ගත්තේ බාල සන්ධියේදීය. එයටම මිරිස් හොද්දක් මික්ස් කොට පොල් සම්බෝල දැමූ විට රස යැයි අම්මා කීවත් එය කනකට නොගත්තේ සෑමාය. පසු කලෙක ඒලෙවල් කරන්නට ගම්පහ සමාධියට ගොස්, ඉන්ටර්වල් එකට ඉතා අපිරිසිදු කඩයකට පිටුපසින් රිංගා, කඩයේ කුස්සියේ හිටගෙනම, ප්ලාස්ටික් පිගානේ දමාගෙන පරිප්පු, මිරිස් හොඳි සමඟ පොල් සම්බෝල කන විට අම්මා කීවේ ඇත්තක් බව සෑමාට වැටහුණේය. එය සත්‍ය බව දැන සිටි අපේ උන් එම කුස්සියේ සිටම දෙසා බෑහ. ඉන්ටර්වල් එකට ලැබෙන කාලය අඩු නිසාත්, ගෙදර එන්නට බස් එකට සල්ලි වුවමනා නිසාත් පාන් බාගයකට සීමා වීමට අපට සිදු වූයේය.

පාන් අරුම පුදුම කෑමක් ලෙස සෑමා දැන ගත්තේ මෑත භාගයේ සිදුවූ සිද්ධියක් නිසාය. ලකස් සබන් කැටයේ මැද සඟවා රන් කාසි එවූ කාලයක් තිබුණේය. සබන් කෑල්ල අතුල්ලං යන විට එක පාරට රන් කාසිය මතු වන්නේය. එහෙම කාසි ලැබුනු එකෙක්වත් අහලා, දැකලාවත් නොතිබුණත් අපි ඒ කාලේ සබන් ගෑවේ පරිස්සමටය. රන් කාසියකට වුණත් ඇඟපත තුවාල කරගත නොහැකි නිසාය. එලෙසම පාන් අස්සේද තෑගි සඟවා එවූ කාලයක් තිබුණේය. එහෙම එකක් සැට් වූවේ අපේ ගමේ අංකල් කෙනෙක්ටය. ඒ රෝයල් බේකරියෙන්ය. එය සොයාගත් අංකල් තෑගිත් එක්කම හිරු නිවුස් වල සිටියේ මහත් ආඩම්බරයෙන්ය. රෝයල් යනු අපි ජුන්ඩි කාලයේ ඉදන් නම ගිය එකක්ය. තිබුණේ සහ තාම තියෙන්නේ ගෝනවලය. අපේ පැත්තේ උන්ගෙන් ඉස්කෝලෙ කොයිද බං ඇහුවාම “රෝයල්“ කියන උන් කට අරින්නේ ටිකක් බයෙන්ය. එහෙම කිව් එකෙක්ගෙන් නැවත අහන්නේ “ආහ්.. ගෝනවල රෝයල්ද?“ කියාය. ඒනිසා මේ පැත්තේ උන් ඉස්කෝලෙ රෝයල් කියන්නට මැලි වන්නෝය. කෙසේ හෝ අර කී වාසනාවන්ත අංකල්ට පාන් ගෙඩිය මැද තිබී තෑග්ගක් හම්බුණේය. පොර එය දුටු සැනින් කතා කර ඇත්තේ ගමේ PHI ටය. පොරත් සිද්ධියට මැදිහත්ව, පාන්ගෙඩිය මැද තිබූ රෝයල් එකේ පිත්තල යතුර සමඟ නිවුස් වලට පෙනී සිටියේ මහත් ආඩම්බරයෙන්ය. එහෙ තෑගි ලැබෙන්නත් පිං කළ යුතුය. අපට එහෙව් පිනක් නැත්තේය. එක පාරක් යකඩ ඇණයක් පමණක් තෑගි ලෙස ලැබුණා මතකය. එය සැනසිලි ත්‍යාගයක් නිසාම රූපවාහිණියේ පෙනී නොසිට අප කඩේ එකා හමුවී අම්මා මුත්තා පමණක් මතක් කොට ප්‍රීතිය බෙදා හදා ගත්තේය.

සෑමාට පාන් ගැන ලියන්නට හිතුනේ ඊයේ හවස පාන්, බනිස් හන්දියට ගිය නිසාය. සෑමාගේ හන්දියේ බේක් හවුස් නම් 5ක්ම ඇත්තේය. අඩියෙන් අඩියට ඇති බේක් හවුස් වලින් කුමකට යනවා දැයි ගෙදරදීම සිතාගෙන එළියට බැසිය යුත්තේය. නැත්තං අතරමංය. එහෙම හිතාගත් බේක් හවුස් එකකට ගොඩව සෑමා බනිස් ගෙඩි සැට් එකක්ද, රෝස් පාන් තුනක්ද ඉල්ලා සිටියේය. කඩේ එකා බඩු සැට් එක ෂෝ කේස් එක මත තැබුවේය. සෑමා මුදල් දී ෂෝ කේස් එක මත තිබු බැග් දෙකම අතට ගෙන එන්නට හැරුණේය. පැත්තක ප්ලේන්ටියක් ගසමින් සිටියේ යසපාල අංකල්ය. පොර කකුල් දෙක පද්දමින් ආතල් එකේ ප්ලේන්ටිය තොල ගාන්නේය. අංකල්ගේ ආතල් නොකඩා, අංකල්ට අමතා සැලුට් එකක් ගසා සෑමා එලියට පැන්නේය. ගෙදර විත් බෑග් දෙක චැක් කරද්දී බනිස් සහ රෝස් පාන් හතරක් සහිත එක මල්ලකුත්, තවත් මල්ලක තවත් රෝස් පාන් හතරක්ය. සෑමාගේ පපුව හෝස් ගා ගියේය. අහෝ මෙහෙව් හොරකමක් ලොවෙත් කිරීම මහා පාපයක්ය. පාන් යනු ජාතික වස්තුවක්ය. වහාම පාන් බෑග් එක ගෙන සෑමා කඩේට දිව්වේය. 

යසේ තාමත් ප්ලේන්ටියේ ආතල් එකෙන්ය. කඩේ එකා බිස්නොස් එකේය. සෑමා හිතුවේ කඩේ පත්තු වෙලා ඇති කියාය. කාටත් ගානක් නැත්තේය. පාන් එකේ හිමිකරු හෝ සද්දයක් දමන්නට කාලය ඇතිය. කඩේ එකාට බෑග් එක දුන් විට ඌ හොල්මන්ය. ගාණක් නැතිය. සෑමාගේ මූණ දිහා බලාගෙනම හිටියේය. “ඔයා කාට හිරි දීපු බෑග් එකක්, දාල ගිහින් වෙන්න ඇති.“ සෑමා පහදා දුන්නේය. “කමක් නැහැ මල්ලී, ඔතනින් තියල යන්න..“ කඩේ එකා කිව්වේය. යසේ පැත්තට හැරුණු සෑමා යසේට ස්ටෝරිය කිව්වේය. පොරටත් හිනාය. හිනාව අවසන් ටියුබ් ලයිට් එකක් මෙන් “ආ.. මගේ බෑග් එකත් ඔතනම තිබ්බා..“ කියා සොයන්නට වූයේය. සැමා උස්සන් ගොස් තිබ්බේ යසේගේ පාන් මල්ලය. පොරට ආතල් ඩබල් වූයේ තමන්ගේ බෑග් එක ලොකු ටුවර් එකක් ගොස් ආ නිසාය. ප්ලේන්ටි ආතල් එක පැත්තකින් තබා පුටුවෙන් නැඟිට යසේ පාන් මල්ල බදා ගත්තේ නිධානයක් ලැබුණා සේය.

Written_by_sAm_ශ්‍රී_Perera_7:50am_21/06/2015

Tuesday, June 16, 2015

මිතුරාගේ කන්ටැක්ට් ලිස්ට් එක චෙක් කරන්න.. - Check Your Friend's Contact List !!!


හෑන්ඩ් ෆෝන් නැති කාලයේ හැම එකාගේම සාක්කුවේ ටෙලිෆෝන් ඩිරෙක්ටරියක් තිබ්බේය. ඩිරෙක්ටරිය කිව්වේ ටෙලිකොම් එකෙන් ගෙදරට එවූ පතරංග පොත නෙවේය. අපි එකිනෙකා අත තිබූ ජුංඩං නෝට් පෑඩ් එකය. එහි සටහන් කළේ එක එකාගේ ටෙලිෆෝන් නම්බර්ය. ඉන් බහුතරයක්ම වූයේ ලෑන්ඩ් ෆෝන් නම්බර්ය. මන්ද ඒ කාලේ හෑන්ඩ් ෆෝන් භාවිතය එතරම් නොවු නිසාය. ඒ පොතේ තිබූ බොහොමයක් නම්බර් නිරායාසයෙන් කටපාඩම්ද වූයේ නිතර භාවිත වෙන සුළු නම්බර් ප්‍රමාණයක් තිබු නිසාය. එහෙත් දැන් එහෙම නැතිය. දැන් ෆෝන් එකේ කන්ටැක්ට් ලිස්ට් එකේ නම්බර් 500කට වඩා එහා පැත්තේ ඇත්තේය. ඉන් සුළුතරයක් නම්බර් පමණක් මතකය. එහෙත් බොහෝ විට නිතරම කෝල් ගන්නා එවුන්ගේ වත් නම්බර් මතක නොහිටින්නේය. හේතුව නම්බරය සේව් වී ඇත්තේ පුද්ගල නාමයෙන් නිසාය. කාගේ හෝ ෆෝන් කටුවක් නැතිවුණ හැටියේ බොහොමයක් උන් නහයෙන් අඩන්නේ ෆෝන් එකේ වටිනාකම කියමින් නෙවේය. “ෆෝන් එක නම් අවුලක් නැහැ බොලව්, ඒකෙ තිබ්බ කන්ටැක්ට්ස් ටික තමා වටින්නේ“ යැයි බොහොමයක් උන් කෙඳිරි ගාන්නේ ඒ නිසාය. සිද්ධිය නම් ඇත්තය. බොහොමයක් නම්බර් ෆොන් බුක් එකක නොලියන නිසාත්, ස්මාර්ට් ෆෝන් එකෙන් ගූගල් එකට හෝ බැකප් නොකරන නිසාත් ඔය ගැටළුවට මුහුණ දෙන්නෝ බහුලය.

ඒ දවස්වල ගමට කියා ලෑන්ඩ් ෆෝන්ද තිබුණේ ස්වල්පයක්ය. ඒ අතර සෑමාගේ මහප්පලෑ ගෙදර ලෑන්ඩ් ෆෝන් එකද වූයේය. එය අපටද මහ මෙරක් වූයේය. ගමේම එවුන්ට කෝල් එන්නේද ඒ නම්බරයටය. ඒ නිසා නොම්මරය නම් තාම කට පාඩම්ය. අවට උන්ට හදිසි පණිවිඩ ලැබෙන්නේ ඒ නම්බරයටය. අහවල් වෙලාවට මම කතා කරනවා යැයි කියන උන්, කතා කරන තුරු අසල්වාසීන් මහප්පලෑ ගෙදරට වී කල් මරන්නේ අහවල් වෙලාවට එන කෝල් එකට ආන්සර් කිරීමටය. බොහොමයක් දෙනා එන කෝල් එක ආන්සර් කොට ක්ෂණිකව කතා බහ අහවර කොට, ස්වල්ප මුදලක් ෆෝන් ස්ටෑන්ඩ් එක උඩ තබා යන්නේ භක්තියෙන්ය. විටක එය බලහත්කාරයෙන් ඔවුන්ගේ ඇගේ ගසන්නට වන්නේය. මහප්පා රජයේ ඉහළ නිලධාරියෙක් වූ නිසා ෆෝන් එකක් ලැබුණා සේම, එහි මුදල් ගෙවීමද කළේ රජයෙනි. එම සංකල්පය ඉදිරියට ගෙන ගිය මහප්පෑ පොඩි පුත්‍රයා කමියුනිකේෂන් ක්ෂේත්‍රයෙන් ගමේ තැනකට පැමිණ ඇත්තේය. ඔහු නැවතුනේ මහප්පාගේ ලෑන්ඩ් නම්බර් එකට ෂොට් එක දීමෙන් බව මහප්පා තාමත් කියන්නේය.

උක්ත නම්බර් එකට සෑමාටද කෝල් කිහිපයක් ආවේ පාසලේ 4, 5, සහ 6 වසර වලදීය. ඒ ටෙලිෆෝන් ව්‍යාප්තිය වැඩිවන කාලයේය. නම්බර් කිහිපයක් සෑමාට තාමත් මතකය. සෑමාට කතා කළේ සුළු පිරිසක් වූ නිසාම ඒවා තාමත් කටපාඩම් වීම සාධාරණය. ඒ එන කෝල් එකද හොරෙන් මෙන් කතා බහ කර ඉක්මනින් තියන්නේ කෝල් එකක් ඒම මහා භයානක දෙයක් ලෙස දැනුනු නිසාය. එලෙසම ගෙදර උන්ද කන දාගෙන සිටින්නේ මූ මොනාද කතා කරන්නේ කියා විය හැකි නිසාය.

කාලය ගත වෙද්දී සෑමාගේ ගෙදරටද ලෑන්ඩ් ෆෝන් එකක් ආවේය. එයද ටැලිකොම්ය. ඒ කාලේ ඉන්ටර්නෙට් යනු හරිම පුදුම දෙයක්ය. පට්ට ස්පීඩ්ය. ලොග් වූයේ ඩයල් අප් මොඩම් එකෙන්ය. ස්පීඩ් එක මතක හැටියට 56 kbit/s ය. මගෙ අප්පේ දන්නා වැදගත් සයිට් එකකට තිබුනේ නාසා එකේ සයිට් එකය. ඒ අස්සේ කමියුනිකේෂන් එකේ බුද්ධික අයියා නෙට් ටු ෆෝන් ගැජට් එකක් ගසාගෙන IDD කෝල් ලාභෙට ගත්තේ මේ කාලයේය. සෑමාගේ ගෙදර නම් ඉන්ටර්නෙට් සුම්මා වූයේය. ඒ අම්මාගේ විමසිලිමත් නෙත් නිසාය. ඒ අතර අම්මා ෆෝන් බුක් එකක් මේන්ටේන් කළාය. මගේ අප්පේ අගක් මුලක් නැතිව හිත් තැන් පිරවෙන්න තැනින් තැන ලියූ ෆෝන් නමබර්ස් සෙවීම අපට නම් කළ නොහැකි දෙයක් වුණේය. එහෙත් අම්මා ක්ෂණිකව තමා ලියූ නම්බර්ස් සෙව්වාය. ඇල්ෆබර්ට් එකේ පිළිවෙලට වත් නොතිබූ කාගේ හෝ ඕනෑම නම්බර් එකක් තප්පර කිහිපයකින් සෙවීම කළ හැකි වූයේ අම්මාට පමණක්ය. තත්වය එසේ වූ නිසා සෑමා සහ සෑමාගේ අක්කා එම ටෙලිෆෝන් බුක් එක පිළිවෙලක් කිරීමට කතිකා කර ගත්තෝය. ඒ අනුව ආකරාදී පිළිවෙලට නම්බර් වෙන වෙනම තවත් ඩයරියක් ලියන්නට වූවෝය. එහි පිළිවෙලකට ලියා තැබුවද අම්මා නිතර භාවිත කළේ පරණ, අපිට අපිළිවෙල වූ, ඇයට පිළිවෙල වූ, ෆෝන් බුක් එකය. පසු කාලීනව සෑමාත් අක්කාත්, එම ඩයරිය ඉල්ලා අස්කර ගත්තොත්ය.

අතීතය එසේ අමතක වී යමින් තිබියදී සෑමා මෑත දිනයකදී අම්මාගේ ෆෝන් ලිස්ට් එක දිග හැර බැලුවේය. ඒ සුපුරුදු පරිදි කලින් කී අපිළිවෙල ඩයරියමය. එහි ලියැවී තිබූ පුද්ගල නාම දුටු සෑමාට හිනා ගියේ අප්‍රමාණවය.




පලවෙනි ෆොටෝවේ පරිදි ලේනා නම් ගමේ එකෙක්ය. ඌ කරන්නේ කුලී වැඩය. උගෙ හැඩය ලේනා වාගේය. පුංචිය. පිටේ ඉරිතුන වෙනුවට ඇත්තේ ලේනෙක් වැනි කොණ්ඩයක් සහ දත් ටිකය. දෙවෙනි ෆොටෝ එකේ පරිදි කම්බි ඩයස් නම් ඩයස් අංකල්ය. කරන්නේ යකඩ වැඩය. වැල්ඩින් වැඩය. සාරි නොපිට ලෙස ඇත්තේ කඩේට එන ඇන්ටි කෙනෙක්ය. ඇය සාරිය අදින්නේ නොපිටට බව අම්මා කියා ඇත්තේය. ඒ නිසා ඒ නම දමා ඇත්තේ සෑමාගේ අම්මාය.


ඒ කන්ටැක්ට් ලිස්ට් එක දුටු විට “යකෝ අපේ නම්බර්, අපේ උන් කෝම සේව් කරන් ඉන්නවාද මන්දා“ යැයි කිහිප වරක් සිතුණේය. කාරණාව සත්‍යය. යමෙක් තවකෙකුගේ නම්බර් එකක් ෆෝන් එකෙ කන්ටැක්ට්ස් වලට යොදා ගන්නේ තමන්ට පහසු විදිහටය. එකම නමින් පුද්ගලයන් දෙදෙනෙකු සේව් කරනා විටද එම තත්වය බලපාන්නේය. ඒ නිසාම ඔබේ මිතුරාගේ ෆෝන් එක අතට ගෙන, ඔබේ නම කුමන ආකාරයෙන් සේව් වී ඇත්දැයි බැලීම වටින්නේය.

Written_by_sAm_ශ්‍රී_Perera_7:15am_16/06/15

Friday, June 12, 2015

මාරු සල්ලි... - Changed Money !!


මාරු සල්ලි යනු කෙටි කතාවක් නොවේය. බ්ලෙග් කතාවක්ය. මාරු සල්ලි හමුවේ සෑමා දුටු කතාවක්ය. එය හුදෙක් පුද්ගලයන්ගේ පරාර්ථය හෙළි කරන්නක් බව සෑමා සිතුනේ කාසි, නෝට්ටු හෝ මුදල් සමඟ මෙතුවක් ජීවත් වීමෙන්ය. ඉස්සර මාරු සල්ලි වලට නියම ඩිමාන්ඩ් එකක් තිබුණේය. ඒ පාසල් යන කාලයේ කිව්වොත් නිවැරදිය. කැන්ටිමෙන් ලැබෙන ඉතුරු සල්ලි හෙවත් කාසි, පසු දිනට හෝ එදිනටම යලි ආයෝජනයක්ය. එලෙසම බස් එකේ යද්දී නම් මාරම වටින්නේය. ඒ නම් හැමදාම අපව රවටන කොන්දාව අපට රැවටිය හැක්කේ අතේ මාරු සල්ලි තිබුණොත් පමණක් නිසාය. තවත් අතකින් මාරු කාසි යනු පාසල් සමයේ කලෙක්ෂන් හෙවත් “ලොන්තේ“ දමන උන්ට නම් සහන මල්ලක්ය. හැමදාම ලැබෙන කප්පම් මුදල මාරු සල්ලි වලින් එකතු වුවද විශාල මුදලක් වන්නේය. එලෙසම කප්පමට ලක්වන්නෝද මාරු කාසි දීමෙන් තම පොකැට්ටුව බේරා ගත්තේ නෝට්ටු වලින් වෙන්නට යන විනාශය කාසි කිහිපයක් කප්පම්කරු අතට දීමෙන්ය. ඒ කෙසේ වෙතත් පාසලේදී, පන්තියේදී නම් සාක්කුවේ තිබෙන කාසි දෙකතුනක් හෝ බිම වැටී “සල බලාං“ සද්දය ආවොත් වටේ ඉන්න උන් කෑ ගහන්නේ “අඩෝ.. අන්න අරූගේ කැටේ කැඩුනා“ කියාය. එහි ඇති විලි ලැජ්ජාව නම් අපේ උන් “කැටේ“ කිව්වේ “ගුද මාර්ගය ආදායම් මාර්ගය“ කරගත් විටය.

මාරු සල්ලියේ දේශපාලනය නම් මෙසේය. විටක පුද්ගලයාගේ ආත්මාර්ථය, පරාර්ථය, හෝ කම්මැලි කම විදහා දැක්වෙන්නේ මාරු සල්ලි වලින්ය. බොහෝ විට මාරු කාසි වලින්ය. එහා පැත්තේ සැලුන් එකට එන කොණ්ඩය දන් දෙන්නෝ දහසේ මුදල් නෝට්ටුවක් අතේ තබාගෙන “හොට් සීට්“ එකේ වාඩි වන්නෝය. හොට් සීට් එක කිව්වේ සැලුන් එකේ කොණ්ඩය කපන සීට් එකටය. සෑමාට නම් ඒක හොට්ය. සැලුන් එකේ එකා කොණ්ඩය වැරදියට කැපුවොත් කැපුවාමය. මොන අටමගලය වුණත් මුදල් දී එන්නට වන්නේය. කෙසේ හෝ එහා පැත්තේ සැලුන් එකේ කස්ටර්මර්ස්ලා මාරු සල්ලි අතේ නැතුව, හිතුමතාම, කලින් නොදන්වාම, හොට් සීට් එකේ හිඳ ගන්නෝය. ඉනපසු කොණ්ඩය කැපුවාට පසු රුපියල් දාහේ නෝට්ටුව දික් කරන්නෝය. අසරණ වන්නේ සැලුන් එකේ එකාය. ඉන්පසු මාරු සල්ලි හොයමින් ඌ දිව එන්නේ සෑමාගේ කඩයටය. කොණ්ඩය කපන්නට ආ එකාගේ ආත්මාර්ථකාමීත්වය, කම්මැලිකම නිසා දුක් විදින්නේ වටේ ඉන්න උන්ය. බැරිම තැන සෑමාගේ අම්මා පෝස්ටර් එකක් ඇන්දේය. “කරුණාකර මාරු සල්ලි රැගෙන එන්න“ පෝස්ටරය සැලුන් එකේද, එහා පැත්තේ ඉඳිආප්ප කඩේද ගැසුවේ සෑමාගේ අම්මාය. ඒත් කරදරය එසේමය. කොණ්ඩය කැපුවාට පස්සේ මෙන්ම, ඉඳිආප්ප කෑමෙන් පසුද දිගු කරන්නේ රුපියල් දහසේ කොළයක්ය. සදාතනික දුක අපටය. 

ඉතිරි කාසි වෙනුවට ටොෆි ලැබෙන, බුලත් විට ලැබෙන සිද්ධීන් අවම කර ගත හැක්කේ තමන්ටමය. ඒ මාරු සල්ලි, මාරු කාසි අතේ තබා ගැනීමෙන්ය. විටක මුදලාලි ඉතුරු සල්ලි දෙද්දී පාරිභෝගිකයාගෙන් අහන්නේ මාරු තියෙනවාද කියාය. එවිට පර්ස් එක, පොකැට්ටුව විහිළුවටවත් අතගා නොබලන පාරිභෝගිකයා මාරු කාසි නැහැ කියන්නේය. එවිට මුදලාලි කඩේ තිබෙනා එක්ස්පයර් මට්ටමේ ඒවා ඔතා එවන්නේ ඉතුරු සල්ලි ලෙසය. දිනක් කඩේකට පැමිණි ඩෑල් එකක් මොන මොනවාදෝ බඩු ටිකක් ගත්තේය. ඒ අතර තමා අත තිබූ කාසි කිහිපයකින් කඩේ ලෑල්ලකට තට්ටු කරමින් සිටියේය. මුදලාලි බඩු කිරන කල්ම, ඔහු ලෑල්ලට තට්ටු කළේය. මුදලාලි ඩෑල් එක ඉතුරු දෙන්නට මාරු “කාසි තියෙනවද මහත්තයා ?“ කියා අසද්දී කඩේට ආපු ඩෑල් එක කට පුරා කීවේ “අනේ නැහැ“ මුදලාලි කියාය. ඒ උපන්ගෙයි ආත්මාර්ථකාමීත්වයය. මුදලාලියා රකුසු බැල්මට් එකෙන් පාරිභෝගිකයා දෙස දෙනෙත් හෙලා, “ඔය අතේ තියෙන කාසි ටික හරි දෙන්න මහත්තයා“ කීවේ කිංඩියටය. අරූට රෙදි නැතිය. පොර සමාජය මැද්දේ එළියට දැම්මේ තම ආත්මාර්ථයය. 

මාරු සල්ලියෙන් පුද්ගලයන් මැනිය හැකි බව කියන්නේ සෑමාය. සෑමාගේ පඩිටෝක්ස් පැත්තකින් තබා පුදගලයන් තමන් ගැනම හිතනා අය නම් මාරු සල්ලි නිවැරදිව පරිභෝජනය කළ යුතුය. රුපියල් පහේ කාසි කිහිපයක් පර්ස් එකේ දමාගෙන සතියක් දෙකක් ගත කළ විට පර්ස් එකට වෙන හානිය වැඩිය. පර්ස් වලට වැඩිය දැන් භාවිත වන්නේ වොලට්ය. එහි නම් කාසි දමන්නටම බැරිය. කෙසේ හෝ රැගෙන යාමේ අපහසුව, පර්ස් එකේ දැමීමේ අපහසුව, දන්නා උන් නම්, මාරු කාසි නිවැරදිව භාවිත කොට ඉතුරු සල්ලි ලෙස නෝට්ටු ලබා ගැනීමට උත්සුක විය යුතුය. රුපියල් හැත්තෑ පහේ භාණ්ඩයට රුපියල් සියයක් මුදලාලීට ලබා දී, රුපියල් 25ක් ඉතුරු සල්ලි ලබා ගැනීම සාමාන්‍ය ඩීල් එකය. ඒත් සෑමාට ආතල් වෙනස් විදියකටය. එනම් රුපියල් 105ක් මුදලාලියාට ලබා දී රුපියල් 30ක නෝට්ටු ලබා ගැනීමය. එහෙම කරන්නට ගොස් කෙළවුණ අවස්ථාද නැතුව නොවේය. එවන් අවස්ථාවක මුදලාලියා රුපියල් 20ක නෝට්ටුවක් සහ 10 කාසියක් දුන් විට මුදලාලියාගේ මෑණියන් සිහිවන්නේය. එහෙත් අප නොසැලී මාරු කාසි / සල්ලි නිවැරදිව භාවිත කළ යුතුය.

පලි - කාසි ගැන කියද්දී, සෑමාට මතක් වුණේ අපේ කාසියාගේ කතාවය.

Written_by_sAm_ශ්‍රී_Perera_7:10am_12/06/15

පපලි - වෙන උන් අම්මාගේ උපන්දිනය දා ලියන්නේ මව් ගුණ පෝස්ට්ය. එසේ නොලියා මාරු සල්ලි ගැන ලිව්වාට සොරිය. දරුවෙක් හදන්නට මව්වරු, පියවරු විදිනා දුක දැනුනු පුතෙකු, අමුතුවෙන් විශේෂ දිනයක මව් ගුණ ලිවිය යුතු නැති බව සිතුනේය.

Tuesday, June 2, 2015

සිරවීම් විතරයි.. !!




දස මසක් පුරා දුක් විඳ
හිටියා උදරය පිරිමැද
සැපයයි කියා දරු ගැබ
සිටියා සිරවී කුටියක

උපතින් මතුද දවසක
ඔතලා රෙද්ද සරුවට
හතරයි දෙකේ කොටුවක
සිරවුණා පොඩි තොටිල්ලක

 අම්මා පියා මඟ හැර
ඔෆීස් ගිය මොහොතක
බලා ගන්න එකෙක් නැති කොට
සිරවුණා “ඩේ කෙයාර්“ එකක

නොනවතී එතැන මතුවට
අ‘ යනු ආ“ යනු කියනට
ලොවක් මතු ජය ගන්නට
සිරව සිටියා “නර්සරියක“

අ‘යන්නෙන් ලොව දිනුමට
බැරි බව කියන දවසක
පහලොස් වසක් තුරාවට
සිරව සිටියා ඉස්කෝලෙක

ජය ගත් එවුන් පාසල
දිව්වා යුනිවර්සිටියට
සිරව සිටියා වසර පහකට
අතර තුර මහ ස්ට්‍රයික් මැද

යුනිවර් සිටි ගිය උන්
යුනිවර් සිටි නොගිය ඩෑල්
සෙට් වී එක තැනක ෆන්
සිරවුණා මතු ජොබ් එකක ඩල්

සොයා ගෙන සහකාරයක් පෙම්
බදාගෙන සහකාරියක් පෙම්
නැගී කැටයම් පෝරුවක බං
සදා කාලික සිරවුණා ලව්

රාහුලයෙක් ඉපදුණා
බන්ධනයක් ඇති වුණා
සිදුහත් මුව කියවුණා
එලෙසම සිත් සිර වුණා

දරු සුරතල් බලමිනා
එකා දෙන්නා වැඩි වුණා
සරලව තිබු ජීවිතේ
සදහකටම සිරවුණා

හැර යන්නට ජීවිතේ
නිසි කාලය එලැබුණා
නෑ නොනෑ කදුළු මැදින්
මිනි පෙට්ටියෙ සිරවුණා

පෙට්ටිය මැද අසුරලා
සුවඳට “සෙන්ට්“ තවරලා
මල් වටේට අහුරලා
වලක් කපලා සිරකළා


Written_by_sAm_ශ්‍රී_Perera
8:02am_02/06/15



පොසොන් කාලපයේ පෙර ලිපි..




 

Saturday, May 9, 2015

නියම වේලාව... - සෑම්ගේ වෙසක් කලාපය !!


ඔබ නියම වේලාව, සුභ මොහොත සහ නැකත ගැන විශ්වාස කරන්නෙක්ද? එසේ නම් කියවිය යුතුය.

සෑමාගේ නිවස ඉදිරියේ ඇත්තේ මැයි ගසක්ය. ගස නම් මැයි වූවාට මැයි මල් ගසක් වූයේ මෑතකදීය. එනම් අප්‍රේල් මාසයේ සිටය. ගස උස් මහත් වූ දා සිට කිසිම මලක් හට නොගත්තේය. මලක් තියා පොහොට්ටුවක් වත් නොතිබුණ බව සැබෑය. තත්වය එසේ තිබියදී ගිය මාසයේ මල් හට ගත්තේය. එයද අසාමාන්‍ය ලෙසකින්ය. ගස පිරෙන්නට අතු පිරෙන්නට මැයි මල්ය. අපූරුය. දකිනා සියළු දෙනා කීවේ එය සුභ ලකුණක් බවය. ඩ්‍රැකියාට පිදූ මල් ගහේ මල් ආ දවසේද හැම එකාම කීවේ එලෙසය. නමුත් මේ මැයි ගහේ මල් හට ගැනීම විශේෂ කොට සෑමාගේ අම්මා දැක්වූයේ ලැබෙන්නට සිටිනා දරුවා පිළිබදව සුභ ලකුණක් බවය. පෙර නිමිත්ත සුභ නිසා බැහැර නොකොට සිතේ තබා ගැනීම හොඳය. පෙර නිමිත්තක් නුගුණ මට්ටමේ නම් එවැනි පෙර නිමිති බැහැර කිරීම හොඳය. ඊටත් වඩා පෙර නිමිති ගැන විශේෂ අවධානයක් නොදැක්වීම හොඳය. සිතට සතුටුය. මධ්‍යස්ථය.

කුඹලාගේ කතාව එන්නේ ඊලඟටය. තඩි කුඹලෙක් සෑමාගේ නිවස ආක්‍රමණය කළේය. උළුවහු අස්සේ ගෙවල් සැදුවේය. දොර ජනෙල් අස්සේද ගෙවල් සැදුවේය. ඉන් නොනැවතී සාලය මැද ඇති වීදුරු ස්ටූල් එකේද ගෙවල් සැදුවේය. “බබාලා හම්බෙන්න ඉද්දී එහෙමයි“ හැමෝම කීවෝය. සෑමා ඒ කතාව අසා සිට දිනක් තම මිතුරෙකුගේ නිවසට ගියේය. අම්මද බොල සාලයේ කොනක තඩි කුඹල් ගෙයක්ය. මිත්‍රයාට සොයුරියන්ද නැතිය. ගෙදර සිටින්නේ මිතුරා සහ දෙමාපියන් පමණක්ය. එය දුටු විටම සෑමා ඇහුවේ කෝ බං උඹලෑ අම්මා කියාය. ඌ ගත් කටටම කිව්වේ අම්මා මචං හොස්පිට්ල් ඇඩ්මිට් කරලා කියලාය. මඟුලක්ය. මිත්‍රයාට වයස විසි අටකට කිට්ටු වෙද්දී මල්ලියෙක් නංගියෙක් ගෙදරට එන්න හදනවා විය හැකිය. කරන්නට දෙයක් නැතිය. අවශ්‍යතාවය ඇති තැන ක්‍රියාත්මක වී ඇති ගතියක් පෙනෙන්නේය. බැරිම තැන සෑමා තම මුව විවර කළේය. “මචං කාසල්ද? සොයිසාද? “ ඇස් උඩ ගිය මිත්‍රයා සෑමාට ජාතිය ඇමතුවේය. “බොට පිස්සද යකෝ.. අම්මට ප්‍රෙෂර් වැඩි වෙලා ඇඩ්මිට් කළේ..“ එහෙනම් කුඹලා වැරැද්දක් කරලාය. අපේ ගෙදර කුඹල් ගෙවල් කඩන්නට නොදී තබා ගත යුතුය. අහවල් එකක් නිසා නොව උන් පව් නිසාය. ටික දිනකින් උන් ගෙවල් හැර ගියාම කඩන එක වෙනම වැඩක්ය. අම්මා නම් කිව්වේ කුඹල් ගෙවල් සුදු පාටට පේන්ට් කළොත් කොල්ලෙක්, වෙන පාටක් ගෑවොත් කෙල්ලෙක් හම්බෙනවා කියාය. හැබැයි කිව්වත් වගේ එක කුඹල් ගෙදරක් සුදුපාට ගාලා තිබුණේය. හම්බුනේ කොල්ලෙක්ය. කුඹලාගේ ගෙදරින්ද සුභ අසුභ සහ අනාවැකි කිව හැකි බව වැටහුණේ එදාය.

සෑමාගේ වත්තේ ගසක මී වදයක් තිබුණේය. එය අලුතෙන් හදපු එකක්ය. එය දුටු බොහෝ අය කිව්වේ එය සුභ ලකුණක් කියාය. එසේම කිසිම කරදරයක් නොකොට තබා ගත යුතු යැයි කීවෝය. දින කිහිපයකින් මී වදය මිසින්ය. මී වදය තියා මී මැස්සෙක්වත් එතැන නොසිටියේය. අහෝ අසුභ විය හැකිය. තිබ්බා නම් සුභ නම් නැති නම් අසුභ නොවන්නේද? සෑමා හැමෝගෙන්ම ඇසුවේය. අම්මාගෙන් කුණු හබ්බ නොඇසූ ටික පමණක්ය. අනෙක් සියළු වදන් අසා ගත්තේය. මී වදය අමතකව ගියේය. බබා හම්බුණේය. ගෙදරට විත් පහුවදා බලන විට ඒ ගහේ ඒ අත්තේම මී වදයක්ය. කලින් සැට් එකමද නොදන්නේය. ඒත් මී වදයක්ය. අම්මාගේ හිත හදන්නට සෑමා එය පෙන්නුවේය. සුභ අසුභ කතන්දර සෑමාට වැඩක් නැත්තේය. අම්මාගේ හිත හදන්නට පෙන්නුවේය. දැන් සතුටින්ය. බබා ගෙදර ආවාට වැඩිය මී වදය රීප්ලේස් වී ඇති නිසාය. අනාවැකි, පලාඵල වලින් ලැබෙන ආතල් එක එයය. නරක දේවල් නම් අමතක කොට, හොඳ දේවල් නම් පොසිටිව් වී සිටීම තරම් දෙයක් ලොවෙත් නැත්තේය. 

හොස්පිට්ල් එකෙන් නික්ම ගෙදර එන්නට හදන මොහොතේ සිස්ටර් කෙනෙක් සෑමාගෙන් ඇසුවේ දැන් බබාට නමක් දැම්මාද කියාය. මල් මඟුලක්ය. වෙලාව බැලිය යුතුය. අකුරු තේරිය යුතුය. කාටවත් නැති නමක් ගැලපිය යුතුය. සම්ප්‍රදාය එයය. නැත්තම් නඩුවක්ය. “ඩිස්චාර්ජ් කරද්දිත් නම් දාගෙන ගෙදර යන අය ඉන්නවද?“ සෑමා සිස්ටර් ඇමතුවේය. “මොකද නැත්තේ ??“ සිස්ටර් පිළිවදන් දුන්නාය. කස්ටිය හොස්පිට්ල් එන්නේ වෙලාවටය. හම්බෙන වෙලාවද දන්නෝය. සීසර් කරන්නට බඩ කපන්නේ සුභ පැත්ත බලාගෙනය. එළියට ගන්නේ නැකතටය. දරුවාගේ වෙලාව කේන්දරය හැදෙන්නේ සුභ විදියටය. සුභ අකුරුද දන්නෝය. එවිට නම හදාගෙනම ඇඩ්මිට් විය හැකිය. සැප නම් කනේය. හොස්පිට්ල් සීසර් පැකේජය සමඟ නම් නොමිලේ දුන්නා නම් වටින්නේය. ඩොක්ටර් සෑමාගෙන් ඇසුවේ සීසර්ද ? නෝමල්ද? කියාය. “අනේ ඩොක්ටර් සූර පප්පා කාටුන් එකේ සීසර් චාටර් වෙන හැටි දැක්කම බබාව සීසර් කරල ගන්න හිතෙන්නෑ, අපි හම්බෙන වෙලාවට නෝමල් ගමු..“ සෑමා කීවේ එපමණක්ය. ඩොකටර් අංකල් සෑමාට ධම්ම පදයේ ගාථාවක් සහිත කාඩ්පතක් අතට දුන්නේය. “සීසර් කරනවා නම් මටත් ලාබයි. ලේසියි. අනික චාර්ජස් වැඩියි. ඒත් මමත් කැමති නෝමල් ගන්නවාට.“ ඩොක්ටර් කීවේය. ඩොක්ටර් දුන් කාඩ්පතේ තිබුනේ මේ ගාථාවය.

නක්‌ඛත්‌තං පටිමානෙන්‌තං, අත්‌ථො බාලං උපච්‌චගා;
අත්‌ථො අත්‌ථස්‌ස නක්‌ඛත්‌තං, කිං කරිස්‌සන්‌ති තාරකාති.


නැකැත් බලා උපරිමයෙන් කෙළවාගත් නායකයන් සිටින්නෝය. අපද කෙලවා ගත යුතු නැත්තේය. කිසිවක් කරන්නට නියම වේලාව එම මොහොත යැයි බුද්ධ දේශනාවය. එහෙත් සම්ප්‍රදායට අනුව අපේ උන් හිත හදාගන්නේ වැඩක් කරන්නට නැකැත් බැලීමෙන්ය. කතාව ඇත්තය. අප මෙන්ම ජෝතිෂ්‍යකරුවෝද කීයක් හෝ හොයා ගත යුතුය. ජීවත් විය යුත්තේය. සෑමා කියන්නේ යමක් කරන්නට නැකැත් බලා ප්‍රමාද වෙනවාට වැඩිය අප්‍රමාදව, හරි දේ හරි තැනදී කළ යුතු බවක්ය.

මා පමාද’මනුයුඤ්ජේථ – මා කාමරතිසන්ථවං
අප්පමත්තෝ හි ඣායන්තෝ – පප්පෝති විපුලං සුඛං

නැකැත් පස්සෙ දුවන බාල ජනයා ප‍්‍රමාද වෙන විදිහට, ප‍්‍රමාදයේ ඇලී ගැලී වසන්ට එපා. ඔය කාම සැපයට ඇලෙන්න එපා. කාමයත් එක්ක එකතුවෙන්ටත් එපා. අප‍්‍රමාදීව බණ භාවනා කරගත්තොත් මහා සැපයකට පත්වෙන්ට පුළුවනි.

-ජේතවනාරාමයේදී නැකැත් ක‍්‍රීඩාවක් අරභයා වදාළ ගාථාවකි.

sAm_ශ්‍රී_Perera_2:50pm_09/05/2015

Tuesday, May 5, 2015

පන්සල් ගොස් වන්දනා කරන්නේ කෙසේද?


උප්පැන්නයට අනුව ඔබගේ ආගම බෞද්ධ නම් ඔබ යන්නේ පන්සලටය. කතෝලික නම් යන්නේ පල්ලියටය. මුස්ලිම් නම් මුස්ලිම් පල්ලියටය. හින්දු නම් කෝවිලටය. උප්පැන්නයට අනුව අදහන ආගම ධර්මය තීරණය වී දෙවියන්, බුදුන් දැක ආගම අදහන්නේ ඒ ඒ තැන් වලට ගොස්ය. සෑමා බෞද්ධ නිසා පන්සලටද, කිටියා කතෝලික නිසා පල්ලියටද යන්නෝය. දෙදෙනාම යන්නේ එකටය. වෙසක් දවසේද මුලින්ම පල්ලියේ පූජාවට ගියේ හවසය. ඒ එන ගමන් ගියේ පන්සලටය. මඟ දිගට දන්සැලක් දෙකක් වදිමින් පන්සල් ගියේ ආගමික වතාවත් කරන්නටය. වටේ ඉන්නා උන්ට කරදරයක් නැතිනම්, කොයි දේවාලේ ගියත් අවුලක් නැතිය. එහෙත් පන්සලේ හාමුදුරුවෝද, පල්ලියේ පූජකයාද, කෝවිලේ පූසාරිද, බලන්නේ තමන්ගේ ගොඩ වැඩි කර ගැනීමටය. ධර්මයෙහි, ආගමෙහි පිහිටවන්නට නොවේය. ඒ ගැන පල්ලි කතාවක් සෑමා ලියුවේ වෙඩිම අස්සේය


මිශ්‍ර විවාහ පිළිබඳ ගැටළුව බොහෝ විට එළි බහින්නේ පල්ලියෙන්ය. එම ලිපිය කියවූ බොහොමයක් ප්‍රශ්න ඇත්තෝ සෑමා ඇමතුවේ තමන්ගේ මිශ්‍ර විවාහ ගැටළු වලට පිළිතුරු ලබා ගන්නටය. විටක සෑමාගේ බ්ලොග කියවන කතෝලික රසිකාවියක් සෑමා සමඟ විවාදයකට පවා පැටලුනේ පල්ලියකින් එවැනි බලපෑමක් කිසි දිනක එල්ල විය නොහැකි බව කියමින්ය. නමුත් එම ලිපිය කියවා බෞද්ධ සහ කතෝලික ලෙස මිශ්‍ර පෙම් සබඳතා පවත්වන බොහෝ දෙනෙක් සෑමාගෙන් විස්තර ඇසුවේය. සෑමා ඒවාට පිළිතුරු දුන්නේ හද පිරි සතුටින්ය. සෑම ආගමකම, ධර්මයකම (විකෘති නොවූ) කියා දෙන්නේ නිවැරදිව ජීවත් වන ආකාරය නිසාවෙන් ආගමක් යනු ආදරයකට ප්‍රශ්න නොවේය. අනෙක් ආගම් ගැන කතාන්දර පසෙක තැබූ විට සෑමාට කතා කිරීමට අයිතිය ඇත්තේ බෞද්ධාගම ගැනය. පන්සල් යෑම ගැනය. මන්ද මේ වෙසක් සතිය නිසාය.

කිටියා සහ ඇගේ අක්කා සෑමා සමඟ වෙසක් දා පන්සල් ගමනට ආ නිසා සැමාගේ පන්සල් වන්දනාව බලා සිටි බව තේරුණේ නිවසට ආ පසුය. උන් ඇසුවේ මොකක්ද බොල ඒ වැදිල්ල කියාය. වැඩි වේලාවක් ගත නොවීය. වෙසක් නිසා පන්සලේ තදබදයක්ය. ඒ අස්සේ ධාතුන් වහන්සේලා වන්දනා කරන පිරිස්ය. ගෙදරින් කඩාගෙන ගිය මල් බෝධිය, චෛත්‍යය, සහ බුදු පිළිම වහන්සේට පිළිවෙලින් පූජා කොට සෑමා සිතින් මල් පූජා කරන ගාථා කීවේය. පහන් පත්තු කරනා ගමන් පහන් පූජා කරන ගාථාද සිතින් කීවේය. සුවඳ දුම් පූජා කරන ගාථා සිතින් කීවේ හඳුන් කූරු පත්තු කරමින්ය. පැන් කළ රැගෙන බෝධි මළුව වටේ පැදකුනු කරන අතර බෝධි වන්දනා ගාථාද, ඉතිපිසෝ ගාථාවද සිතින් කීවේය. ඉන්පසුව ධාතුන් වහන්සේද වන්දනා කොට සෑමා ගෙදර ආවේය. උක්ත ගාථා බෝධින් වහන්සේ දෙස බලා ශබ්ධ නගා ගායනා නොකියවීමෙන්ද, දණ ගසාගෙන කල් නොමැරීමෙන්ද, අපේ උන්ගේ සිත් අවුල් වී තිබුණේය. ඉනපසු කල්පනා කළ සෑමාට සිහිවූයේ ඇත්තටම තමන් කළ දේ වැරදිද කියාය. ඇත්තටම පන්සල් ගොස් වන්දනා කළ යුත්තේ කෙසේද කියා සංවාදයක් ඇතිකොට පිළිතුරු සොයා ගත යුතු බව සෑමාට සිතුනේය. 

එදා පන්සල් මළුවේ සිටි සමහර උදවිය බෝධි පූජාවල නියැලමින් සිටියෝය. එවිට කළ යුතු වතාවත් අපි සැවොම දන්නා කරුණුය. පන්සල් ගොස් වන්දනා කිරීමද හැමෝම දන්නා කරුණක් විය හැකිය. එහෙත් බෝධිය දෙස බලාගෙන බොහෝ වෙලා වන්දනා කරන ඇත්තෝද සිටින්නෝය. බුදු පිළිම දෙස බලාගෙන බොහෝ වෙලා සිටින ඇත්තෝද සිටින්නෝය. විටක ඔවුන් ගාථා කියා සිත් නිවෙනා තුරු නිදහස් සිතින් බලා සිටිනවා විය හැකිය. සමහරු තමන්ගේ සිතෙහි ඇති දුක කියනවා විය හැකිය. එලෙසම සමහරු ගාථා කිව්වාට කියන්නේ ගිරා පෝතයක් ලෙසය. පාලි පාඨයන්ගෙන් සමන්විත නිසා තේරුමක් නොදැන විය හැකිය. ඒ නිසා සෑමාගේ ඉල්ලීම මේ ලිපිය අවසන තමන් පන්සලකට ගොස් වන්දනා කරන ආකාරය, කමෙන්ට් එකක් ලෙස ලියා තබන ලෙසය. එවිට එය අපිට සංවාදයකට ලක් කළ හැකිය.

මෑතකදී සෑමාගේ අක්කාගේ දියණිය යන පෙර පාසලේ දරුවන්ට පුහුණුවක් ලෙස සීල ව්‍යාපාරයක් පවත්වා ඇත්තේය. සෑම පෙරපාසල් දරුවෙක්ම පාහේ බොහොමයක් ගාථා දන්නෝය. බුදුන් වදින ගාථාවේ සිට පන්සල් ගොස් වදින බොහොමයක් ගාථාද, දෙමාපියන් වදිනා ගාථාද දන්නෝය. එහෙත් එක් එක් ගාථාව කියන්නේ කුමන අවස්ථාවටදැයි වෙන් කර ගන්නේ තරමක් වැඩිහිටියන් වෙන විටය. මන්ද පුංචි උන් කියන්නේ කට පාඩමින්ය. සිංදු කියනා ආකාරයෙන්ය. එදා සීල ව්‍යාපාරය හැසිරවූ ස්වාමීන් වහන්සේ පුංචි උන්ගෙන් අසා ඇත්තේ මල් පූජා කරන ගාථාව කුමක්ද කියාය. එවිට අත ඉහළට ඔසවා නැගිට සිටි පුංචි එකියක් පිළිතුරු දීමේ අවස්ථාව ලබාගෙන ඇත්තේය. පසුව ඇය තාලයට “රෝස මලේ නටුවෙ කටූ..“ ගීතය කියා ඇත්තේය. පැමිණ සිටි කිසිවෙක් ඇයව උපහාසයට නොගෙන පැහැදිලි කර ඇත්තේ මල් පූජා කරන ගාථාව “පූජේමි බුද්ධං කුසුමේනනේන..“ කියාය. 



සවි ජා නො භවං හෝතී
සවි ජා නො පරා භවෝ
ධම්ම කාමෝ භවං හෝති
ධම්ම දෙස්සී පරා භවෝ ......!

දියුණු වෙන කෙනා හඳුනා ගැනීමට ලෙහෙසි
පිරිහෙන කෙනා හඳුනා ගැනීමට ලෙහෙසි
දියුණු වෙන කෙනා ධර්මයට කැමති
පිරිහෙන කෙනා ධර්මයට ද්වේශ කෙරති...

එලෙසම පන්සල් ගොස් ඔබ කටයුතු කරනා ආකාරය ගැන කමෙන්ට් එකක් තබනා ලෙස ඉල්ලා සිටින්නේ කරනා දේ නිවැරදිව අර්ථවත්ව සිදු කරවීමේ අවශ්‍යතාවය නිසාය.

Written_by_sAm_ශ්‍රී_Perera_9:45pm_05/05/15

Sunday, May 3, 2015

ආමිසයෙන් ප්‍රතිපත්තියට දොර ඇරේ...


කොහෙ නම් කූඩු හදන්නද? බටයක් කපා ගන්නට තැනක් තියෙනවද? ඕවාට වෙලාවක් තියෙනවාද? වෙසක් කූඩු ගැන කතා වෙන විට මේ දිනවල වැඩියෙන් ඇසෙන නිදහසට කාරණා බොහෝය. සියල්ල යාන්ත්‍රීකරණය වූ වර්ථමානයක, සියල්ල මුදලට විකිණෙන වර්ථමානයක, තමන් අතින් නිමවෙන වෙසක් නිර්මාණයක් දැක සතුටු වන්නේ බොහෝ අල්පයක් දෙනාය. වෙසක් සතියක ගෙදර පිරිසක් එකමුතුව, කූඩු බැඳ, සව් කොළ අලවා, එල්ලා හැඩ බැලුවේ ඉස්සරය. දැන් සව් කොළ ඇලවූ අට පට්ටමේ සිට, සැකිල්ල පමණක් ඇති අටපට්ටම දක්වාම කූඩු රැගෙන එන්නේ කඩයෙන්ය. සව් කොළ ඇලවූ කූඩුවක් රැගෙන ඒමෙන් වැඩේ ඉතා පහසු වන්නේ කූඩුව එල්ලා ලයිට් දැමීමේ කාර්යය පමණක් නිවැසියාට ඉතිරි වෙන නිසාය.

ඊයේ සෑමාගේ ගෙදර ආ මිතුරෙකු කියා සිටියේ තමන් කඩෙන් කූඩු දෙකක් ගත් බවක්ය. සැකිල්ල පමණක් ඇති කූඩු දෙකක් රැගෙන මිතුරා ගෙදර ගොස් ඇත්තේ සව් කොළත් රැගෙනය. කූඩුව සම්පූර්ණව සුදු සව්කොළ අලවා නිල් පැහැති රැලි දැමීම මිතුරාගේ අදහස වී තිබුණේය. කූඩු දෙක මේසයක් මත තබා සව්කොළද පසෙකින් තබා මිතුරා සිය පවුල අමතා කූඩුව අලවන ලෙස ඉල්ලා සිට ඇත්තේය. මොහොතකින් ඔහු අතට ලැබී ඇත්තේ පාප්ප ස්වල්පයක් සෑදු වලදක්ය. එතැන් පටන් මිතුරාට කූඩුව අලවන්නට සිදු වී ඇත්තේ තනිවමය. කතාව අවසනට මිතුරා කීවේ “අනේ මන්දා මචං, ඔහොම එකක් දන්නවා නම් මම අලවපු කූඩුවක්ම ගෙදර අරන් යනවා“ කියාය.

වෙසක් කූඩු, වෙසක් තොරණ් ආදිය ඇතුලත් වන්නේ ආමිස පූජාවටය. දන්සැල්, සීල ව්‍යාපාර ආදී කටයුතු අයත් වන්නේ ප්‍රතිපත්ති පූජාවටය. බුද්ධ දේශනාව නම් වැඩිපුරම නියැලිය යුත්තේ ප්‍රතිපත්ති පූජාවේ බවය. ආමිසය නොකළ යුතු කටයුත්තක් නොවූවත්, ආමිසය තරමක් දුරට කළ යුතුය. එලෙසම ආමිසය වැඩිපුර දකින්නට හැක්කේ වෙසක්, පොසොන් පෝය වලදීය. මන්ද ඒ සමයේ වෙසක් කලාප ආදියෙහි දර්ශණය වන්නේ කූඩු සහ තොරණ් නිසාය. ගෙදරකට කූඩුවක් හදන්නට නොලැබීම ගැන කණගාටුවනවාට වඩා සිතිය යුතු කරුණක් බුද්ධ දේශනාවේ සඳහන්ව ඇත්තේය. එනම් ආමිසය බැරි නම් ප්‍රතිපත්ති පූජාවට හෝ එක් විය යුතු බවය. යහපත්ව සිතිය හැක්කේ එවිටය. මේ පාරත් අපේ ගෙදර කූඩුවක් නැතැයි කියා මිලට ගත් කූඩුවක් ගෙනත් එල්ලුවාට කම් නැත. විටක ඒ ඔබ කාර්යය බහුල නිසා විය හැකිය. නමුත් පෝය දින ලැබෙන නිදහසින් කොටසක් වැය කොට පන්සලකට ගොස් හෝ නිවසේ සිට හෝ ධර්ම කරුණු පිළිබඳ කියවීම, ඇසීම කළ හැකි නම් ඔබට එල්ලන්නට බැරි වූ කූඩුවේ වටිනාකම සම්පූර්ණයෙන් ප්‍රතිපත්ති පූජාව හරහා ජනිත වන්නේය. තමන්ට ආමිසයෙන් කර ගත නොහැකි වූ දේ ප්‍රතිපත්තිය හරහා කර ගැනීමට වෙර දැරීම අගනේය.

හැමදාකම මිනිසුන් මනින්නේ කූඩුවේ තරමය. තොරණේ උසය. බල්බ් දැල්වෙන ආකාරයය. විටක ඇස් බොඳකර තොරණ දිහා බලන්නේ බල්බ් වල ලස්සන බලන්නටය. එහෙත් තොරණේ ජාතකය අසන උන් නැතිය. තොරණේ ජාතකය දන්නා උන් නැතිය. ඒ මදිවාට තොරණ අයිතිකරුවන් කරන්නේ ජාතකයට වඩා ආධාරකරුවන්ගේ නම් කියන එකය. කවියෙන් උන්ට පින් දෙන එකය. තොරණක කතාව සම්පූර්ණයෙන් අසන්නට බැරි නම් කළ යුත්තේ ජාතකයේ නම බලා, පිළිවෙලින් රූප රාමු බලා කතාව අවබෝධ කරගැනීමට උත්සාහ කිරීමය. තොරණක ප්‍රධාන අරමුණ ධර්ම දානයක්ය. කිසියම් දහම් කරුණක් ජනතාවට ලබා දීමය. විටක තොරණක් දුටු සැනින් එයද වෙසක් කූඩුවක් මෙන්ම ආමිස පූජාවක් ලෙස, ආලෝක පූජාවක් ලෙස සිතෙන අවස්ථා එමටය. එහෙත් එය හුදෙක් ධර්ම දානයක් නිසාම ප්‍රතිපත්ති පූජාවට ඇතුලත් විය යුතුය.

මේ කියන්නට හදන්නේ ආමිසය අත හැරිය යුතු බවක් නොවේය. බුද්ධ ධර්මයේ ප්‍රතිපත්ති පූජාව අවධාරණය කොට ප්‍රමුඛත්වය දී ඇති බැවින් ම ආමිස පූජාවට තැනක් ඇත්තේම නැතැයි නූතන සමහර බෞද්ධයන් පන්සලට නොයන, බෝධිය නොවඳින, මල් පහන් පූජා නොකරන තත්වයට පත්වා ඒවා හෙළා දැකීම අභාග්‍යයක්ය. අර්ථවත් ආමිස පූජාව ප්‍රතිපත්ති පූජාවට මුල් වන බව ඉතිහාසය සාක්ෂි දරන්නේය. බෞද්ධ උත්සව මෙරට ආරම්භ වූයේ මිහිදු හිමි වැඩම කළ දා සිටය. බුදු දහම හඳුනාගත් මිනිසුන් ආමිස පූජා වල නිරත වන්නට වූවෝය. එය ක්‍රි.පූ 3 සියවසේ අශෝක යුගයේ සිට ආරම්භ වූවක්ය. බුදුදහම සිත් තුළට කාවැද්දීම සඳහා නොයෙක් ආකාරයේ සංකල්ප ක්‍රියාත්මක වූ තැන එහි මුල් තැන ගත්තේ උත්සවයි. එනම් ආමිසයයි.


ආමිසයට මිනිසුන් ගරහන තත්වයට පත්වී ඇත්තේ මල් පහන් පූජාව බුද්ධ පූජාව වැනි උතුම් ආමිස පූජා තරගකාරී වාණිජ සංකල්ප වලින් අන්ධ භක්තිය සිදු කරන බහුතරයේ ක්‍රියා පටිපාටිය නිසාය. සිද්ධස්ථාන අපිරිසුදු කෙරෙන තෙල් කුණු පුරවන ලෝකයට ප්‍රදර්ශනය කිරීමට ඇතැමුන් කරන ප්‍රදර්ශනය ආමිස පූජා නිසා ආමිස පූජාව ප්‍රතිඵල රහිත යැයි සැලකීම අප්‍රබුද්ධ චින්තනයේ විපාකයයි.

අර්ථවත් ව කරන ආමිස පූජාව ප්‍රතිපත්ති පූජාවට දොර ඇර දේ. ශ්‍රද්ධාව පාදක වන්නේ ප්‍රඥාව බව නොදැනීමෙන් ආමිස පූජාව කොන් කිරීම නිවැරැදි ක්‍රියාවක් නොවේ. ආමිස පූජාව අර්ථවත්ව සිදු කළ හොත් මහත්ඵල මහානිසංස දායක ය.

“ශ්‍රද්ධාවෙන් පිරී ගිය හදින් ආමිස පූජාවක් කිරීමෙන් පිබිදෙන්නේ ප්‍රතිපත්ති පූජා මනසයි.”

එසේ නම් අප කළ යුත්තේ ප්‍රතිපත්ති පූජාවට මඟ විවර කර ගැනීමය. කෙලින්ම දාන, ශීල, භාවනා ආදියට යොමු වීමට මැලි වන බෞද්ධයන්ට ආමිස පූජාවට වඩ වඩාත් නැඹුරු වීමෙන් ප්‍රතිපත්ති  පූජාවට ආරම්භයක් ලබා ගත හැකි බව සිතට ගත යුතුය. නැති නම් ඔවුන් හැමදාම කරන්නේ මල්, පහන් පූජාවේ සිට, පන්සල් යෑම දක්වාද බැන වදිමින්, තමන් නිවසේ සිට ධාර්මිකව කටයුතු කරනවා කියා එලොවටත්, මෙලොවටත් වැඩ නැති අන්ධ භක්තිකයන් වීමය.
Related Posts Plugin for WordPress, Blogger...