විශේෂ කාර්යය බලකායේ නන්දේ.. - STF Nande !!

ඉස්සර සෑමා ලිව්වේ කුලේ අංකල් ගැනය. පොරගේ කතා කිහිපයක් ලියා තබා පැත්තකට වී සිටියදී දැන් අපේ ගමේ හන්දියේ රඟපාන්නේ කුලේ අංකල් නොව නන්දේය. නන්දේ යනු විවාහවී සිට බිරිඳ හා දරුවන් විසින් ඈත් කර තබන ලද අයෙක්ය. දන්නා හැටියට නන්දේගේ වත් බිරිඳගේ වත් අයුතු සම්බන්ධතා නැතිය. නන්දේව නිවසින් බැහැර කරන්නට හේතු වී ඇත්තේ බීමත් කමය. දවසේ පැය විසිහතරම පාහේ බීමත්ව සිටින ඔහුව නිවැසින් බැහැර කොට ඇති බව ඔහුම කියන්නේය. නමුදු තම දියණිය සහ බිරිඳ පිළිබඳව අප්‍රමාණ සෙනෙහසකින් සිටින බවක් පෙනෙන්නට ඇත්තේය. එහෙත් ඒ සෙනෙහස නිසාම බීමත් කම අතැර නිවසට යන්නට ඔහුට නොසිතෙන්නේ මන්ද?

මෙය නන්දේට හොරෙන් ගත් ඡායාරූපයක්ය.

නන්දේ යනු විශේෂ බලකායේ සේවය කළ අයෙක්ය. ඔහු මුලදී එසේ කීවද අප විශ්වාස නොකළේ කොන්ඩය සහ රැවුල වවාගෙන වීරප්පන් වගේ පෙනුමක් සහිත බුලත් විට කන අයෙකු ලෙස සිටින නිසාය. නමුත් ඔහු ඒ කාලයේ කළ කී දෑ කියනා විට, හැසිරෙන ආකාරයට සහ ලද තොරතුරු මත ඔහු විශේෂ බලකායේ බව පැහැදිලි වූයේය. පොසොන් පොහෝ දින හදිසියේම අප මිදුලේ ගසා තිබූ බෞද්ධ කොඩිය ගලවාගෙන ගොස් අඩි ගණනාවක් උස විදුලි කණුවක ගසන්නට තරම් පිස්සුවක් ධෛර්යයක් සහිත වූ නන්දේ මෑත භාගයේ තවත් කොඩියක් ගැසුවේය. ඒ තම මිතුරෙකු වූ නිමල් මිය යැම හේතුවෙන්ය. නිමල් යනු නන්දේ සමග එක බෝතලේ බියර් බීපු අයෙක්ය. නන්දේ සැරිසරන්නේ අපේ හන්දියේ බියර් ෂොප් එක ලඟම නිසාත්, අතේ මිටේ මුදල් ගැවසෙන නිසාත් ඔහුට මිතුරන් වැඩිය. එසේම දිනකට ශරීරගත වන ඇල්කොහොල් ප්‍රමාණයද වැඩිය. 

නන්දේට පත්තර බෙදා හැරීමේ ජොබ් එක ලබාදී, අප නිවසේම පහත මාලයේ පැත්තක ඔහුට නේවාසික පහසුකම් දී, බීමෙන් මුදවා, කෑමට සිත යොමු කරවිම අපේ ගෙදර උදවියගේ අදහස වූයේය. ඒ අනුව ක්‍රියාත්මක වූ අපේ තාත්තා නන්දේ සමඟම දිනක් පුවත් පත් බෙදා හැරීමේ යෙදුනේ නන්දේට අප කස්ටර්මර්ස්ලා හඳුන්වාදීමටය. එදින තාත්තා පිටුපසින් තවත් බයිසිකලයක නැගී ගිය නන්දේ නැවත මෙහි ආවේ කෙඳිරිගාමින්ය.

“අනේ ඉස්කෝලෙ මහත්තයා මට මේ රස්සාව නම් කරන්න පුලුවන් ඒත් සර් වගේ ඉක්මනට ගෙදර එන්න බැරිවෙයි..“

“ඒ මොකද මම හයියෙන් පැද්දෙ නැහැනෙ.“

“අනේ මන්ද සර්, මගෙ කකුල් දෙකත් රිදෙනවා, හැබැයි මට සර්ට වැඩි ප්‍රමාණයක් පත්තර නම් ගෙනියන්න පුලුවන් වෙයි.. ඒත් ටිකක් වෙලායයි ගෙදර එන්න..“

“ඔය පළවෙනි දවස නිසානේ.. ටික දවසක් පුරුදු වුණාම හරියයි..“

“අනේ නෝනා මේ මහත්තයව කොහෙන්ද හොයා ගත්තේ..“

“ඇයි නන්දේ එහෙම අහන්නේ..“ අම්මාද සින් එකට ඇන්ටර් වෙයි.

“අනේ නෝනා මහත්තයා බයිසිකලේ පැදගෙන යද්දි හයේ හතරෙ කොල්ලෙක් පාර අයිනේ සර්ට වැන්ඳානේ..“

“අහ්.. ගෝලයෙක් වෙන්න ඇති..“

“මම අද තේරුම් ගත්තා සර්ට තරම් මිනිස්සු ආකර්ශණය කර ගන්න පුලුවන්කමක් කාටවත් නැහැ කියල..“

“නන්දෙත් නොබී ඉඳල බලන්නකෝ..“

නන්දේ වෙනුවෙන් ගරාජ් එක පැත්තේ ඇඳක් සූදානම් කොට තිබුණද නන්දේට ඒවා හරි යන්නෙ නැතිය. පොර කාඩ් බෝඩ් කැබලි දමාගෙන නිදාගත්තේ අපේ කඩය ඉස්සරහ පඩියේය. රෑ කෑම දුන්නද පොර කන්නෙ නැතිය. ඇල්කොහොල් පමණක්ය. නන්දේ පහුවදා උදේ තාත්තා කඩේ අරින විට පෙනේනට නොසිටියේය. නැවත මතු වූයේ දහවල් කාලයේය.

“පාන්දර කොහෙද ගියේ..??“

“නෑ සර්.. සර් කඩේ අරිනකොට මම මොකාද වගේ උදේම මුලිච්චි වෙන්න හොඳ නැහැනේ.. ඒක නිසා මම කලින්ම ගියා..“

තාත්තාගේ නිහඬතාවය නිසාම නන්දේ යලි තමා ආ කාරණාව කියා සිටියේය.

“සර් මම මේ බයිසිකලේ ඉල්ල ගන්න කියල ආවේ..“

“ඔය තියෙන්නේ අරන් යන්න..“

නන්දේ බයිසිකලය රැගෙන ගියේය. දින 3ක් යනතුරුම නන්දේ ආවේ නැත. අපේ ගෙදරින් හොයන්නට ගියේද නැත. දිනක් අපේ තාත්තා හන්දියට ගොස් ඇත්තේ නන්දේව විපරම් කළද නන්දේ සිටියේ නැත. දිනක් සෑමා හන්දියේ බුද්ධික අයියාගේ කමියුනිකේෂන් එකේ සිටියදී කමියුනිකේෂන් එකට ආ අයෙක් කියා සිටියේ අන්න සර්ගේ බයිසිකලේ නන්දේ උකස් තියලා කියාය. එවිට මට හකස් ගා හිනා ගියේ මීට පෙර නන්දේ සිදු කළ දෙයක් මතක් වූ නිසාය. 

දවල් කාලයේ නන්දේ වැඩිපුරම සැරිසරන්නේ හන්දියේ බුලත් කඩේ අවටය. එහි සිටින මාර්ටින් අංකල් නන්දේ අත රුපියල් තුන්දහස් ගණනක් යවා තම විදුලි බිල් ගෙවා එන ලෙස ඉල්ලා ඇත. නන්දේ මුදල් රැගෙන අපේ හන්දියෙන් බස් එකක නැගී හෝල්ට් කිහිපයක් ඉදිරියෙන් ඇති බාර් එකකින් බැස, කන පැලෙන්න බී නැවත පැමිණ ඇත්තේය. දින කිහිපයක් කුලී වැඩ කොට එම මුදල පියවන්නට තරම් නන්දේ අවංක වී ඇත්තේය. ඒ ගැන ඇසූ දිනක මට නන්දේ කීවේ “අනේ මහත්තයා මම යන බස් එකෙන් පැනල ගිහින් බිව්වේ..“ කියාය. ඒ සිද්ධිය සිහිවෙද්දී, අපේ තාත්තාගේ බයිසිකලය උකස් තබා නන්දේ බිව්වා යැයි කියද්දී මට සිනා පහළ නොවීම පුදුම සහගත නොවන්නේය.

දින කිහිපයකට පසු නන්දේ නැවත මෙහි ආවේය. රැවුල ඒ මේ අත කරකවමින් සහ අතගාමින් නන්දේ බයිසිකලය තල්ලුකරගෙන ආවේය. තාත්තා සහ අම්මා පහළට බැස්සේ නඩුව විසඳීමටය. එහෙත් නන්දේ යනු අහන දේට උත්තර නොදෙන, විකාර කියන ඩයල් එකක් නිසා එය අසාර්ථක වන බව මම කලින්ම දත්තේය. අවසන නන්දේ කීවේ මට පොඩි ප්‍රශ්න වගයක් ආව නෝන මහත්තයා, ඒකයි ආවෙ නැත්තේ.

ඒ පිළිතුරින් සහ බයිසිකලය ලැබීමෙන් පසු සියළු ප්‍රශ්න අහවර වූවද නන්දේ මා ඇසූ ප්‍රශ්න වලට පිළිතුරු දුන්නේය.

“ඇත්තට මොකද අප්පා වුණේ..“

“මහත්තයා කොල්ලෙක්.. කවදාවත් කොල්ලෙක්ට බොරු කරන එකෙක්ට හරි යන්නෙ නැහැ.. ඇත්තම කතාව මේකයි.. මම දැක්ක දවසක් ඉස්කෝලෙ මහත්තයා මාව හොයන්නත් එනවා..“

“හරි ඉතිං බයිසිකලේට මොකද වුණේ කියන්න කෝ..“ නන්දේ පිලිතුරු දෙන්නේ අහන ප්‍රශ්නයට නොවන නිසා මම ඇසුවෙමි.

“හරි මම කියනදේ අහන්න කෝ.. එදා සර් මාව හොයන්න හන්දියට ආව.. මම දැක දැක පොඩ්ඩක් සර්ව මිස් කරල පැත්තකට වුණා..“

“හරි දැන් ඔයා බයිසිකලේ උකස් තිබ්බෙ ඇයි..??“

“උකස් තිබ්බා.. ??“ නන්දේ කිසිවක් සිතා ගත නොහැකිව ඇසුවේය.

“ඔව් මගෙ යාලුවෙක්ගෙ ගෙදරකට ඔයා උකස් කරල තිබ්බෙ..“ මම නන්දේට බොරු කීවේ ඇත්ත දැන ගැනීමටය.

“නිමලගේ මලගෙදරට අටපිරිකරක් දෙන්න වුවමනාවක් මට තිබුණා මහත්තයා.. ඒකයි මට සල්ලි හදිස්සියක් වුණේ..“

නන්දේ එහෙම කිව්වාට නිමලේගේ බණගෙදරට නන්දේ පූජා කළ අටපිරිකරක් නැති බවක් පසුව ආරංචි වූවේය. එහෙත් ඇත්ත කුමක්දැයි දන්නේ නන්දේ පමණි. ඊයේ පෙරේදාද නන්දේ පහත්වී හොරෙන් අපේ ගෙදර බයිසිකලයක් රැගෙන යනු දැක ඇත්තේ සැලුන් එකේ සුරේඛයාය. නන්දේගේ පෙර වැරැද්ද දන්නා සුරේඛ නන්දේව අල්ලාගෙන ඇත්තේය. 

“ඒයි.. කොහෙද ඔය යන්නේ..“

“මම ගෝනවලට ගිහින් එන්න යන්නේ..“ කියමින් නන්දේ කටට ඇගිල්ල තබාගෙන ඇත.

“ඉතිං බයිසිකලේ අරන් යන්නේ???“

“කැගහන්න එපා.. මට අපේ ගෙවල් පැත්තට යන්න ඕනෙ.. පවුලගෙන් බැනුමක් අහල ආවෙ නැත්තං මට දැනෙන්නේ නැහැ..“

කියමින් ගිය නන්දේ, මෙවර නම් බයිසිකලය රැගෙනම ඇවිත් තිබුණේය.

Written by sAm_ශ්‍රී_Perera_12:15pm_10/11/13