ගුරාගේ කාඩ් ගැහිල්ල.. - How Gura Played with Cards !!

ගුරුන්ටත් අකුරු වරදින්නේය. එහෙම කීවේ ඉස්සරය. දැන් සග, වෙද, ගුරු, ගොවි, කම්කරු කියන පංච මහා බලවේගයටම අකුරු වරදින්නේය. කතිරය වැරදුන තැන සිට හැම එකම වරදින්නේය. ඒවා වැඩක් නැතිය. මේ කියන්නට යන්නේ අපේ එකෙක් ගැනය. ඌටත් වැරදුනේය. බුවාගේ නම අපි කියන්නේ ගුරා කියාය. හරි නම ලියැවුනේ නැතත් ගුරා කීවාම උගෙ නම කියවී හමාරය. ඇග පත ඉන්විසිබල් හල්ක් වගේ වුණාට වයසින් පොඩි එකාය. හැම එකාටම කතා කරන්නේ “අයියා..“ කියාය. ගුරා හොද එකාය. මෑතකදී ඔපීසියේ වැඩක් ගුරාගේ කරමත වැටුනේය. ඒ අපේ සැට් එකටම විසිටින් කාඩ් ගහන වැඩක්ය. ගුරාගේ නම සහ බැංකු ගිණුම් අංකය අපේ හැම එකා අතටම දුන්නේ ගුරාගේ ගිණුමට මුදල් බැර කිරීමටය. ඒ සමගම අපේ නම්, දුරකථන අංක, ආදී සියළු විස්තර ගුරාගේ දුරකථනයට කෙටි පණිවිඩ මගින් දැනුම් දීම සිදු කෙරුනේ වැඩේ අකුරටම සිද්ධ කර ගැනීම සදහාය. අපේ මැනේජර්ලාගේද නම් අදී විස්තර ගුරාට ලබා දුන්නේ ඔවුනටද විසිටින් කාඩ් ගසා ගැනීමේ පරමාර්ථයෙන්ය. ඒ අතර එක මැනේජර් කෙනෙකු ගුරාට ඔහුගේ පරණ විසිටින් කාඩ් එක ලබා දී තිබුණේය. ඒ මැනේජර් පට්ටමට උසස් වීම ලබන්නට පෙර සාදන ලද එකක්ය.

සති කිහිපයකින් අපට විසිටින් කාඩ් ලැබුණේය. කිසිම අවුලක් නැතිය. කාඩ් එකේ මෙටීරියල් එක ටිකක් අවුල් වුණාට සෑමාගේ කාඩ් එකේ විස්තර නිවැරදිව තිබුණේය. සෑමා තමන්ගේ නම එතරම් සුලභ නොවන නමක් නිසා ඉන් බැට කා ඇති වාර අනන්තය. ඉංගිරිසියෙන් සමින්දික කියා ලියුවොත් සමහර ටීචර්ලා කතා කලේ ක“ යන්න වෙනුවට කා“ යන්න දමා ස්ත්‍රී ලිංග කරලාය. එහෙමත් නැතිනම් කවුරුන් හෝ නම ඇහුවොත් දහ දොලොස් පාරක් නම කියන්නට වෙන දඩුවම විද ඇති නිසාය. වෙනත් අයෙකු සෑමාගේ නම ලියුවොත් එය ලියන්නේද වැරදියටය. ස“ යන්න වෙනුවට චමින්දික කියා ලියූ අවස්ථාද බහුලය. එවන් දඩුවම් විද ඇති නිසා සෑමා කාඩ් එක ගත් හැටියේම නම කියවා බැලුවේය. අනේ කිසිම අවුලක් නැතිව නම හරිය. හිත සතුටින් කාඩ් එකක් කියවා බලා සෑමා එය උඩ සාක්කුවේ ඔබා ගත්තේ අමතක වීමකින්ය. ඉතිරි කාඩ් මිටියම සෑමා කැබිහෝල් එකේ බැස්සුවේ මග තොටදී නංගිලාට දෙන පරමාර්ථයෙන් නොව, රාජකාරී කටයුතු සදහාමය.

කාඩ් සිද්ධියෙන් පසු අපේ සැට් එකම නැවත එකම වේදිකාව හමුවූයේ මල ගෙදරකදීය. අප මිතුරෙකුගේ පියා නැතිවීමේ සොවින් අප එහි රැස්ව සිටියදී අපේ එවුන්ට කාඩ් සීන් එක ඇදී ආවේය. කාඩ් එකේ හොද නරක පිළිබද ප්‍රශ්න මතු වෙද්දී සෑමාට සිහි වූයේ එදා උඩ සාක්කුවේ දමා ගත් කාඩ් එක පැය දෙකකට විතර පසු එළියට ගනිද්දී තෙත් වී තිබි අයුරුය. ඒ තරමට මෙටීරියල් එක සිරාය. ඒ අතර අපේ මුරේ තම අදහස් දැක්වූයේය. මුරේ කීවේ ස්පයිඩර් මෑන් ආච්චී දුටු එකාය.

“ගුරා මගෙ කාඩ් එකට තමයි බං මරුම ආතල් එක දුන්නේ..“

“ඇයි බං මොකද සීන් එක?“

“මූ නම දෙකට කඩල ගහල බං.. මේ තියෙන්නෙ කාඩ් එක..“ 

මුරේ කාඩ් එක දිගු කළේය. මුරේගේ නම MURALI SRINIVASAN ය. එය කාඩ් එකේ ගසා තිබුණේ තනිකරම කැපිටල් අකුරෙන්ය. එහෙත් SRINIVASAN වචනයේ අකුරු අතර පරතරයක් තිබුණේය. එහි එය සටහන්ව තිබුණේ SRINIV ASAN ලෙස වී සහ ඒ අකුරු අතර පරතරයකින්ය.

“ඉතිං මේක උබ ගුරාට කිව්වෙ නැද්ද බං“ අපේ එකෙක් අතුරු ප්‍රශ්නයක් නැගුවේය.

“කිව්ව බං ඌ ඒකටත් මාර explanation එකක් බං දුන්නේ..“ මුරේ කීවේ උගේම වචනයෙන්ය.

“මොකද බං කිව්වෙ?“

“මචං ඌ කියනවා V අකුර පොඩ්ඩක් ස්ලෝප් එක තියෙන අකුරක්ලු. A අකුරෙත් පොඩි ස්ලෝප් එකක් තියෙනවනේ. ඒක නිසා ඒ දෙක එකට ලං කරල ලියන්න බැහැලු.“

ගුරාගේ පැහැදිලි කිරීමට අපට හිනා ගියේ අප සිටින්නේ අවමගුල් ගෙදරක බව අමතක කරමින්ය. සැප කනේය.

“ඉතිං බලපං ඌ කියල තියෙන දේත් ඇත්ත නේ බං..“ එකෙක් හිනා වෙමින් කීවේය.

“මාත් සිරා ගත්ත බං. ඒක නිසා මම සද්ද නැතුව හිටිය ආ ඇත්ත නේද කියල..“ මුරේ කිවේය.

“උබත් අමු මෝඩයෙක්නේ බං..“

“හිටපං කෝ කියන්න. ඊට පස්සෙ මට ටීක් වුනේ අපෙ තිවාගේ කාඩ් එක දැක්කම.“

තිවාද අපේ එකෙක්ය. උගෙ නම තිවාගරන්ය. උගෙ නම ලිව්වාමද V A අකුරු දෙකක් එක ලගට වැටෙන්නේය. ඒත් උගෙ කාඩ් එකේ එහෙම අවුලක් නැතිය. V අකුරේ ස්ලෝප් එක් A අකුරට බලපා නැතිය. මුරේ මෙය දැක නැවත ගුරාට අමතා ස්ලෝප් එක ගැන උගන්වා ඇත්තේය.

“ඉතිං උබ ඌට පෙන්නුවෙ නැද්ද තිවාගෙ කාඩ් එක“

“මම ඌට කෝල් කරල කියල දුන්න මචං. සෙට් වුනෙ නැහැ තවම. සෙට් වුනාම පෙන්නලම කියල දෙන්න ඉන්නෙ...“

“පව් බං ගුරා.. ඌ හොද එකා..“

“එහෙම අවුලක් නැහැ බං. ඌට බයිටක් දාමු..“

“ඇයි උබල දන්නවද අනිත් සීන් එක??“ මුරේ නැවත හඩ අවදි කළේය.

“මොකක්ද බං ඒ?“

“අපේ මැනේජර් මූට කාඩ් එකක් දීල එකෙන් බලාගෙන නම දාල අලුත් කාඩ් එක ගහන්න කියල. මූ කරල තියෙන්නෙ designation එක මැනේජර් කියල දාන්නෙ නැතුව, පරණ විදිහටම ගහලා. කාඩ් සෙට් එකම අපරාදෙ බං..“

සැප කනේය. ගුරා ආයෙත් මෙහෙම වැඩ බාර නොගන්නා බවට ප්‍රකාශයක් කර ඇති බවට ආරංචි ලැබෙන්නේය. ඒ අතර අද සවස සෑමාට මාර ආතල් එකක් වූයේය. එයත් ගුරාගේ කාඩ් සෙල්ලමේ ප්‍රතිඵලයක්ය. එය සෑමාට ලැබුණ කෝල් එකක්ය.

“හොලෝ... සෑම් නේද කතා කරන්නේ..“

“ඔව් කියන්න..“

“මල්ලි මම මේ අද මැක් ඩොනල්ඩ් එක ලගදි හම්බුණ එක්කෙනා කතා කරන්නෙ. අර ඩොක්ටර් ඔයාට කෝල් එකක් දෙයි..“

“ඈැැැ... මොන ඩොක්ටර්ද?“

“මේ සෑම් නේද?“

“ඔව්.. සෑම් තමා.. ඒත් මම කාටවත් මගෙ කාඩ් එක අද දුන්නෙ නැහැනෙ..“

“මේ නම්බර් එක තමා. මේ දවල් නේද මට කාඩ් එක දුන්නෙ. නමත් මේකම නේද? මට රාගමදි අද හම්බුනේ..“

“ඔව් අයයේ. හැබැයි ඔයා හොයන්නෙ සම්පත්ද දන්නෙ නැහැ. එයා අද රාගම. ඉන්න මම කෝල් එකක් ගන්න කියන්නම්..“

සෑමාට හිතුනේ සෑම්/සම්පත් යන නම් දෙක පටලවා ගිය විසිටින් කාඩ් එකක් නිසා සිද්ධ වෙච්ච දෙයක් කියාය. ඒ නිසා සම්පා අමතා ඌව කන්ටැක්ට් කළේය. එහෙත් පසුව සම්පාද කීවේ එවැනි අයෙක් හමුවූයේ නැත කියාය. පැය කිහිපයක පසු ලකියා කෝල් කළේය.

“මාර සීන් එක බං..“

“ඇයි බං..“

“මගෙ කාඩ් මිටිය අස්සෙ උබෙ කාඩ් එකක් තිබිල. මම දවල් එකක් ඇදල එකෙක්ට දුන්නා. ඌ මාව දැන් හම්බවෙලා බැන්න බං.“

“ඔව් මට එකෙක් කෝල් කරල කතා කළා බං.. මම හිතුවෙ සම්පව හොයනව කියල.“

“කැත සීන් එක බං. ඌ කියනව මොනවද බං අනිත් උන්ගෙ කාඩ් බෙදන්නෙ කියල. මම දැන් ඌව හම්බවෙන්න ඇවිල්ල ඉන්නෙ..“

“හරි හරි.. උබ වැඩේ කර ගනින්...“

“ඔව් බං. කෙල්ලෙක්ට කාඩ් එකක් දෙන්නත් බයයි බං.. මම දෙන කාඩ් වලින් උබලට කෑලි සෙට් වෙයි.. අපරාදෙ...“

Written by sAm_ශ්‍රී_Perera_7:23pm_17/08/13