Google+ Followers

Tuesday, October 11, 2011

කෘතිම වැස්ස... (Artificial rain)

අපේ එවුන් මොනවා කළත් විභාගයක් ෆේල් වෙන්නේ නැත. අවුරුද්දෙන් අවුරුද්ද අළුත් පන්ති වලට උසස් වීම් ලැබීම සිරිතයි. කොහොම හරි 8 වසරෙන් එගොඩ වෙලා කස්ටියම 9 වසර‍ට සෙට් වුණා. ඒත් ඉතින් 8 කට්ටියගෙම පෙර වැරදි තියෙන නිසා එකම ක්ලාස් එකකට දාන්නෙ නැහැ. මොනව වුණත් ටීචර්ලට මොලේ තියෙනවනේ. කස්ටියව කලවං කරලා (9 වසර A ඉදන් 9 වසර H වෙනකල්) පන්ති 8කට ඔබන එක තමා කරන්නේ. එහෙම කළත් ආයෙත් ඒ ඒ පන්තිවල අමුතු අමුතු කල්ලි සෙට් වෙන එක සක්‍රයගේ පුතා වයිම ආවත් නවත්වන්න බැහැ. 

නවය වසරේ අපි සෙට්වුණේ මඩුගල්ලේ ටීචර්ගේ පන්තියට. ඒ කියන්නේ 9-D පන්තියට. 8-D වගේම මේ පන්තියත් තිබ්බේ තුන් වෙනි තට්ටුවේ කෙළවරේ. (8-D කේස් ටික කියවන්න). කෙලවරේ පන්තිය නිසාම ෆන් මැක්ස්. මතක හැටි‍යට අපේ පන්තියේ හිටි‍යා... චන්න (පන්ති නායක, දෝදු කුමාර), චමක, රුක්ෂාන් (බොකා), දයාන් (පැනඩෝල්), තුවාන්, උමේෂ් (එහා පන්තියේ වුණාට අපේ පන්තියෙම තමා හිටියේ), ගයාන් (කරුණාතිලක), ගයාන් (ජහරේ), ජාගොඩ, තුෂාන්(ෂෝටා), දමිත් (දමිත්ලා දෙන්නයි), සුදත් (පාරවල් සුදා), චරිත (කොටා), අස්පයා, සාලිය, හනුමා, දිනේෂ්, රසාංගි, දිනිති, අප්සරා,  හර්ෂණී, ශානිකා.... එහා පන්තියේ හිටියා සහන් (ජම්බුවා), යාපා, පුස්පේ, වගේ පට්ට සෙට් එකක්. (තව මිස් වුණ අය මතක් කරලා සපෝට් එකක් දෙන්න)

අපේ පන්තිභාර මඩුගල්ලේ ටීචර් හරිම හොදයි. කස්ටියට කියද්දි මතක් වෙනවා ඇති. ටීචර් පන්තියට ඇවිත් උගන්නනකොට කස්ටියට කිසි කරදරයක් නැහැ. ටීචර්ට කරදරයකුත් නැහැ. පළවෙනි පීරියඩ් එක නිසා කොල්ලො ඇස් පියගෙන ඉන්නේ. ටීචර් කියන දෙයක් අන්තිම පේලියට ඇහෙන්නේ නැති නිසා ඉස්සරහ ‍එවුන් විතරක් පාඩම අහගෙන ඉන්නවා. පිටිපස්සෙම එවුන් අභිරෑපන රංගනයක් බලන් ඉන්නවා වගේ බලාගෙන ඉන්නවා. සමහර දවස්වලට පීරියඩ් එක ඉවර වෙලා ටීචර් ආයුබොවන් කියලා පන්තියෙන් ගිහින් ඒත් සෙට් එක දන්නේ නැහැ. ඒ තරමට ටීචර් උච්ච ස්වරයෙන් කථාකරනවා.


අපේ ක්ලාස් ‍එකේ 4 දෙනෙක් ක්‍රිකට් ටීම් එකේ හිටියා. චමක, තුවාන්, රුක්ෂාන් සහ දයාන්. චමක පස්සෙ දවසක ටීම් එකේ කැප්ටන් වුණා. රුකා වයිස් කැපා වුණා (ඊට පස්සේ කැප්ටන් තනතුරත් දැරුවා). දන්නවනේ ඉතින් ක්‍රිකට් කරපු එවුන්ගේ වැඩේ චුයිංගම් හපන එක. ඉතින් මුන් ටික කරන වැඩේ උදේම හැමෝගෙම කටේ චුයිංගම් ඔබනවා. ඉතින් අපේ එවුනුත් හරක් වගේ ඒක දවසම හප හප ඉන්නවා.


මේ කාලේ ඉතින් කස්ටිය කෑම මුලක් දිග අරිනකන් තමා බලන් ඉන්නේ. කෙලවරේ පන්තියේ බත් එක දිග ඇරියම මුළු සෙක්ෂන් එකම පැනලා කනවා. ඉතින් කෑම එක දිග අරින්න කලින් ඇදිරි නීතිය දාන්න ඕනේ. කොහොමත් අපේ එවුන් දෙවෙනි, තුන් වෙනි පීරිය‍ඩ් වලදි කෑම කාලා ඉවර කරනවා. වෙනදා වගේම උදේ පීරියඩ් එක ඉවර කරලා මඩුගල්ලේ ටීචර් පන්තියෙන් ගියා විතරයි ඔන්න පුරුදු පරිදි බත් මුලක් දිග ඇරියා.


"අන්න මචෝ " අතන බත් එකක් දිග ඇරලා. චන්නයා බත් එක පෙන්නන්න කලින්ම කස්ටිය සෙට් වී හමාරය. ඒ බලනකොටත් 5,6 දෙනෙක් ඩෙස් පුටු පෙරලගෙන බත් එකට පනිමින් සිටියහ.


"කොහෙ කන්නද බං චමකයා උදේම ඇවිත් අපේ කටේ චුයිංගම් ඔබනවා. දැන් බත් එකට පැන‍්නොත් චුයිංගම් එකත් අපරාදේ..." චුයිංගම් එක දත් අස්සේ ගසාගෙන මම කීවෙමි.


"මොන අපරාධයක්ද බං මෙන්න මෙහෙම චුයිංගම් එක ඩෙස් එක යට අලවපං, පස්සේ කමු" ‍කටේ තිබ්බ චුයිංගම් එක අතට ගෙන හොදින් කරකවා බලා 'දයාන්' (ඒ කාලේ අපි කීවේ පැනඩෝල් කියලා. නම වැටුණ හැටි පස්සේ බලමුකෝ) චුයිංගම් එක තම ඩෙස්ක් එක යට ඇලවීය.


"ඊයා බං. උබ ඒක හෙට කනවද?" චමක ඇසුවේ තමන් සමග එකට ක්‍රික්‍රට් ප්රැක්ටිස් කරන දයාන් ගැන දන්නා බැවිනි.


"පිස්සුද බං බත් කාපු හැටියේ කන්න බැහැ. හෙට කමු" කියමින් දයාන් බත් මුලට පැන්නේය.


උදේම කටේ දාගත් චුයිංගම් එකට පෙරේතකමේ අපි බත්පත ඉදිරියේ පතිවත රැක‍්කෙමු. අපේ එවුන්ට පාන්, බනිස් වගේ සරල ආහාර ගත්තාට කිසි ප්‍රශ්නයක් නැත ඒත් බත් එකක් ගිල්ලොත්, නූඩ්ලස් එකක් ගිල්ලොත් ප්‍රශ්න රැසකට මූණ දෙන්නට සිදුවේ. බත් කෑවහම ඇගිලිවල ගෑවෙන නිසා අත හේදිය යුතුමය. එත් 3න් වෙනි තට්ටුවේ ඉන්න අපට අතහේදීමට පහලට බැසීමට සිදුවේ. ඒක නිසා සමහරෙක් කරන්නේ අත පොලිෂ් වනතුරු ලෙව කෑමය. නැතොත් අත දැලෙන් එළියට දමා වතුර බෝතලය හලා අත් සේදීමය. එහෙම හෝදනකොට සැලකිලිමත් විය යුතුය. නැත්නම් කවුරු හරි පහලින් ගියොත් ඉදුල් බැරල් ගණන් නාන්නට වේ. කලින් පෝස්ට් වගේම පන්තියේ පිහිටීම සහ අත හෝදන තැන ගැන සරළ අ‍වබෝධයක් පහළ රෑපයෙන් ගමු. නැත්තම් කථාවේ ආතල් කැඩේ.



මේක ආදර්ශ රෑපයක් විතරයි. මේ වගේ 3 වෙනි තට්වක ඉදලා තමා කට්ටිය අත් හෝදන්නේ



පළවෙනි බත් එක අහවර උනත් බත් මුල් දෙක තුනක් දිග ඇරෙනකොට අපිට බලා ඉන්නටම බැරිය. බැරිම තැන චුයිංගම් එක දැලෙන් එළියට විසිකර අපිත් කෑමට සෙට් වීමු.


"සෑම් වතුර බෝතලේ ගනින් අත හෝදන්න" චන්නයා මගේ බෝතලේ ගෙන දැලෙන් එළියට දමා අත හෝදන්න සෙට්වේ.


"පොඩ්ඩක් හිටු අපි කාලා ඉවරයි අපිත් හෝදන්න ඕනේ" හනුමා (තිළිණ) පැන අත දැලෙන් එලියට දමා සේදීමට පටන් ගත්තේය. තිළණ සමග බත් කෑ සියල්ල එළියට අත් දමා වතුර බෝතලය හිස් වෙනතුරු අත් සේදූහ. ඇත්ත තමයි අපේ ශාරීරික අධ්‍යාපනය උගන්නන සර් (පීටීයා) කියලා තියෙන්නෙත් කෑමට පෙර පසු හොදට අත් හෝදන්න කියලා. කෑම දිරවලා ටොයිලට් ගියාමත් හෝදන්න කිව්වා.
*******
ඔන්න ඉතින් පහුවෙනිදා ආයෙත් උදේම ටීචර් පන්තියට ආවා. වෙනදා වගේ නෙවේ ටීචර්ගේ මූණත් ටිකක් අවුල්. ආ.. කියන්න අමතක වුණානේ. අපේ ටීචර්ගේ දුවෙක් හිටියා "ලංකා" කියලා. එයත් දෙයියනේ කියලා අපේ ඉස්කෝලෙටම පත්වීම අරගෙන ආවා ඉංග්‍රීසි උගන්නන්න. එයා ඉගැන්නුවේ එහා පන්තියට. ඒත් අපේ එවුන් අපේ ටීචර්ට වැඩිය එහා පන්තියේ ඉන්න ටීචර්ගේ දුවට ආදරෙයි. ඇත්තනේ අපේ ටීචර් කළේ සිංහල, දුව කළේ ඉංග්‍රීසි. අපේ එවුන් ඉතින් සුද්දෝ වගේ ටීචර් පස්සේමයි.


එද ටීචර් ආපු වෙලේම දයාන් චුයිංගම් එකක් හපනවා. මේක මීටර් වුණේ චරිත(කොටා)ටය.


"මොකද බං උදේම චුයිංගම් හපන්නේ. ටීචර් දැක්කොත් බැනුම් අහපං" සාලී කීවත් දයාන්ට ගාණක් නැත.


"ඒ උබට කොහෙන්ද බං චුයිංගම් මම අද කාටවත් චුයිංගම් දුන්නේ නැහැනේ" චමක පිටිපස හැරී දයාන්ගෙන් ඇසීය.


"උඹම දෙන්න ඕනේද බං චුයිංගම්. මම ඊයේ අරන් තියල ගිය එක කන්නේ.." දයාන් ඊයේ ඩෙස්ක් එකේ ඇලවූ චුයිංගම් එක උදේම කටේ දමගෙන ඇත.


"හොදයි හොදයි ගද යන්න කාපං" චන්න එසේ කියන ගමන් මගේ වතුර බෝතලය අරන් උගුරක් බී ‍තම ඩෙස්ක් එක උඩම තබා ගත්තේය. මාත් ඉල්ලන්නට ගියේ නැත.


කීවා ‍වගේම ටීචර්ගේ මූණ සවුත්තුය. අසරණ බැල්මක් පන්තිය සිසාරා හෙලයි. අපේ එවුනුත් හිතා ගන්න බැරුව ටීචර් දිහා බලං ඉදී.


"ළමයි ඕගොල්ලෝ හැසිරෙන විදිය අන්තිමයි" බැරිම තැන ටීචර් කීය. අනිවා ටීචර් දයාන්ගේ චුයිංගම් එක දැක ඇත.


"ඔයාලා කරන වැඩ වලින් මගේ නම තමයි කැත වෙන්නේ. අනිත් ගුරුවරු බනින්නේ මගේ පන්තියෙ ලමයි නරකයි කියලා......" ටීචර් නන්ස්ටොප් දුක කියයි. අපේ එවුන්ට ප්‍රශ්නාර්ථයකි.


"ඇයි ටීචර් මොකක්ද වැරැද්ද අපිට කියන්න අපි හදා ගන්නම්" බැරිම තැන පන්තියේ ගුණගරුක නායකතුමා චන්න නැගිට ඇසීය.


"ආ ඔයා නායකයා නේද? නැගිටලා කියන්න බලන්න අපේ පන්තියේ ලමයි මෙතන දැලෙන් අත් එලියට දාලා හෝදනවා නේද?" චන්නට කට උත්තර නැත. ඊයේ හේදුවේත් පන්ති නායකයා මූලික වීමෙනි.


"නැහැ ටීචර්. අපි හෝදන්නේ නැහැ." චන්නයා නයා ඇරියේය.


"බොරු කරන්න එපා ලමයි. මම ඊයේ උගන්නලා පන්තියෙන් එළියට ගිහින් පඩිපෙල බැස්සා විතරයි. මෙන්න එකපාරට වැහි පොද ගහනවා. මම මගේ බෑග් එකෙන් කුඩේ අරන් ඉහල ගත්තා වැස්සක් කියලා. ටික දුරක් ගිහින් හැරිලා බලනකොට ඔය ලමයි අත් හෝදනවා දැක්කා" ටීචර් අසරණව කීය. කස්ටිය සද්ද නැත.


"අනේ ඔව් ටීචර්. ඒත් අපි ඉදුල් හෝදන්නේ නැහැ. බැරිම වූණාම පහලට යන්න වෙලා නැති වුණාම තමා හෝදන්නේ" චන්නයා නැගිටගෙනම කීය.


"මරු නායකයා. පන්තියේ එවුන් වැරදි කරනවා. මෙයා සුද්ද කරනවා. ඔන්න ඔතන ඔයාගේ ඩෙස්ක් එක උඩ තියෙන රතු පාට බෝතලෙන් තමා කට්ටිය ඊයේ අත් හේදුවේ" ටීචර් කීවේ චන්නට කට උත්තර නැතිවෙන ලෙසය. චන්නයා ඉල්ලගෙන කෑවේ මගේ බෝතලේ ඩෙස්ක් එකේ තබා ගෙනය.


"ඒ මදිවට කියනවා ඉදුල් හෝදන්නෙත් නැහැලු. මම කුඩේ අකුලලා බෑග් එකේ දාගත්තා ලමයි අද උදේ බලනකොට ගදේ බැහැ. ගොටුකොළ කෑලිත් කුඩේ පුරාම. මීට පස්සේ ඒ වගේ බලු වැඩ කරන්න එපා"


උපදේශය.....
*** ගුරුවරු කියන දේ පිළිපැදිය යුතුය. එදායින් පසු හැම දිනකම අපි එළියට අත් නොසේදුවෙමු. ෂොපිං බෑග් එකකට ඉදුල් වතුර පිරෙන ‍සේ හෝදා දැලෙන් එලියට දමා කරකවා ඈතට විසි කළෙමු***


Written by sAm_1.20pm_11.10.'11

4 comments:

  1. Digatama liyapan hema ekatama comment damme neti unata okkoma wage kiyewwa. maru .maxaaaaaaaaaa

    ReplyDelete
  2. Thnks macho, Name eka add kalanam comment ekata godak watinawa... :)

    ReplyDelete
  3. lanka teacher wa mata mathak wenawa ban

    ReplyDelete
  4. @sahan: eka thamai kattiya ayet schol yanna oni kiyanne..

    ReplyDelete

Related Posts Plugin for WordPress, Blogger...