අවුරුද්දට එපා.. අරක්කු.. - No Alcohol for the STN !!!

“අම්මේ... හැම පාරම අපිට තමා නැත්තෙ..“

“මොනවද දැන් නැත්තෙ?? තොපිට හැමදාම නැහීගෙන කරන්නෙ මම.. අප්ප කියල එකෙක් ඉන්නවද? කියලවත් තේරෙනවද???“

“එහෙම නෙවේ අම්මෙ.. අර එහා පැත්තෙ රසිකලා ඔන්චිල්ලාවක් බැඳගෙන දඟලනවා.. මම වැට ලගට ගියාම උන් මට දිව උලුක් කළා..“

“ඔන්චිල්ලා.. දැන් එච්චරයි අඩු...“

“මහ දෙයක්ද අම්මෙ.. අර තැඹිලි බාන ලණුව තියෙන්නෙ.. කොස් අත්තට තියල බැන්ද නම් ඉවරනේ..“

“අම්මද බොල මූ මට ඒ ටිකත් කියල දෙන්න එනවා...“

“මතක නැද්ද අම්මෙ.. ගිය පාරත් ලණුව ගැට ගැහුවෙ අර උඩින් තියෙන මහ කොස් අත්තෙ නේ..“

“දැන් මේ චීත්ත රෙද්දත් ඇඳගෙන මමද මහ කොස් අත්තට බඩ ගාන්න ඕනෙ..“

“නැහැ අම්මෙ.. අම්මා තාත්තට කියන්න.. අපි කිව්වොත් බැනුම් අහන්න වෙයි... පව් අම්මෙ නංගිත් ආස වෙයි ඹන්චිල්ලා පදින්න...“

“නංගිද කැමති උඹද කැමති කියල බලා ගන්නම් බැඳ ගත්තට පස්සෙ... මහ එකාට කියාපිය. අවුරුද්ද කියල බෝතලේ ඉනේ ගහගෙන ගම පුරා ඇවිදින්නෙ ඔය..“

*****

“මොකද බොල අම්ම අරහෙ කෑ ගහන්නෙ??“

“අපි පොඩි බඩ්ඩක් ඉල්ලුවා තාත්තෙ...“

“දැන් මොනවද කියපල්ලා කෙරෙන්න ඕනෙ..“

“නංගිට ඔන්චිල්ලාවක් බැඳලා දෙන්න කිව්වෙ..“

“ඉතිං තොපි ඕක අම්මට කියල හරි යනවද? මට කිව්ව නම් මම කරල දෙනව නේ.. ගිය පාරත් ඔය මඟුල බැන්දෙ මම නේද??“

“හරි ඉතිං තාත්තෙ බැඳල දෙන්න කෝ..“

“අරන් වරෙන් අර තැඹිලි බාන කඹේ.. ඔය එහා පැත්තෙ මඩුවෙ දාල ඇති..“

****

“ඔය ඉනිමඟ තියල නගිනවා මනුස්සයෝ.. වෙරි මර ගාතේ කෝම බඩ ගාන්වද මන්දා..“

“අනේ මේ නිකං කට කියවන්නෙ නැතුව ඉන්නවා.. මේ වගේ ගස් වලද මම නැග්ගෙ...“

“හරි අම්මේ.. තාත්ත වැඩේ කරයි.. කෑ ගහන්න එපා..“

“හරි.. හරි.. තාත්තල පුතාල එකතු වෙලා වැඩේ කර ගන්වලකෝ.. මොනව හරි වුනොත් මම නම් එන්නෙ නැහැ පැත්ත පලාතෙ..“

“උඹ කුස්සියට ගිහින් කන්න මොනව හරි හදපං කට වහගෙන.....“

****

“තාත්තේ මේ කෑල්ල ඇති වෙයිද?“

“හිටු.. තියලම බලන්න..“

“පොල් පිති කෑල්ල නම් ඇති වගේ.. ඒත් හයිය මදි.. බර වැටුනම ඉරෙයිද දන්නෙ නැහැ..“

“දැනට මේකෙන් පදිමු තාත්තෙ.. ලෑලි කෑල්ලක් තමා හරි යන්නෙ හැබැයි..“

“ලෑලි කෑල්ල හයිය වුනාට බොල, ඉදගත්තම පුක රිදෙනවා.. පොල් පිත්ත සනීපයි..“

“එහෙනම් දැනට මේක තියමු..“

“ඕක ඉරුනොත් කියපං.. මම එකක කපල දෙන්න....“

“හරි.. නංගි තල්ලු දායි.. මම ඉඳගත්තා..“

“දැන් තෝ තනියම පඳිනවා නෙවෙ ඕක..“

“හරි තාත්තෙ.. නංගි පනහයි.. මම පනහයි...“

****

“ඔයාට හයියෙන් තල්ලු කරන්න බැහැ නංගි.. බලන්න මම කොච්චර හයියෙන් තල්ලු කළාද??“

“මට ඔච්චර තමා පුලුවන්. බැරිනම් බහිනවා..“

“අනෙ මේ පැත්තකට යනවා. මම තනියෙන් අඩිය ගහලා වේගෙ වැඩි කර ගන්න..“

“හරි.. පැත්තකට වෙන්නම්.. හැබැයි ඔයාගෙ පනහ ඉවර වුණාම බහින්නෝනි..“

“හරි මඟුලක් නේ.. මම පැදගෙන මෙයාව පද්දවන්න... “

“එහෙම බැහැ හරිද? එහෙනම් මම තල්ලු දාන්නම්..“

“අපෝ එපා.. එපා.. ඉන්නවා තව ටිකක් පැදල දෙන්නම්..“

****

“කට කියෙව්වට එයාත් එහෙම තමා..“

“ඇයි මොකෝ..“

“මොනවද අයියෙ නපුරු වැඩ කරන්නෙ.. මටත් දානවාකෝ හයියෙන් තල්ලුවක්..“

“හයියෙන් ඕනෙ නම් මම වගේ අඩිය ගහලා උඩ යනවා..“

“කොහෙ යන්නද?? මගෙ අඩිය වදින්නෙ නැහැනෙ..“

“එහෙනම් කට පියන් ඉන්නවා..“

“අනේ....“

“හරි හරි ඉන්නවකෝ...“

****

“අම්මේ... දුවලා එන්නෝ...“

“මොකෝ බොල බෙරිහන් දෙන්නේ..“

“ලණුව ගැලවුණෝ.. නංගි මඩුවේ වහලෙ උඩට විසික් වුණෝ...“

“මම කිව්ව මේ මිනිහට සිහියෙන් ඉදපන් කියල.. කෝ දැන්...“

****

Written_by_sAm_ශ්‍රී_Perera_8:17am_10/04/14