Friday, July 2, 2021

ත්‍රීවීල් අයියා - Three wheel brother !!

හදිස්සියට පාරක් අහ ගන්නට ඉස්සර ඉදන් අපිට උදව් කළේ ත්‍රීවීල් අයියලාය. ඕනෙම වෙලාවක වීල් පාක් එකකට ගියොත් උදව්වක් ගන්නට පුලුවන් බව කිව යුතු මනාය. පාරක් අහන්නට, බාර් එකක් අහන්නට, ඕනිම ගමක අප්ඩේට් එකක්, ගොසිප් එකක් සෙනික අප්ඩේට් වෙන්නේ වීල් පාක් එකටය. ගමේ කෙනෙක් වීල් එකේ යන ගමන් කරන්නේ අර පුටු පුටු සද්දෙ අස්සේ වීල් එකෙ අයියාව කේලමකින්, දේශපාලනයෙන් හෝ තර්ක සාස්ත්‍රයෙන් අප්ඩේට් කිරීමය. ඉන්පසු සියලු ගොසිප් හෝ දැනුම හෝ පාක් එකේ සාමාජිකයන් සෙට් එක අතරේ සංකලනය වී අපූරුම නිවුස් රැසක් සොයාගැනීම් හෝ නිපැයුම් රැසක් සමාජයට එකතු වන්නේ ඇසුරු සැනින් ය.

ගමේ එකා පිට එකා වෙන් කර හදුනා ගැනීමට ඔවුන්ට හැකි ය. ගමට පිටින් ආ එකා, ගමෙන් පිට පැන්න එකා ඔවුන් ගේ දත්ත ගබඩාවේ සටහන්‍ ය. අහිම්සක එකී, අහවල් එකී සහ වල් එකී ඔවුන්ගේ මෙමරියේ අප්ඩේට් ය. එහෙව් තත්වයක් තිබියදී ශ්‍රී ලංකා පොලිසියට ත්‍රීවීල් 2000ක් ගෙන්වන්නේ රාජානුග්‍රහයෙන් ය.

ඉතිං වීල් එක්ක ගණුදෙනු දැන් සුපරික්ෂාකාරී විය යුතුය. වෙනදාට ඕනෑම ගමක බැස මල් කෑල්ලක් සොයන්නට වීල් එකකින් අසන්නට කිසිවෙකු නොපැකිලෙන බව කවුරුත් දන්නා සත්‍යයක් ය. දැන් එහෙම කරන්නට පෙර දෙවරක් සිතිය යුතුය. එවැනි සෑම දෙයක්ම දැන් හරිම රිස්කිය. එලෙසම වීල් සෙට් එකක් බැස අපි පොලිසියෙන් කිව්වොත් අනේ නෑ ඔයාලා පොලිසියේ නෙවේ කියන්නටද බැරිය. කෝකටත් ආරක්ෂාවට පහත ක්‍රියාමාර්ග අනුගමනය කිරීම නුවනට හුරුය. පොලිස් හා සාමාන්‍ය ත්‍රීවීල් වෙන්කර හඳුනාගන්නා තුරු අපිට සමා කාලයක් ලබා දෙන ලෙස ඉල්ලා සිටිය යුතුය.




⚠️️සෙනික u ටර්න් ගසන වීල් වලට නොබනින්න.


⚠️️වීල් එකකට අත දමන්නට පෙර දෙවරක් හිතන්න.


⚠️️අඩියක් ගසා වෙරි මතේ වීල් වලට නොනගින්න.


⚠️️සිග්නල් නොදමා හරවන හෝ වමට සිග්නල් දමා දකුණට කරකවන වීල් වලට නොබනින්න.


⚠️සියලු ️වීල් වලට ගරු කරන්න.


⚠️️ෆෝන් එක කනේ තියන්නට පෙර දෙපස වීල් තිබේදැයි බලන්න.


⚠️️අධික වේගයෙන් වීල් පසුකර නොයන්න.


⚠️️සැම විටම වීල් වලට ප්‍රමුඛතාවය ලබා දෙන්න.


තත්වය එසේ තිබියදී වෙන්කර හදුනා ගැනීමට පහත ත්‍රීවීල් වැකි හෙවත් වීල් ටැග්ස් සමාජගත කරමි. ඔබේ එව්වාද පහළින් කොටන් යන්න.


කැළණිය බෝඩරේ

අතහිත ඕඅයිසී ගෙන්

මාංජු සාක්කුවේ - චන්ඩි දැන් බෝක්කුවේ

ආවා සොයා ආදරේ

ඉංග්ලිශ් අකුරු තුනේ ලොක්කා

පොලිසිය නෑ ආතල් දන්නේ

විකසිත ආදර ප්‍රාර්ථනා 

ඉන්ස්පෙක්ටර් ලකී


Written_by_sAm_sRi_8:00am_02.07.2021

Thursday, June 24, 2021

දුමින්දාගමනය - Duminda Arrives !!


අද පොසොන්ය. ඒ කියන්නේ කලා ශිල්ප ගණනාවක් සමඟ ලංකාවට අනුබුදු මිහිඳු හිමි වැඩම කළ දවසය. උදේම නැඟිට්ට ගමන් කරන්නට උනේ ඉස්කෝලෙ වැඩක්ය. සෑමා ඉස්කෝලේ නොගියාට පුත්‍රයා ඉස්කෝලේ යන්නේය. යනවා කිව්වට කොල්ලා යන්නෙ ලැප්ටොප් එක ලඟටය. ගිහින් ලැප් එකට වැඳ, පන්සිල් කියන්නේය. ඉන්පසු ස්ක්‍රීන් එක දිහා බලාගෙනම පාසැල් ගීය හා ජාතික ගීය කියා පාසැලේ වැඩ අරඹන්නේය. දැන් ඉස්කෝලේ යෑම එහෙමය. ඉස්සර වැඩිහිටියෝ පොඩි උන්ට හෙවත් අපිට විහිලු කළේ උබලා වැස්සකටවත් ඉස්කෝලේ ගිහිල්ලා තියෙනවා යෑ... කියලා ය. දැන් ළමයි ලොකු උන දාක මුල් ළමා විය ගැන කුමන ජෝක්ස් එළියට ඒ දැයි සැකය.

පොසොන් පොහොය නිසා ගෙදර සෙට් එකම එකට ඉදගෙන දුර පේන තැනිතලා ගැන ගීතයක් ගායනා කළ යුතු බවත්, එය වීඩියෝ කළ යුතු බවත් සහ එය පාසැලේ ගෲප් එකට එවිය යුතු බවත් කිව්වේ ටීචර් ය. අන්තිම දවසට කලිනුත් ටීචර් කිව්වේ ළමයි හැට නම ලක්සයෙන් එකම දරුවයි තවම එව්වේ කියාය. ඒ අපි නොවේ වෙන දරුවෙක් ය. ඊයේ උදේ කිටියා ඕගන් එක ගසද්දී කිහිප වරක් රිහසල් කළ අපි එක වර වීඩියෝ කර යූ නල ගත කළේ ඒ වීඩියෝ එකය. ටීචර්ට වීඩියෝ එක යැව්වාම ඇය කිව්වෙ අනේ නයිස් අම්මා, බට් කට්ටිය හිටං කිව්වා නම් මැක්ස් ප්‍රෝ කියලාය.

 මල කෙලියක්‍ ය. වන් ශොට් වීඩියෝ එක ගත්තේ ආයි පොඩි උන් තුනක් එක්ක හිටං කරන්නට බැරි නිසාය. ඉදන් කළේ උන් මෙල්ල කර ගැනීමටය. ෆෝන් එක කබඩ් එකක් උඩ අටවා ශේප් එකෙ ගත් වීඩියෝ එක නැවත කැටයම් කළ නොහැකිය. ඒ නිසා අනේ ටීච මේ අමාරුවෙන් කළේ මීට වඩා බෑ කියූ විට ඈ ඕකේ කිව්වාය. ඒ නිසා ටීචර් හොඳය. <3

උඩහ කඩේ අක්කා පෝයට බිත්තර දෙන්නේ නැතිය. ඇය කියන්නේ පෝයට බිතතර දෙන එක පෞ කියාය. ඉතිං පෝයට දාන බිත්තර වලට කිකිළී මක් කරනවාද දන්නේ අක්කාය. එක දවසක් ඇය කිව්වේ අනේ මල්ලී අතට දෙන්න බෑ ඔයාම අත දාලා බිත්තරේ ගන්නවා නම් ඕකේ කියාය. එදා බිත්තරේ ගත්ත දා සිට පෞල කිව්වේ අපි පෝයට සෝයා කමු කියාය. ඒ නිසා ඊයේ සෑමා දඩයම් බට්ටා පැකැට් එකක් ගන්නට කඩේට ගියේය. අක්කා බට්ටා සෑමා අතේ තබන්නට යද්දී එතැනට ආ කඩේ අයියා කිව්වේ බට්ටා එපා මල්ලීට පොලොස් රස එකක් දෙන්න කියාය. අනේ අයියේ අපි ඔරිමජිනල් පොලොස් කොහොමත් කන නිසා අපිට බට්ටාම දෙන්න කියා සෑමා එය ගෙදර අරං ආවේය.

සෑමා උදේ වීඩියෝ එකට සබ්ස්ටයිට්ල් දමමින් නටද්දී කිටියාගෙන් කම්ප්ලේන් එකක් ය. අනේ මේවා ගෙනාවෙ ඇයි. මේකෙ ISO, SLS සහතික නෑනෙ. එවලේ එව්වාට රිප්ලයි නොකළ සෑමා වැඩේ සිහියෙන් සිටියේය. ඒ සහතික දෙන සමාගමේ ඇන්ටී පවා කිව්වේ අනේ ඒ සහතික හරියට දෙන්න ගියොත් මිනිස්සුන්ට කන්න දෙයක් නැති වෙනවා කියාය. ඉතිං එහෙව් රටේ ISO SLS සහතික නැති කඩේ අක්කාගේ බිත්තරේ සෑමාට විශ්වාස බව කිව යුතුය.

වෙසක් පෝයට ඉස්කෝලේ පාඩමට වෙසක් ගැන බුද්ධාගමට කියා දුන්නාට පසු කොල්ලාට ඊළඟ පාඩමට තිබ්බේ පන්සල් ගිහින් පිළිවෙලට වඳින ස්ථාන ගැන සහ එව්වාට වඳින ගාථා ගැන පාඩමක් ය. අවුරුද්දේ මුලම කොල්ලාගේ පොත් සෙට් එක අවබෝධ කරගත් සෑමා දිනපතා හවස බුදුන් වඳින සෙග්මන්ට් එකට ඒ ගාථා ඇතුලත් කළේය. ඒ නිසා කිසිම අවුලක් නැතුව පාඩමට පෙර පිළිවෙලින් චෛත්‍යය, බෝධිය සහ බුදු පිළිම වඳින ගාථා කොල්ලාට පාඩම් විය. හොඳම හරිය උනේ ඉතිපිසෝ ගාථාව වාර විභාගයට ප්‍රශ්නයක් ලෙස තිබීමය. කොල්ලා ගානක් නැතුව කියලා දැම්මේ ඒ ගාථාවය.

පොසොන් වලට කලින් පොසොන්, මිහින්තලය සහ මිහිඳු හිමි ගැන කතා කිව්වාට කොල්ලා දේවානම්පියතිස්ස නම හරියට කිව්වේ ඊයේය. මුල් වාරයේ සර්වමිත්‍ර බමුණා කියන නම කිව්වාට වඩාඒ වචනය අමාරු විය. එහෙව් කොල්ලාට දුර පේන තැනි තලා ගීතය යම්තම් හෝ හුරුවීම අපිට දුමින්දාගමනයට වඩා සතුටුය.

ඉතිං අපි කිරිබත් පිස හන්දියේ බෙදා ලක්ස 69ක් සමඟින් සැමරීමු.


ලින්ක් එක බලා සැදැහැවත් සිත් උපදවා ගන්න.

ඒ උපන් සිතින් සබ්ස්ක්‍රයිබ් කරන්න.


බුදුසරණයි !


Written_by_sAm_sRi_4:00pm_24.06.2021

Thursday, April 11, 2019

අපිරිසිදු ආදරේ !!


නොපෙනනා කඳුළු නීරසයි
ගත පෙගුණු දහඩියම මහ ගඳයි
බුලත් විට මුඛය තිත්තමයි
දෑතෙ කරගැටම තිස් තුනයි

නිය පොත්ත වැදුනොතින් තුවාලයි
ඒ ඇතුලෙ කුණු පිරී ජරාවයි
පිබිදෙනා යටිකයම අවසරයි
පිලිකුලක් නැතිව ඔබ ලඟ හිදියි

මගෙ හුස්ම ඔබෙ නලල තෙමාලයි
ඒ පුසුබ නුබට නම් මහ මෙරයි
අව් රශ්මි පුච්චනා මා ගතයි
පුන්සඳේ දැවටෙද්දි පින තමයි

මගෙ මැණික යැයි කියන නුබ තමයි
කාසි සොයනා හිතට සවි ගෙනෙයි
වැලපෙනා දහවලින් මුදාලයි
සිරි යහනෙ මා රජෙක් කරාලයි

උන්ට නොපෙනෙනා නුබ රැජිණියයි
දැලි දූලි ඔය හුස්මෙ රඳාලයි
මා ජීවෙ ඒ දූලි වසාලයි
හැමදාම ලඟ ඉන්න පතාමයි

Monday, April 8, 2019

අවුරුදු නැද්ද ?




අම්මෝ ඒ කාලෙනෙ අවුරුදු. දැන් නම් මොන අවුරුදු ද? හැම අවුරුද්දේම හැම අයම කියන්නේ එහෙමය. ඉස්සර ඔන්චිල්ලාය. හැමෝම ගෙදරය. කැවුම් කොකිස් මුං අළුවා බදින සුවඳය. කොහා ගස් උඩය. පංච ක්‍රීඩාය. ඔලිඳ කෙලිය ය. රබන් සුරල්ය. එදා ආතල් ය. මෙදා නැතිය.

අවුරුදු කිව්වාම දැන් ඉන්නා හැමෝම කියන්නේ එහෙමය. අපේ මිනිස්සු දකින දේට වඩා ලැබෙන දේවල් වලට වඩා හිතන්නේ කියන්නේ නොලැබෙන දේවල් ගැනය. අවුරුදු නැත්තං කිරිබත්ගොඩ, මහරගම පසු කරන්න මෙච්චර වෙලාවක් ගත වෙන්නේ ඇයි දැයි ප්‍රශ්න කරන්නට කෙනෙක් නැති එක ගැන සිතිය යුතුය. ඉස්සර වගේම අලුත් අවුරුද්දට අලුත් ඇඳුමක් ගන්නට පොඳිකන්නේ අවුරුදු නැති නිසාදැයි ඇසි යුතුය.

අවුරුදු ඇත. එහෙත් අපිට මඟ හැරී හෝ අමතක කර දමා ඇත.

ඉස්සර අවුරුදු මෙන් පොඩි උන්ට ඔන්චිල්ලා බඳින්නට ගසකට නඟින්නට කෙනෙක් දැන් නැත. එක්කෝ ඔන්චිල්ලා පදින්නට තරම් හයිය අතු සහිත ගස් සොයන්න නැත. එහෙමත් නැති නම් ගස් තිබ්බාට ඔන්චිල්ලා බඳින්නට වෙලාවක් වැඩිහිටියන්ට නැත. අවුරුදු පොඩි උන්ට නැති කළේ එතැන සිටය. පංච බෝඩ් එකක් සොයා දෙන්නට කෙනෙක් නැත. කියා දෙන්නට ආච්චිලා සීයලාද නැත. එව්වා එකතු කරගෙන නිවාඩුව ගත කරන්නේ නම් අවුරුද්ද ඉස්සර වගේම ජුන්ඩක් ලැබෙනවා නිසැකය.

ගෙදර කැවුම් කොකිස් මුං අලුවා හදන්නට බැරි නම් එව්වා කඩෙන් ගන්නට හරි ඔබට බැරි නැත. කැවිලි සහිත මේසය සාදා ඉස්සර අවුරුද්ද දකින්නට ඔබට බැරි නැත. රබන් සුරල් නම් අද කරන්නට බැරි දෙයක්ය. කොහා සොයා ගන්නට බැරිය. එදාට හොඳ චැනල් එකක් ටියුන් කළා නම් ඒවාද එකතු කර ගන්නට බැරි නැත.

ඒ සියල්ල පැත්තකට දමා ඉස්සර අවුරුද්ද මෙන් හැමෝම එකට සිටින, නෑකම් යන, හෝ මහ ගෙදරට එකතු වෙන අවුරුද්ද විඳින්නට ඉඩක් දවසක් වෙන් කර ගන්නේ නම් ඉහත කිසිත් නැතුවාට ඔබට අවුරුදු දැනෙනු ඇත.

අනේ දැන් නම් ඉස්සර අවුරුදු නැහැ කියමින් සිටිනවාට වඩා. ඉස්සර අවුරුදු අද හෙට හෝ හැමදාටම මවා ගැනීම ඇත්තේ අප අතේ මිස කාගේත් අතේ නොවන්නේය.

sAmsRi 08/04/19 10:56pm

Friday, April 5, 2019

ඔබමයි !


සැලෙන වීදුරු බිඳෙන
සිහින් කරදර හඬට
සමයි ඔබෙ ගොළු වදන්
හීනයෙන් මා මරන

හැපෙන කුර හඬට සම
ඔබේ රළු බර වදන්
ඉවසමී මා ඉතිං
සැබවින්ම මා හඬයි

මී විතත් මත් කරයි
රෑ ඇසෙන සී පදින්
අඩවන්ව මා තබයි
මුළු රෑම අවදියෙන්

නොනිදනා දූ පුතුන්
නිදවනා තත නුබයි
දරා ඉමි සම සිතින්
පුදා පෙම එක ලෙසින්

Wednesday, April 3, 2019

අයියාගෙ රස්සාව... - Aiya's Job !!


ගමේ උන්ට ඕනේ නැති දෙයක් නැත. පාර අයිනේ නිවස ඇති නිසා පාරේ යන උන්ට සියල්ල පෙනේ. වාහනය හෝදන අතර පාරේ යන ඩෑල් එකක් සෙට් වුනොත් "අහ් මේක හෝදනවා ඉවරයක් නැහැනේ" යැයි කියයි. ආයේ දවසක ඒ පුද්ගලයාම සෙට් වුනොත් "අයියෝ දූවිල්ල නේ.. මේක හෝදන්නේ නැද්ද" යැයි අසයි. පනිට්ටුව, ප්‍රෙෂර් ගන් එක දී හෝදපං කියා කනට දෙන්නට සිතෙන්නේ එවිටය.

ප්‍රෙෂර් ගන් එක කිව්වාම තවත් කතාවක් මතක් විය. ගන් එකක් සල්ලි දීලා ගත්තේ සර්විස් සෙන්ටර් වලට පන්සීය බැගින් පුදන්නට බැරි නිසාය. පන්සියය බැගින් විසි වතාවක් සේදුවොත් දසදහසක ගන් එකක් ගත හැකි නිසා පහසු ගෙවීමේ ක්‍රමයට සෑමා ගන් එකක් ගත්තේය. සෑම සති අන්තයකම ප්‍රෙෂර් ගන් එකෙන් වාහනය හේදීම සෑමාගේ සිරිතය. සර්විස් සෙන්ටර් එකට වැකියුම් කරන්න පුදන මුදලත් ඉතිරි වන්නේ අර අටමා අටවා දුන් රුපියල් 1000ට ගත් වැකියුම් ක්ලීනර් එක තවමත් වැඩ නිසාය. එය වෙළඳපොළ මිල තවමත් රුපියල් 15000ක් පමණය. ඉතිං ඔය සති අන්ත සමහරක සෑමා ප්‍රෙෂර් ගන් එක එළියට ගන්නට කම්මැලි කම නිසා ටැප් එකට හෝස් එක පමණක් ගසා කම්මැලි සේදිල්ලක් සෝදන්නේය. එහෙම හෝදන වෙලාවක දවසක් ආපු ඩෑල් එකක් කිව්වේ අපෝ තියෙන පෙරේතකම සර්විස් එකට දාලා හෝදන්නකෝ කියාය. එවිට සෑමා කිව්වේ ඔව් අප්පා වියදමක් නේ ඒ නිසා අතින් සෝදනවා කියාය. ගන් එක ගැන ඉන්ට්‍රොඩියුස් කරනවාට වඩා ඌව පිටත් කර හෝදන කාර්යය ඉක්මන් කර ගත හැකිය. පසු දාක ගන් එකෙන් සෝදන වෙලාවක ඒ ඩෑල් එකම පැමිණියේය. "ආ අලුතින් ගන් එකක් ගත්තාද? මේක නම් වටිනවා" කියූ විට සෑමා කියුවේ අර එදා ඔයා පෙරේතකම් නොකර සර්විස් සෙන්ටර් එකට යන්න කියපු දවසෙත් මේක තිබ්බා කියාය. මෑන්ස් මිසින්ය.

මෑත දිනයකදී මැෂින් එකෙන් වාහනය සෝදන වෙලාවක කඩේට ආවේ සෑමා පාසැල් සමයේ සිට දන්නා ලස්සන නංගි කෙනෙක්ය. ස්කූල් වෑන් එකේ ගියත් සෑමාව නොදන්නා ගානට ආ නිසා සෑමා ගණනකට නොගත්තේය. කඩේට ගොස් ඇය අම්මා සමඟ චැටක් දමා පත්තරයක්ද රැගෙන ආපසු යද්දී 

"ආ..ඔයා දන්නවද මේ නංගිව?" කියා ඇසුවාය.

"මොකද මම නොදන්නෙ? මෙයානෙ මාව නොදන්නෙ"

"අපෝ නැහැ අයියෙ. අම්මා කිව්වාම මට මතක් උනෙ"

"ඔව් ඔයා අපෙ ස්කූල් වෑන් එකෙනෙ ගියෙ"

"ඔව් ඔව් සරත් අංකල්ගෙ එකෙ.."

"ඔයාගෙ යාලුවා බෝධිනී නේ??"

"අන්න හරි.."

"හෙලේනා එකට නේ ගියෙ??"

"අම්මො ඔයාට ඔක්කොම මතකනේ.."

"අපො අපිට කෙල්ලො ගැන අමතක වෙනවද?"

"මම අයියෙ බැන්දෙ කෑගල්ලෙන්. ටුවින්ස් ලා ඉන්නෙ. දෙන්නම අයියගෙ පුතාගෙ වයස"

"අනෙ හොඳයි නෙ.."

"අයියා මොකද දැන් කරන්නෙ? ඔයාද මේ ගරාජ් එක කරන්නෙ??"

"කොයි??"

"මේ වාහන ගොඩක් ගහල තියෙන්නෙ.. අහ් සෙරි සර්විස් සෙන්ටර් එකක් නේද??"

කඩයට ආ වාහන කිහිපයක් සහ සෑමා සෝදන වාහනය පෙන්වා ඇය සෑමාට ජොබ් එකක් දුන්නාය.

"ඔව් නංගී වාහනයක් හෝදගෙන ෂේප් එකේ ඉන්නවා.."

"අනෙ අයියෙ බබාලා නිසා මමත් ජොබ් එක අතෑරියා. දැන් ගෙදර ඉදන් හරි කරන්න මොනවා හරි දෙයක් බලනවා."

කියමින් ඇය සෑමාට නම්බරය දී පිටත්ව ගියාය.

sAmsRi_04/03/19_11:18pm
Related Posts Plugin for WordPress, Blogger...