පල්ලි යාමේ වරද කළෙමි ?? - Is It Bad to Visit Church For Me ??

මා බෞද්ධ වූයේ මාගේ දෙමාපියන් බෞද්ධ වූ නිසාය. එසේම ඇය කතෝලික වූයේ ඇගේ දෙමාපියන් කතෝලික වූ නිසාය. මෙසේ බොහෝ අය ඒ ඒ ආගම් වලට අයත්ව ඇත්තේ බුද්ධියෙන් විමසා බලා නොව, ආගම ධර්මය අදහා බලා නොව, උපතින්ම තම දෙමාපින්ට අනුව තමන් ලද ආගම, ධර්මය තම උප්පැන්න සහතිකයේ ලියවා ගැනීමෙන්ය. එහෙත් පසුව ඔබ වෙනත් ආගමකට හැරෙන්නට පුලුවන. ඒ ඔබ යම් දහමක් නුවනින් අවබෝධකොට ගෙන හෝ යම් කිසි මවා පෑමකට ගොදුරු වීමෙන්ය. එහෙත් ඔබේ සිත ඇත්තෙන්ම වෙනත් ආගමක්, ධර්මයක්, දර්ශණයක් වෙත ඇදී ගොස් තිබෙන්නේ නම්, එසේත් නැත්නම් යම් විමසා බැලීමක් කරන්නට සිත් වන්නේ නම්, ඔබ අනිවාර්යයෙන් ඒ අදාල ආගමික ස්ථානයට යනවා නොඅනුමානය. ඒ අනුව බෞද්ධ අයෙක් සිත වෙනස් වී පල්ලියකට, කෝවිලකට, හෝ වෙනයම් ආගමික ස්ථානයකට යනවා නියතය. එසේම කතෝලික අයෙක් සිත වෙනස් වී පන්සලකට, කෝවිලකට, හෝ වෙනයම් ආගමික ස්ථානයකට යනවා නියතය. එසේ යන්නේ තම උප්පැන්න සහතිකයේ ලියැවී ඇත් ආගම, ධර්මය තමන්ට නිවැරදි සේ නොපෙනෙන නිසා හෝ තම ආගම ධර්මය තම නුවනින් විමසා බලා වෙනස් කර ගන්නටය. ඒ අනුව සැරි සරන්නටය.

එලෙස යම් දවසක ඔබේ සිත වෙනස්ව වෙනත් ආගමික සිද්ධස්ථානයකට ඇතුල් වෙද්දීම ඒ ආගමික ස්ථානයේ පූජකවරයා ඔබ දැන් සිටින ආගමට එසේත් නැතිනම් උප්පැන්නයේ ලියැවී ඇති ඔබේ දෙමාපියන් අදහන ආගමට පහර ගසමින් කතා කරන්නේ නම්, ඔබ එතැනින් එවිටම ආපසු හැරී සිත වෙනස් කර ගන්නේ නොවේද?

මට සිදුවූයේ මෙවැන්නක් නොව අනෙකක්ය. අද මහ සිකුරාදාය. ඇය අද පල්ලි යා යුතුය. සතියකට වරක් කෙලෙස හෝ එම යුතුකම ඉටු කිරීමේ නියැලෙන්නේ කවුරුන් හෝ ආගම ධර්මය අදහන්නේ නිවැරදිව ජීවත් වන්නට මිසක කාටවත් කරදරයක් කරන්නට නොවන නිසාය. අද සවස තුන නිදහස්ව තබා ගත්තේ එකී යුතුකම ඉටු කරන්නට මිසක උප්පැන්නයේ ලියැවී ඇති ධර්මය (“ඒහි පස්සකෝ“ ලෙස ඇවිත් නුවනින් විමසා බලන්න කියු ධර්මය) වෙනස් කිරීමට නොවේය. තම ආගමික කටයුතු කරගන්නට ඉඩ හැර මා පැත්තකට වන්නේ කාටවත් කරදරයක් නොවන්නටය. එසේම එකී ආගමේ ඇති කරුණු අසා සිටින්නටය. එහෙත් අද ගේට්ටුවෙන් ඇතුලු වෙද්දීම ඇසුනේ අනෙකක්ය.

“අපේ ආගම අනෙක් ආගම් වගේ නෙවේ.. අපේ ආගමේ දුක ගැන කියවෙන්නේ නැහැ. දුක දුක ගැන කිය කිය ලතවෙන්න කියන්නෙ නැහැ. පවුල් ජීවිත වලට දුක ගැනම කතා කරල වැඩක් නැහැ. දුකට හේතුව හොයන්න කියල අපේ ආගමේ කියන්නෙ නැහැ... “

උප්පැන්නයේ ලියැවි ඇති ආගම ධර්මය වෙනස් කර ගන්නට අද කිසිවෙකු හෝ පල්ලියට ගියේ නම් ආපසු හැරී ගෙදර එනු නියතය. මන්ද විවේචනයන් මඟින් සිතක් ඇඳ බැඳ තබා ගන්නට නොහැකි නිසාය. බුද්ධ ධර්මයේ දුකට හේතුව සෙවූ බැව් නම් සැබෑය. එය හය වසරට පැමිණි ඕනෑම සිසුවෙකු දන්නා කරුණක්ය. එහෙත් එහි ඊටත් එහාට ගිය ගැඹුරු ධර්මයක් ඇත්තේය. එය මෙතැන ලිවීම තේරුමක් නොමැති නිසාම පටිච්ච සමුප්පාදයෙන් දුකෙහි හට ගැනීම සහ එය නිරුද්ධ කිරීමේ ආකාරය පෙන්වා දෙන විකිපීඩියා සබැඳිය මෙතනින්. 

මා හට අවැසි වූයේ පියතුමා පවා දන්නා, හය වසරේ දරුවන් පවා දන්නා දුක ගැන කියන්නට නොවේය. සියළු බුද්ධ ධර්මයේම කියවෙන්නේ අනිත්‍යය යැයි කියනවා පුද්ගලයන්ට උත්තර බදින්නටය. සංසාර ගමන කෙටි කර ගැනීමට, නිවන අවබෝධ කර ගැනීමට දුක නැති කරගන්නා ආකාරය, තෘෂ්ණාව ප්‍රහීන කරන ආකාරය බෞද්ධ දර්ශනයේ කියවෙන්නේය. ඒ පමණින් සියළු අන්තර්ගතය රිනාත්මක නොවන බව කිව යුතුය. ගිහි ජිවතයට අදාලව බුදුන් ධර්මය වදාලෝය. ඒකී ධර්මයන දේශනා කළේ දුක ගැන කියමින් ගෙදරට වී තැවෙන්නට නොව, ගිහි ජීවිතයේ දියුණුව සලසා ගන්නටය. ගිහි පුද්ගලයාගේ දියුණුවට බාධා කරන කාරණා එකින් එක් දක්වමින් සිගාලෝවාද සූත්‍රය දේශනා කළේද දුක ගැන සිතමින් කල් මැරීමට නොව පුද්ගල ජීවිත සැපවත් කරන්නටය. දියුණු කරන්නටය. සුරාවෙන් දියුණුවට බාධා ඇති වන්නේ කුමන ආකාරයෙන්ද, අලස කමින්, දූ කෙලියෙන්, පාප මිත්‍ර සේවනයෙන් ආදියෙන් ගිහි දිවිය සැපවත් නොවන්නේ කුමන ආකාරයන්ද ආදිය දේශනා කළේ දුක ගැන සිතා ලත වන්නට නොවන බව පැහැදිලි කර ගත යුතුය. සිගාලෝවාද සූත්‍රය ගැන එකින් එක කරුණ්‍ර විග්‍රහ කළ යුතු නැති නිසා ඒ ගැන ලිපියක් මෙතැනින්.

ඉපදීම හෙවත් ජාතිය, සිටම මරණය දක්වාම ගත කරන්නාවූ ජීවිතයේ අවසානය දුකක් බවත් එය නැති කිරීමේ එකම මාර්ගය ආර්ය අෂ්ඨාංගික මාර්ගය බවත්. ඒ සඳහා පටිච්ච සමුප්පාද ධර්මය අනුගමනය කර නිවන් ලබා ගත හැකි බවත්, එයින් ජාතිය හෙවත් නැවත ඉපදීම නැතිවන බැව් කී පමණින් ධර්මයේ සම්පූර්ණ අන්තර්ගතය දුක බව කියමින් විවේචනය කිරීම සාධාරණ නොවන්නේය. ගිහි ජීවිතයට, ලෞකික ජීවිතයට, දියුණුවට, සාර්ථකත්වයට දේශනා කළ ධර්මය පැත්තකින් තබා විවේචන කරන්නේ නම් එය බුද්ධියේ ගැටළුවක් හෝ කරුණු හරි හැටි නොදැන අසාර්ථක තර්ක ඉදිරිපත් කිරීමක් වන්නේය. එය හරියට බැලුව හොත් Good Friday හොඳ සිකුරාදා නම්, ඇයි ජේසුතුමන්ව ඇණ ගැසූ දා හොඳ සිකුරාදාවක් වන්නේ යැයි ඇසුවා හා සමාන වන්නේය.

මෙය පල්ලියේ පියතුමාට පමණක් පොදු වූ කරුණක් නොවන්නේය. බුද්ධ දේශනාවේ කියූ ලෙසින් අන් ආගම් විවේචනයෙන් වලකින්න කී කරුණින් පිට ගොස් අනිත් ආගම් විවේචනය කරන්නාවූ සංඝයාටත් බලපාන්නේය. මුස්ලිම් පල්ලියේ පූජකයාටත්, කෝවිලේ පූජකයාටත් එකලෙසම මේ කරුණු බලපාන්නේය. ඔබ විවේචනය කරන්නේ යම් ආගමක්ද, එය ඔබ හරි හැටි දැන හෝ නොගෙන විවේචනය කරනවා විය හැකිය. එහෙත් ඉන් සිදුවන්නේ බැතිමතුන් ඔබ වෙත ඇදී ඒමක් නොව, ඔබ සමග සිටින බැතිමතුන් පවා ඔබෙන් ඉවත්ව යාමක්ය.

Written_by_sAm_ශ්‍රී_Perera_11:55pm_19/04/14

පලි - මේ ලිපිය ලියන්නට පෙර සියවරක් කල්පනා කළේ මේ ලිපිය කියවන්නේ සියළු ආගම්වල පුද්ගලයන් නිසාය. එහෙත් අවසන මෙය ලියපං කියා සිත කීවේ කිසිම පූජකයෙක්, කිසිම ආගමකට ගැරහීමක් නොකරන්නේ නම් ඒ තැන කොච්චර ලස්සනද කියා සිතුන නිසාය. ගේට්ටුවෙන් ඇතුලට යද්දීම ඇසුනු වචන කීපයෙන් සිත් තැවුලෙන් මා පැත්තකට වූවා මිසක කිසිම අමනාප කමක් මුහුණින් නොපෙන්නුවේ මා ධර්මය දන්නා බැවින්ය.

** 20 ඉරිදා බනිස් කන්න බුද්ධදාස ක්‍රීඩාංගණයට එන්න.... **