මහ ඇමතිගේ පළවෙනි ඩියුටිය.... - First Duty of Chief Minister !!!

සෑමා පොලිස් කතාවක් ලිව්වොත් බොලාට වහ කඳුරු වගේය. එක්කෝ ඕවා කතා කරල වැඩක් නැහැ බං. පොලිසිය බැලන්ස් කොරන්න උඹල දන්නැහැ බං වැනි කමෙන්ට් වලින් පෝස්ට් එක අහවර වෙන්නේය. එසේ ගිය පොලිස් කතා කිහිපයක් බ්ලොග් එකේ ඇත්තේය. 

පොලිස්කරුවෝද මනුෂ්‍යයෝ නම්... If Cops are Humans !!

පොලිස්කරුවෙකු කැන්දාගෙන යාම... - Going Away With a Policeman

ලිංගික අප්‍රාණික පොලිස් මස් වැද්දා.... - The Police Butcher !!!

මේ සියල්ල ගේමෙන් ලියපුවා නිසා කස්ටිය කියවනකොට අවුල්  යන්නේය. ඒ නිසාම මේ ලියැවෙන්නේ පොලිස් ආතල් කතාවක්ය. සෑමා ඉන්නේ කැළණිය පොලිසියට අයිති බල ප්‍රෙද්ශයේය. එහෙත් මැතිවරණ කොට්ඨාශය නම් බියගමය. එය කෙසේ ගැලපෙන්නේ දැයි නොදන්නෙමි. නමුත් ඕන කුණු ගොඩකට අපේ ඒරියල් එකට බහින්නේ ඔය කියන පොලිසියෙන්ය. ඒ වගේම අපි ඕනෙම කුණු ගොඩක් ගෙනිහින් ඔබන්නේ ඔය ස්ථානයටමය.

කලින් සිටි ස්ථානාධිපතිගේ තරම දන්නේ අපේ පැත්තේ උන්මය. ඔහු සිටියේ ගේමෙන්මය. හැබැයි ඔහු කරනා දෑ ඇසූ විට හිනා යන්නේ බරපතල විදිහට නීතිය අතට ගෙන සිටි නිසාය. එක අතකට එය හොඳය. අපේ හන්දියේ බියර් ෂොප් එකෙන් බියර් රැගෙන එතැනම සිට කටේ හලා ගන්නා උන් අඩු වූයේ එතුමාගේ ක්‍රියා කලාපයන් නිසාය. එසේම පොලිසියේ අනිත් සේවකයන් පවා ලොක්කාට බය නිසා වැඩිය වැඩ දැම්මේ නැතිය. පසුව කුමන හෝ අටමගුලක් වී ලොක්කාව ස්ථාන මාරුවක් දී යැව්වේය. ඒ යන්නට පෙර කිරිබත්ගොඩ පැත්තේ මැර ඩයල් එකක් සමඟ ගෝරියක් ගොස් ලොක්කා කෑවේ යැයි කතාවක්ද තිබෙන්නේය. මැර ඩයල් එකට පස්සේ හොඳ සම්බුවක් ලැබෙන්නට ඇතත්, ලොක්කා ප්‍රසිද්ධියේ පාරේදී කාපු සීන් එක නම් කුජීතය. ඉස්සර රෑ 9 පසු වී විට පාරේ ගමන් කරන උන් පවා මොබයිල් එකේ දමාගෙන පොලිසියට රැගෙන යන්නේය. ඉන්පසු ප්‍රශ්න කොට ගෙදර එවන්නේය. කරුමෙට හෝ වැඩ ඇරී ප්‍රමාදවී එන එකෙක් සෙට් වුනොත් ඌටත් බඩුය. මොකද කිසිම ප්‍රශ්නයක් අහන්නේ නැතුව ජීප් එකේ දමාගෙන යන නිසාය.

ඒ ආතල් එකම මෑතකදී නන්දේට සැට් වෙන්නට ගියේය. නන්දේ, කවුදැයි අමුතුවෙන් කිව යුතු නැතිය. අපේ නිවස අවට සැරිසරන නිදහසේ ආතල් එකේ සොට් එකක් දමාගෙන ජීවත් වෙන නන්දේ කාටවත් කරදරයක් නැතිය. එහෙත් පොලිසිය රෑ ජාමේ එන්නේ විවෘත මනසකින් නොවේය. දකින හැම එකාම වැරදිකාරයෙක් යන මතයේ සිට එන ඔවුන් අහුවෙන හැම එකාම කුදලාගෙන යාමේ සම්ප්‍රදායේ සිටින්නෝය. නන්දේව වරක් දුටු විට මතක හිටිනා නිසා එය ඔහුට පාඩුවක්ය. ඒ නදීක ගුරුගේ වගේ රැවුල වවාගෙන සිටින නිසාය. දිනක් හන්දියේ බියර් ටින් එක වටා වටවෙන පිරිස අස්සේ නන්දේ සිට ඇත්තේය. හදිසියේ පොලිසිය පැමිණීමෙන් පිරිසක් කුදලාගෙන ජීප් එකට දමා ගනිද්දී නන්දේ ඒ මැද්දෙන් පැන වත්තකට රිංගාගෙන ඇත්තේය. ඒ වත්ත තිබෙන්නේ අපේ නිවස ඉදිරිපිටය. තමා ඉනේ තිබූ පිහියක්ද කැළේ වට්ටාගෙන නන්දේ පහුවදා උදේ වෙන තුරු වත්තේ සැඟව සිට එළිබැස්සේය. එදා සිට නන්දේ පොලිසියට බ්ලැක් ලිස්ට්ය. “අර රැවුලා තමා අපි හොයන්නේ...“ ලෙස පොලිසිය කියන්නට පටන් ගත්තේ එදා සිටය. නන්දේ දවල්ට හන්දියේ වල බහිනා අතර රෑ ජාමයේ අපේ ගෙවල් පැත්තට එන්නේ පෙලෝසියෙන් බේරෙන්නටය.

එසේ සිටිනා දවසක නන්දේ සමඟ කයියක් ගසන්නට සැට් වී ඇත්තේ අපේ සැලුන් එක කරන සුරේකයාය. නන්දේට බියර් එකක් ගැස්සවීමට සිතා සුරේකයා නන්දේට වචනය දමා ඇත්තේය. නන්දේ එපාම කියද්දී සුරේකයා බියර් ටින් එකක් රැගෙන විත් ඇත්තේය. ටින් එක කඩා සිගරැට් එකක් ඉවර කරන්නට මත්තෙන් පොලිස් ජීප් එක නවත්වා ඇත්තේ නන්දේ සහ සුරේකයා ඉන්නා තැනමය. නන්දේට බියර් සොට් එකක් ගසනවා තියා එහි ගඳ සුවඳ බලන්නටවත් ඉඩක් ලැබී නැත්තේය. වැඩිදුර නොසිතු නන්දේ අනිත් පැත්ත හැරී දිව ගොස් ඇත්තේ අපේ වත්තටය. සුරේකයා මාට්ටු වී තිබුණේය.

“කෝ ගන්නවා තමුසෙගෙ අයිඩින්ටිය...“

කියා පොලිසිය හැඳුනුම්පත ඉල්ලද්දී සුරේකයා අනිත් පැත්තට දුවා ඇත්තේ තමන් නැවතී සිටින සැලුන් එකේ උඩ තට්ටුවටය. රැවුලා දිව ගිය නිසාත්, සුරේකයා අයිඩින්ටිය ඉල්ලූ විට දිව ගිය නිසාත් කෝප වූ පොලිස් ජනතාව සුරේකයා පස්සේ උගෙ කාමරයට දිව ඇත්තේය. ඉන්පසු අස්සක තිබූ අයිඩින්ටිය ඇද පෙන්වා ඇත්තේය.

“තමුසෙ මොකද ඕයි දිව්වේ ??“

“අයිඩින්ටිය ගන්න සර් දුවලා ආවේ..“

“තමුසෙ මාර මිනිහෙක්නෙ ඕයි.. කියල එන්න එපෑ.. මම හිතුව තමුසෙත් දිව්වා කියල.. කෝ බලන්න.. තමුසෙ ගංජ නේද දුවගෙන ඇවිත් හැංඟුවේ...“

කෝපයට පත් පොලිස් ජනයා සුරේකයාගේ කාමරය සෝදිසි කර ඇත්තේ වෙනත් චෝදනාවක් යටතේය. එසේ කාමරය අවුස්සා දැමූ පොලිසිය සුරේකයාව ජීප් එකට නග්ගාගෙන ගොස් හන්දියෙන් බස්සවා ගෙදර එවා තිබුණේය. සුරේකයා කීවේ නම් පොලිස් සැට් එකත් බීලා සිටි බවක්ය. උන් ටිකක් බිව්වාම අපි බයිට් කියාය.

පසුවදා සිද්ධිය කියා සිටියේ නන්දේය.

“අම්මට හුඩු පොලිස් කාරයෝ දෙන්නෙක් බැස්ස ජීප් එකෙන් මට කර ගන්න දෙයක් නැහැ. මම ගිහින් පිටි පස්සේ තියෙන ඇඳේ ඇලවුණා.“

“යකෝ ඒ පැත්තට ආව නම් මාට්ටු වෙනව නේ..“

“නැහැ නැහැ මහත්තයා මම ගිහින් ඇඳ උඩ තිබ්බ මෙට්ට දෙකෙන් එකක් ඇඟ උඩින් දාගෙන හිටියෙ ලොවෙත් හොයන්න බැහැ.“

“ඉතිං ඇඳ යටට රිංගුව නම් ඉවර නේ..“

“මොන රිංගනවද හදිස්සියට, අනික බඩ උඩ තිබ්බ මෙට්ටෙ මම හුස්ම ගන්න වේගෙට උඩ පහළ යනවා. ආව නම් බඩු බනිස්ම තමා...“

“දැන් ඉතිං රැවුල කපල දාන්න තියෙන්නෙ. නැත්තං අල්ලගෙන යයි..“

“නැහැ.. වැඩේ ගොඩ. මම කෙලින් අජිත් මහත්තය ලව්වා මහ ඇමතිට කියල තියෙන්නෙ. මට ඕන වෙලාවක පොලිසියට යන්න එන්න පුලුවන් කිව්වා..“

“අඩේ මහ ඇමති පත් වෙලත් නැහැ නේද??“

“ඒක තමා කියන්නෙ. මහ ඇමති වැඩ භාර අරන් කරන පලවෙනි රාජකාරිය මේක..“


Written_bY_sAm_ශ්‍රී_Perera_7:10am_04/04/14