පන්සල් ගොස් වන්දනා කරන්නේ කෙසේද?

උප්පැන්නයට අනුව ඔබගේ ආගම බෞද්ධ නම් ඔබ යන්නේ පන්සලටය. කතෝලික නම් යන්නේ පල්ලියටය. මුස්ලිම් නම් මුස්ලිම් පල්ලියටය. හින්දු නම් කෝවිලටය. උප්පැන්නයට අනුව අදහන ආගම ධර්මය තීරණය වී දෙවියන්, බුදුන් දැක ආගම අදහන්නේ ඒ ඒ තැන් වලට ගොස්ය. සෑමා බෞද්ධ නිසා පන්සලටද, කිටියා කතෝලික නිසා පල්ලියටද යන්නෝය. දෙදෙනාම යන්නේ එකටය. වෙසක් දවසේද මුලින්ම පල්ලියේ පූජාවට ගියේ හවසය. ඒ එන ගමන් ගියේ පන්සලටය. මඟ දිගට දන්සැලක් දෙකක් වදිමින් පන්සල් ගියේ ආගමික වතාවත් කරන්නටය. වටේ ඉන්නා උන්ට කරදරයක් නැතිනම්, කොයි දේවාලේ ගියත් අවුලක් නැතිය. එහෙත් පන්සලේ හාමුදුරුවෝද, පල්ලියේ පූජකයාද, කෝවිලේ පූසාරිද, බලන්නේ තමන්ගේ ගොඩ වැඩි කර ගැනීමටය. ධර්මයෙහි, ආගමෙහි පිහිටවන්නට නොවේය. ඒ ගැන පල්ලි කතාවක් සෑමා ලියුවේ වෙඩිම අස්සේය. 

මිශ්‍ර විවාහ පිළිබඳ ගැටළුව බොහෝ විට එළි බහින්නේ පල්ලියෙන්ය. එම ලිපිය කියවූ බොහොමයක් ප්‍රශ්න ඇත්තෝ සෑමා ඇමතුවේ තමන්ගේ මිශ්‍ර විවාහ ගැටළු වලට පිළිතුරු ලබා ගන්නටය. විටක සෑමාගේ බ්ලොග කියවන කතෝලික රසිකාවියක් සෑමා සමඟ විවාදයකට පවා පැටලුනේ පල්ලියකින් එවැනි බලපෑමක් කිසි දිනක එල්ල විය නොහැකි බව කියමින්ය. නමුත් එම ලිපිය කියවා බෞද්ධ සහ කතෝලික ලෙස මිශ්‍ර පෙම් සබඳතා පවත්වන බොහෝ දෙනෙක් සෑමාගෙන් විස්තර ඇසුවේය. සෑමා ඒවාට පිළිතුරු දුන්නේ හද පිරි සතුටින්ය. සෑම ආගමකම, ධර්මයකම (විකෘති නොවූ) කියා දෙන්නේ නිවැරදිව ජීවත් වන ආකාරය නිසාවෙන් ආගමක් යනු ආදරයකට ප්‍රශ්න නොවේය. අනෙක් ආගම් ගැන කතාන්දර පසෙක තැබූ විට සෑමාට කතා කිරීමට අයිතිය ඇත්තේ බෞද්ධාගම ගැනය. පන්සල් යෑම ගැනය. මන්ද මේ වෙසක් සතිය නිසාය.

කිටියා සහ ඇගේ අක්කා සෑමා සමඟ වෙසක් දා පන්සල් ගමනට ආ නිසා සැමාගේ පන්සල් වන්දනාව බලා සිටි බව තේරුණේ නිවසට ආ පසුය. උන් ඇසුවේ මොකක්ද බොල ඒ වැදිල්ල කියාය. වැඩි වේලාවක් ගත නොවීය. වෙසක් නිසා පන්සලේ තදබදයක්ය. ඒ අස්සේ ධාතුන් වහන්සේලා වන්දනා කරන පිරිස්ය. ගෙදරින් කඩාගෙන ගිය මල් බෝධිය, චෛත්‍යය, සහ බුදු පිළිම වහන්සේට පිළිවෙලින් පූජා කොට සෑමා සිතින් මල් පූජා කරන ගාථා කීවේය. පහන් පත්තු කරනා ගමන් පහන් පූජා කරන ගාථාද සිතින් කීවේය. සුවඳ දුම් පූජා කරන ගාථා සිතින් කීවේ හඳුන් කූරු පත්තු කරමින්ය. පැන් කළ රැගෙන බෝධි මළුව වටේ පැදකුනු කරන අතර බෝධි වන්දනා ගාථාද, ඉතිපිසෝ ගාථාවද සිතින් කීවේය. ඉන්පසුව ධාතුන් වහන්සේද වන්දනා කොට සෑමා ගෙදර ආවේය. උක්ත ගාථා බෝධින් වහන්සේ දෙස බලා ශබ්ධ නගා ගායනා නොකියවීමෙන්ද, දණ ගසාගෙන කල් නොමැරීමෙන්ද, අපේ උන්ගේ සිත් අවුල් වී තිබුණේය. ඉනපසු කල්පනා කළ සෑමාට සිහිවූයේ ඇත්තටම තමන් කළ දේ වැරදිද කියාය. ඇත්තටම පන්සල් ගොස් වන්දනා කළ යුත්තේ කෙසේද කියා සංවාදයක් ඇතිකොට පිළිතුරු සොයා ගත යුතු බව සෑමාට සිතුනේය. 

එදා පන්සල් මළුවේ සිටි සමහර උදවිය බෝධි පූජාවල නියැලමින් සිටියෝය. එවිට කළ යුතු වතාවත් අපි සැවොම දන්නා කරුණුය. පන්සල් ගොස් වන්දනා කිරීමද හැමෝම දන්නා කරුණක් විය හැකිය. එහෙත් බෝධිය දෙස බලාගෙන බොහෝ වෙලා වන්දනා කරන ඇත්තෝද සිටින්නෝය. බුදු පිළිම දෙස බලාගෙන බොහෝ වෙලා සිටින ඇත්තෝද සිටින්නෝය. විටක ඔවුන් ගාථා කියා සිත් නිවෙනා තුරු නිදහස් සිතින් බලා සිටිනවා විය හැකිය. සමහරු තමන්ගේ සිතෙහි ඇති දුක කියනවා විය හැකිය. එලෙසම සමහරු ගාථා කිව්වාට කියන්නේ ගිරා පෝතයක් ලෙසය. පාලි පාඨයන්ගෙන් සමන්විත නිසා තේරුමක් නොදැන විය හැකිය. ඒ නිසා සෑමාගේ ඉල්ලීම මේ ලිපිය අවසන තමන් පන්සලකට ගොස් වන්දනා කරන ආකාරය, කමෙන්ට් එකක් ලෙස ලියා තබන ලෙසය. එවිට එය අපිට සංවාදයකට ලක් කළ හැකිය.

මෑතකදී සෑමාගේ අක්කාගේ දියණිය යන පෙර පාසලේ දරුවන්ට පුහුණුවක් ලෙස සීල ව්‍යාපාරයක් පවත්වා ඇත්තේය. සෑම පෙරපාසල් දරුවෙක්ම පාහේ බොහොමයක් ගාථා දන්නෝය. බුදුන් වදින ගාථාවේ සිට පන්සල් ගොස් වදින බොහොමයක් ගාථාද, දෙමාපියන් වදිනා ගාථාද දන්නෝය. එහෙත් එක් එක් ගාථාව කියන්නේ කුමන අවස්ථාවටදැයි වෙන් කර ගන්නේ තරමක් වැඩිහිටියන් වෙන විටය. මන්ද පුංචි උන් කියන්නේ කට පාඩමින්ය. සිංදු කියනා ආකාරයෙන්ය. එදා සීල ව්‍යාපාරය හැසිරවූ ස්වාමීන් වහන්සේ පුංචි උන්ගෙන් අසා ඇත්තේ මල් පූජා කරන ගාථාව කුමක්ද කියාය. එවිට අත ඉහළට ඔසවා නැගිට සිටි පුංචි එකියක් පිළිතුරු දීමේ අවස්ථාව ලබාගෙන ඇත්තේය. පසුව ඇය තාලයට “රෝස මලේ නටුවෙ කටූ..“ ගීතය කියා ඇත්තේය. පැමිණ සිටි කිසිවෙක් ඇයව උපහාසයට නොගෙන පැහැදිලි කර ඇත්තේ මල් පූජා කරන ගාථාව “පූජේමි බුද්ධං කුසුමේනනේන..“ කියාය. 

සවි ජා නො භවං හෝතී
සවි ජා නො පරා භවෝ
ධම්ම කාමෝ භවං හෝති
ධම්ම දෙස්සී පරා භවෝ ......!

දියුණු වෙන කෙනා හඳුනා ගැනීමට ලෙහෙසි
පිරිහෙන කෙනා හඳුනා ගැනීමට ලෙහෙසි
දියුණු වෙන කෙනා ධර්මයට කැමති
පිරිහෙන කෙනා ධර්මයට ද්වේශ කෙරති...

එලෙසම පන්සල් ගොස් ඔබ කටයුතු කරනා ආකාරය ගැන කමෙන්ට් එකක් තබනා ලෙස ඉල්ලා සිටින්නේ කරනා දේ නිවැරදිව අර්ථවත්ව සිදු කරවීමේ අවශ්‍යතාවය නිසාය.

Written_by_sAm_ශ්‍රී_Perera_9:45pm_05/05/15

ආමිසයෙන් ප්‍රතිපත්තියට දොර ඇරේ...

කොහෙ නම් කූඩු හදන්නද? බටයක් කපා ගන්නට තැනක් තියෙනවද? ඕවාට වෙලාවක් තියෙනවාද? වෙසක් කූඩු ගැන කතා වෙන විට මේ දිනවල වැඩියෙන් ඇසෙන නිදහසට කාරණා බොහෝය. සියල්ල යාන්ත්‍රීකරණය වූ වර්ථමානයක, සියල්ල මුදලට විකිණෙන වර්ථමානයක, තමන් අතින් නිමවෙන වෙසක් නිර්මාණයක් දැක සතුටු වන්නේ බොහෝ අල්පයක් දෙනාය. වෙසක් සතියක ගෙදර පිරිසක් එකමුතුව, කූඩු බැඳ, සව් කොළ අලවා, එල්ලා හැඩ බැලුවේ ඉස්සරය. දැන් සව් කොළ ඇලවූ අට පට්ටමේ සිට, සැකිල්ල පමණක් ඇති අටපට්ටම දක්වාම කූඩු රැගෙන එන්නේ කඩයෙන්ය. සව් කොළ ඇලවූ කූඩුවක් රැගෙන ඒමෙන් වැඩේ ඉතා පහසු වන්නේ කූඩුව එල්ලා ලයිට් දැමීමේ කාර්යය පමණක් නිවැසියාට ඉතිරි වෙන නිසාය.

ඊයේ සෑමාගේ ගෙදර ආ මිතුරෙකු කියා සිටියේ තමන් කඩෙන් කූඩු දෙකක් ගත් බවක්ය. සැකිල්ල පමණක් ඇති කූඩු දෙකක් රැගෙන මිතුරා ගෙදර ගොස් ඇත්තේ සව් කොළත් රැගෙනය. කූඩුව සම්පූර්ණව සුදු සව්කොළ අලවා නිල් පැහැති රැලි දැමීම මිතුරාගේ අදහස වී තිබුණේය. කූඩු දෙක මේසයක් මත තබා සව්කොළද පසෙකින් තබා මිතුරා සිය පවුල අමතා කූඩුව අලවන ලෙස ඉල්ලා සිට ඇත්තේය. මොහොතකින් ඔහු අතට ලැබී ඇත්තේ පාප්ප ස්වල්පයක් සෑදු වලදක්ය. එතැන් පටන් මිතුරාට කූඩුව අලවන්නට සිදු වී ඇත්තේ තනිවමය. කතාව අවසනට මිතුරා කීවේ “අනේ මන්දා මචං, ඔහොම එකක් දන්නවා නම් මම අලවපු කූඩුවක්ම ගෙදර අරන් යනවා“ කියාය.

වෙසක් කූඩු, වෙසක් තොරණ් ආදිය ඇතුලත් වන්නේ ආමිස පූජාවටය. දන්සැල්, සීල ව්‍යාපාර ආදී කටයුතු අයත් වන්නේ ප්‍රතිපත්ති පූජාවටය. බුද්ධ දේශනාව නම් වැඩිපුරම නියැලිය යුත්තේ ප්‍රතිපත්ති පූජාවේ බවය. ආමිසය නොකළ යුතු කටයුත්තක් නොවූවත්, ආමිසය තරමක් දුරට කළ යුතුය. එලෙසම ආමිසය වැඩිපුර දකින්නට හැක්කේ වෙසක්, පොසොන් පෝය වලදීය. මන්ද ඒ සමයේ වෙසක් කලාප ආදියෙහි දර්ශණය වන්නේ කූඩු සහ තොරණ් නිසාය. ගෙදරකට කූඩුවක් හදන්නට නොලැබීම ගැන කණගාටුවනවාට වඩා සිතිය යුතු කරුණක් බුද්ධ දේශනාවේ සඳහන්ව ඇත්තේය. එනම් ආමිසය බැරි නම් ප්‍රතිපත්ති පූජාවට හෝ එක් විය යුතු බවය. යහපත්ව සිතිය හැක්කේ එවිටය. මේ පාරත් අපේ ගෙදර කූඩුවක් නැතැයි කියා මිලට ගත් කූඩුවක් ගෙනත් එල්ලුවාට කම් නැත. විටක ඒ ඔබ කාර්යය බහුල නිසා විය හැකිය. නමුත් පෝය දින ලැබෙන නිදහසින් කොටසක් වැය කොට පන්සලකට ගොස් හෝ නිවසේ සිට හෝ ධර්ම කරුණු පිළිබඳ කියවීම, ඇසීම කළ හැකි නම් ඔබට එල්ලන්නට බැරි වූ කූඩුවේ වටිනාකම සම්පූර්ණයෙන් ප්‍රතිපත්ති පූජාව හරහා ජනිත වන්නේය. තමන්ට ආමිසයෙන් කර ගත නොහැකි වූ දේ ප්‍රතිපත්තිය හරහා කර ගැනීමට වෙර දැරීම අගනේය.

හැමදාකම මිනිසුන් මනින්නේ කූඩුවේ තරමය. තොරණේ උසය. බල්බ් දැල්වෙන ආකාරයය. විටක ඇස් බොඳකර තොරණ දිහා බලන්නේ බල්බ් වල ලස්සන බලන්නටය. එහෙත් තොරණේ ජාතකය අසන උන් නැතිය. තොරණේ ජාතකය දන්නා උන් නැතිය. ඒ මදිවාට තොරණ අයිතිකරුවන් කරන්නේ ජාතකයට වඩා ආධාරකරුවන්ගේ නම් කියන එකය. කවියෙන් උන්ට පින් දෙන එකය. තොරණක කතාව සම්පූර්ණයෙන් අසන්නට බැරි නම් කළ යුත්තේ ජාතකයේ නම බලා, පිළිවෙලින් රූප රාමු බලා කතාව අවබෝධ කරගැනීමට උත්සාහ කිරීමය. තොරණක ප්‍රධාන අරමුණ ධර්ම දානයක්ය. කිසියම් දහම් කරුණක් ජනතාවට ලබා දීමය. විටක තොරණක් දුටු සැනින් එයද වෙසක් කූඩුවක් මෙන්ම ආමිස පූජාවක් ලෙස, ආලෝක පූජාවක් ලෙස සිතෙන අවස්ථා එමටය. එහෙත් එය හුදෙක් ධර්ම දානයක් නිසාම ප්‍රතිපත්ති පූජාවට ඇතුලත් විය යුතුය.

මේ කියන්නට හදන්නේ ආමිසය අත හැරිය යුතු බවක් නොවේය. බුද්ධ ධර්මයේ ප්‍රතිපත්ති පූජාව අවධාරණය කොට ප්‍රමුඛත්වය දී ඇති බැවින් ම ආමිස පූජාවට තැනක් ඇත්තේම නැතැයි නූතන සමහර බෞද්ධයන් පන්සලට නොයන, බෝධිය නොවඳින, මල් පහන් පූජා නොකරන තත්වයට පත්වා ඒවා හෙළා දැකීම අභාග්‍යයක්ය. අර්ථවත් ආමිස පූජාව ප්‍රතිපත්ති පූජාවට මුල් වන බව ඉතිහාසය සාක්ෂි දරන්නේය. බෞද්ධ උත්සව මෙරට ආරම්භ වූයේ මිහිදු හිමි වැඩම කළ දා සිටය. බුදු දහම හඳුනාගත් මිනිසුන් ආමිස පූජා වල නිරත වන්නට වූවෝය. එය ක්‍රි.පූ 3 සියවසේ අශෝක යුගයේ සිට ආරම්භ වූවක්ය. බුදුදහම සිත් තුළට කාවැද්දීම සඳහා නොයෙක් ආකාරයේ සංකල්ප ක්‍රියාත්මක වූ තැන එහි මුල් තැන ගත්තේ උත්සවයි. එනම් ආමිසයයි.


ආමිසයට මිනිසුන් ගරහන තත්වයට පත්වී ඇත්තේ මල් පහන් පූජාව බුද්ධ පූජාව වැනි උතුම් ආමිස පූජා තරගකාරී වාණිජ සංකල්ප වලින් අන්ධ භක්තිය සිදු කරන බහුතරයේ ක්‍රියා පටිපාටිය නිසාය. සිද්ධස්ථාන අපිරිසුදු කෙරෙන තෙල් කුණු පුරවන ලෝකයට ප්‍රදර්ශනය කිරීමට ඇතැමුන් කරන ප්‍රදර්ශනය ආමිස පූජා නිසා ආමිස පූජාව ප්‍රතිඵල රහිත යැයි සැලකීම අප්‍රබුද්ධ චින්තනයේ විපාකයයි.

අර්ථවත් ව කරන ආමිස පූජාව ප්‍රතිපත්ති පූජාවට දොර ඇර දේ. ශ්‍රද්ධාව පාදක වන්නේ ප්‍රඥාව බව නොදැනීමෙන් ආමිස පූජාව කොන් කිරීම නිවැරැදි ක්‍රියාවක් නොවේ. ආමිස පූජාව අර්ථවත්ව සිදු කළ හොත් මහත්ඵල මහානිසංස දායක ය.

“ශ්‍රද්ධාවෙන් පිරී ගිය හදින් ආමිස පූජාවක් කිරීමෙන් පිබිදෙන්නේ ප්‍රතිපත්ති පූජා මනසයි.”

එසේ නම් අප කළ යුත්තේ ප්‍රතිපත්ති පූජාවට මඟ විවර කර ගැනීමය. කෙලින්ම දාන, ශීල, භාවනා ආදියට යොමු වීමට මැලි වන බෞද්ධයන්ට ආමිස පූජාවට වඩ වඩාත් නැඹුරු වීමෙන් ප්‍රතිපත්ති  පූජාවට ආරම්භයක් ලබා ගත හැකි බව සිතට ගත යුතුය. නැති නම් ඔවුන් හැමදාම කරන්නේ මල්, පහන් පූජාවේ සිට, පන්සල් යෑම දක්වාද බැන වදිමින්, තමන් නිවසේ සිට ධාර්මිකව කටයුතු කරනවා කියා එලොවටත්, මෙලොවටත් වැඩ නැති අන්ධ භක්තිකයන් වීමය.

බලමුද මේ පාරත් වෙසක් ??

සෑමා බ්ලොග පටන් ගත්තේ 2011 සැප්තැම්බර් මාසයේය. හරියටම දාහත් වෙනිදාය. එදා පටන් ගත් බොග 2012 වසරේ දී මැයි මාසයේ වෙසක් කලාපයක් කරන්නට තරම් සරු සාර වූයේය. එම වසරේ වෙසක් සතියක් නිමිති කරගෙන ලිපි කිහිපයක් ලියූ සෑමා 2013 වසරේද වෙසක් කලාපයක් කළේය. එතැන් නොනවතී 2014 වසරේදී වෙසක් කලාපයක් ලියන්නට තරම් වාසනාවක් නොලද නිසා විලි ලැජ්ජාව වසා ගන්නට ගැලවිජ්ජා පෝස්ටුවක් දැම්මේය. එය සතියක් පුරාවට වෙසක් කලාපයක් සඳහා ලියුවක් නොවේය. එය හුදෙක් එකම එක පෝස්ට් එකක්ය. එසේම එම සෑම වසරකම පොසොන් පෝස්ට් සැට් එකක් බ්ලොග් ලොවට දායාද කළේය. 

එක දිගට ලිවීම යනු බ්ලොගක ජීව ගුණය රඳා පවතින සාධකයක් යැයි කීවේ සෑමාමය. එලෙස පොර ටෝක් දුන් සෑමාට ගිය වසරේ අග භාගයේ සිට නොනැවතී ලියන්නට වාසනාව නොලැබුණේය. ලියන්නැතිව මඟ හරිනා උන්ට ලොරි ටෝක් දුන් සෑමාට රිටන් එක ලැබුනේ එලෙසය. බුකියේ උන් ඇසුවේ ඇයි බං දැන් ලියන්නෙ නැත්තේ කියාය. එහෙන් මෙහෙන් දාන ඒවා කික් නැතැයිද කීවෝය. එලෙසම කැත හිත් ඇත්තෝ කැත හිත් සඳහා ලියනා කවිද ඉල්ලුවෝය. ඉල්ලීම් තිබුණද සෑමා අසරණව බලා සිටියේය. ලියන්නට දේවල් තිබියදී රසය මතුකොට මුදා හරින්නට සෑමා වරම් නොලද්දේය. 2014 වසරේ වෙසක් උත්සවයට ගැලවිජ්ජා පෝස්ටුවක් දැම්මද දෙසැම්බර් මාසයේ බ්ලොගක කිසිදා නොලියැවුණු වෙඩින් පෝස්ට් ටිකක් දැම්මේය. හරියටම වෙඩින් දවසේ ඔටෝ පබ්ලිෂ් වන ලෙස එම ලිපි සැට් එක සකස් කර සෑමා තනිකඩ දිවිය පල්ලියක් ඉදිරිපිටදී, පෝරුවක් මතදී උකසට තැබුවේය. සියළු කටයුතු මැද බ්ලොගද අතරමග අමතක වූයේය. විටෙක බ්ලොග් ලිපි ලෙස ලියවිය යුතු කතන්දර වාක්‍ය කිහිපයකින් බුකියේ ටයිම් ලයින් එකේ මුදා හලේය.

කොටින්ම කිවතොත් ගොනා කැරකෙන්නේ පොල් පැලය කන්නටය. සෑමාද වටින් ගොඩින් එන්නේ නැවත නොනැවතී ලියනවා කියන්නටය. මීට පෙර වරක්ද නොනැවතී  ලියනවා කියා කෙලවා ගත්තේය. මෙවර එසේ නොවන්නට වෙසක් කලාපය ආරම්භ කරමින් ලිවීම පටන් ගන්නට සූදානම් වන්නේය. බ්ලොග ආරම්භයේ සිට දැමූ වෙසක් පෝස්ට් සියල්ල මෙතැන අමුණන්නේ කියවන්නටය. කියවා ගුණ දොස් වයන්නටය.


2012 - වෙසක් කලාපය

කොයි යන්නෙද සොරකම් කරලා
කූඩුව අපි අරන් ආව පැටව් එක්කම
කැත හිත්වලට ලස්සන කවි පොඩ්ඩක්
නෑයෝ සහ මීයෝ හදුනාගන්න
නිමා නොවන නිමාවක්... 

2013 - වෙසක් කලාපය

බක්කෝ නැති - තොරණ් නැති - වෙසක් බලන්න එන්න...
දානයට වැට "නො"බැදීම
කුණු හබ්බ සීමා කිරීම
අනිත් උන් ගැනත් හිතන්න
බැලන්ස් කරන හැටි

2014 - වෙසක් කලාපය

අද නම් ඇරලා.. - Its Open Today !!


Written_by_sAm_ශ්‍රී_Perera_1:33pm_01/05/15 

පැක් කිරීම උගත්තෙමි... - Learned How to Pack !!

පැක් කිරිල්ල සියළු සත්වයෝ උපතින්ම ගෙන එන ලද්දක්ය. ගන්ධබ්බ අවධියේ සිටින සත්වෙයෝ උපතක් බලාපොරොත්තු වන්නෝය. මරණයෙන් මතුවන චුති සිතට අනුව ප්‍රතිසන්ධි සිත පහළ වන්නේ ක්ෂණිකවය. නැවත උපතක් විශ්වාස කරන බෞද්ධයන්ට අනුව චුති සිත සහ ප්‍රතිසන්ධි සිත අතර ඉඩක් නැත්තේය. සියල්ල අවසන ප්‍රථම වරට නිවැරදිව පැක් වීම හෙවත් මව් කුස පිළිසිඳ ගැනීම සිද්ධ වන්නේය. සත්ව වර්ගයාගේ පැක්වීමේ ආරම්භය පටන් ගන්නේ නොදැනුවත්වය. තමන්ට කැමති තැනක කැමති ලෙස පැක් වීමට වරම් නොලැබෙන්නේය. ඉන්පසුව බිළිඳා දකින්නේ මනාවට පැක්වූ පෝටබල් ප්‍රථම ආහාරයය. ඒ නම් මව් කිරිය. එහි පැක් වීම අති සාර්ථකය. තාක්ෂණයට අනුව තවමත් එතරම් සූක්ෂම පැක් කිරිල්ලක් ලොවෙත් නැතිය. ක්‍රමයෙන් හැදී වැඩෙන සත්වයා පැක් කිරීම ගැන ප්‍රවීණයෝ වන්නේ, දක්ෂයෝ වන්නේ ඉනික්බිති සමාජයෙන් ලැබෙන ආභාෂයන් මතය. මෙලෝ හසරක් නොදන්නා සතුන්ට පවා සහජයෙන් ලැබී ඇත් පැක් කිරීම අති විශ්මිතය. ඒ අනුව කැන්ගරුවා තම පැටියා පොකැට් එකේ පැක් කිරීම ඉතා වටිනා උදාහරණයක්ය.

Melbourne Cricket Ground හි පැක් කිරිල්ල

පාසල් සමයේ දකින පැක් කිරීම බොහෝය. ඒවා පසු කළෙක පැක් කිරීම ඉගෙන ගැනීමට අවශ්‍ය කරන ආභාෂයන්ය. පාසල් ගෙනියන බෑග් එක පැක් කළේ අම්මාය. ඒ පුංචි කාලයේය. පසු කළෙක එය කරන්නේ ශිෂ්‍යා අතින්ය. එවිට අනවශ්‍ය පොත් අතැර අවශ්‍ය පොත් පමණක් පැක් වන්නේය. බෙහෝ විට විෂයන් දෙකකට එක පොතක් සෑහෙන්නේය. එක විෂයකට අදාල සටහන් පොතේ මුල් පිටු වේ සිට ලියැවෙන අතර. අනෙක් විෂයේ සටහන් පොතේ අග පිටුවේ සිට ලියැවෙන්නේය. කිසිම දිනයක එම සටහන් එකිනෙකට මුණ ගැසෙන්නේ කලාතුරකින්ය. විටක වසරක් ගියත් මුණ නොගැසෙන්නේ එතරම් සාර්ථකව සටහන් ලියා ගන්නා නිසාය. බෙහෝ විට ඉහල පන්ති වලදී බෑග් එක පැක් වෙද්දී බරපතල් අච්චු පොත් අතහැරෙන්නේය. ඒ බර වැඩි නිසාය. පසු කලෙක ඒ ලෙවල් කරද්දී ඉංග්‍රිසි පොත හැමදාම ගෙදරය. මන්ද ඒ ලෙවල් සමයේ බෑග් භාවිතයෙන් තොර වෙන නිසාය. එවිට පැක් කිරීම් නැත්තේය. මොට්ටසෝරි සමයේදී අම්මා කෑම පෙට්ටිය පැක් කළ හැටි අමතක එකෙක් නොසිටිය හැකිය. බනිසක්, පාන් කැබැල්ලක් පුංචි කෑම පෙට්ටියට දමා කෙසෙල් ගෙඩියක් ඔබන්නට ඉඩ නොමැති වූ කලෙක කෙසල් ගෙඩිය පෙති ගසා හෝ කෑම පෙට්ටියට ඔබන්නේ පැක් කිරීමේ තෙරටම ආ අම්මාය. ඒ කාලේ සිඟිත්තාට වඩා අම්මා පැක් කිරිල්ල දන්නේය. කෙසේ හෝ කුමක් හෝ දරුවාගේ බඩට පැක්කර එබීම ඇයගේ ඒකායන බලාපොරොත්තුවය. කෙසෙල් ගෙඩිය කෑලි කපා දැමූ විට කන එක නම් සෑමාට අප්පිරියය.

පාසල් සමයේ හොදම පැක් කිරිල්ල දුටුවේ 235  බස් රථයේදීය. වරාගොඩ මාර්ගයේ දිවෙන තනි දොරේ භාගේ බස් වල පැක් කිරිල්ල දන්නා කොන්දොස්තර අයියලා තරම් වැඩ්ඩෝ ලොවෙත් නැතිය. කැළණිය හන්දියේදී ෆුල් පැක් වෙන තුරු බස් එක පැය භාගයක් හෝ නවත්වාගෙන සිටින කාරුණික ඔව්හු වරාගොඩ පාරේ සියළු ජනතාව තොරණ හන්දියට රැගෙන යාමට තරම් කාරුණිකය. ඒ සඳහා භාවිත කරන්නේද තනි දොරේ හුචක්කු බස්ය. ෆුල් පැක්ව ගමන් අරඹන බස්රථය දොර පැත්තට ඇල වෙන්නේය. ඇතුලේ සිටින ජනතාවගේ ජැක් නිසා රථය නොවැටී තිබෙන්නේය. සියළු කාන්තාවන්ට ප්‍රතිවිරුද්ධ බල යොදා බසය නොවැටෙන්නට තබා ගන්නේ ඇතුලේ සිටිනා භෞතික විද්‍යාව දන්නා පුරුෂ පක්ෂයය. ඒ අතර ආරම්භක විද්‍යාව දන්නා අප වැනි ශිෂ්‍ය යෝය. විටක ජීව විද්‍යාව දන්නා වැඩිහිටියෝ පරිණත ඩයල්ය. උන් භෞතික විද්‍යා වෙන් සමතුලිතය ලබාගෙන ජීව විද්‍යාව කරාම නැගී යන්නෝය. කිසිදාක කිසිම කලබැගෑනියක් අප දැක නැත්තේය. ඒ බස් නැති පාරක හොදින් පැක්ව කෙසේ හෝ වැඩට යාමේ අවශ්‍යතාවය නිසාය. එවැන් පැක් කිරිල්ලක් මම නම් මෑතක් වෙන තුරු නොදැක්කේය. මෑතක දුටු හොඳ පැක් කිරිල්ල කතාව අවසානයේ ලියවෙනවාය.

සියල්ල අතර වාරයේ පැක් කිරිල්ලේ ඉතා අසාර්ථක ඩෑල්ද සෑමා දැක ඇත්තේය. ඊට හොඳ උදාහරණය දැක්කේ ගෙවල් පැත්තේ සිටින ඉස්සෝ වඩේ අයියාගෙන්ය. පොරගේ කෑම නම් රසය. නමුත් පැක් කිරිල්ල අන්තිමය. ඉස්සෝ වඩේ පහක් ගතහොත් කාඩ්බෝඩ් ප්ලේට් මත එක එක තබා ප්ලේට් පහක් මත වඩේ තැබෙන්නේය. ඒ සියල්ල එක මත එක තබා එක ෂොපින් බෑග් එකකට දැමිය හැකිය. නමුත් ඔහු කරන්නේ මහා අපරාධයක්ය. ඔහු ප්ලේට් පහම බෑග් පහක දමන්නේය. පැක් කිරිල්ල නොදත් තැන පාරිසරික හානිය කොපමණ වන්නේද කියා එතැනින්ම සෑමාට තේරුණේය. තමන්ට එක බෑග් එකක් ඇති කියා සියල්ල එක මල්ලක ඔබා ගත් සෑමා වඩේ ඩෑල් එකට ඇඩ්වයිස් දෙන්නට ගියේ නැතිය. මන්ද තෙල් තාච්චියක පහස ලැබීමට ඇති අකැමැත්ත නිසාය. නමුත් තව දෙතුන් වරක් ගොස් එම රංගනයම කළහොත් ඩෑල් එක වෙනස් වෙනවා ෂුවර්ය. ෂොපින් බෑග් පහක හයක පැක් කිරිල්ලක් කරන තවත් තැනක් ලෙස සුපර් මාකට් හැඳින්විය හැකිය. කෑම ජාති එක බෑග් එකකද, එළවලු තවත් බෑග් එකකද, ගෙදරට ගන්නා අනෙක් බඩුමුට්ටුද ආදි ලෙස උන් පැක් කරන්නේ බෑග් පහ හයකය. විටක එම පැක් කිරිල්ල සාධාරණය. ඒත් එතරම් ෂොපින් බෑග් තොගයක් ගෙදර එකතු කර තබා ගැනීම තරම් අසහනයක් සෑමාට නැත්තේය. බෙහෝ විට ලැබෙන ෂොපින් බෑග් අඩු කර ගැනීමට සෑමා පෙළබෙන්නේය. පොලේ ගියොත් බෑග් එකක් රැගෙන යාමේ පුරුද්දක් තිබුණත් මෑතකදී පොලේ නොගිය නිසා එය මඟ හැරුණේය. කෙසේ හෝ පැක් කිරිල්ලේ අසාර්ථක බව කිසියම් පාඩුවට මුල පුරණ බව කිව යුතුය.

ස්කූල් වෑන් එකේ යන කාලේ වෑන් අංකල් කරපු පැක් කිරිල්ල සුපිරිම පැක් කිරිල්ලක්ය. අපි සීට් වල ඉඳ ගත්තාට පසු පුංචි ඇච්චං කෙල්ලෝ කොල්ලෝ සීට් අස්සටද ඔබන්නේය. උන් ව ඉඳගෙන සිටිනා අප ඉඳිරියෙන් හිටවා තැබුවේය. එහෙත් කිලෝමීටරයක් දෙකක් යද්දී උන් අපේ ඔඩොක්කුවේ ඉඳගෙනය. ඒ තරම් අසාධාරණ පැක් කිරිල්ලක් සෑමා දැක නැත්තේය. 

ලොවෙත් නැති පැක් කිරිල්ලක් දකින්නට සෑමාට මෙතුවක් කල් බලා ඉන්නට සිදු වූයේය. සියළු ලංකාවාසීන්ට එවැනි පැක් කිරිල්ලක් දකින්නට හැකි වූයේ මේ වසරේය. එනම් පසුගිය 18වෙනිදා නුගේගොඩදීය. විමලේ ඒ පැක් කිරිල්ල ගැන පුරාජේරු ගසද්දී, මරා වාදීන් විසිල් ගසන්නට වූවෝය. සිරාවාදීන් කොටු ගසා, රවුම් ඇඳ, ඩොට් තබා ඡායාරූප මත සිටින ජනතාව ගණින්නට වූවෝය. කෙසේ හෝ සියල්ල අවසන විමලේ කිව්වේ ලක්ෂ 5ක් සිටියා කියාය. මරාවාදී සැට් එකද කියන්නේ ඒ ටිකමය. එතරම් පුංචි ඉඩක ලක්ෂ පහක් බැස්සුවා කියන්නේ සෑමා මෙතුවක් දුටු හොදම පැක් කිරිල්ල එයය. විශාල ක්‍රිකට් පිටියක් වන Melbourne Cricket Ground (MCG) හි පැක් කළ හැකි ප්‍රේක්ෂක ප්‍රමාණය ලක්ෂයක් වෙද්දී ආනන්ද සමරකෝන් පීඨයේ ලක්ෂ පහක් බස්සන්නට තරම් ලංකාවේ පැක් කිරිල්ල අති සාර්ථක වූයේය. එය එසේ නොවුනා නම් පුදුමය. ලංකාවේ ගමනා ගමනයේ පැක් වෙන සෙනඟ ප්‍රමාණය දකිනා ශ්‍රී ලාංකිකයන්ට විමලේ එතැන ලක්ෂ පහක් පැක් කළා නම් එය මැජික් නොවන්නේය. මන්ද විමලේගේ කට තරම් කටක් ලොවෙත් නැති නිසාය. සෙනඟ කිසිවෙක් නොමැති වුවත් විමලේ උගුර කඩාගෙන ලක්ෂ පහක සෙනඟක් ගැන පුරාජේරු ගසන්නට තරම් ඩෑල් එකක්ය. 

කෙසේ හෝ යහපාලනය පත්වා ගැනීමට නම් මෙතරම් ජනතාවක් රැඳවිය හැකි ස්ථානයක් ජනතාව වෙනුවෙන් භාවිත කළ යුතුය. ක්‍රිකට් උණුසුම ඉතා උග්‍රවු මේ සමයේම ලක්ෂ පහක ජනතාවක් රැදවිය හැකි මෙවැනි නගරබද ස්ථානයක ලොව විශාලම ක්‍රිකට් පිටිය නිර්මාණය කිරීමට බලධාරීන් කටයුතු නොකරන්නේ කුමන විදෙස් බලපෑමක් නිසාදැයි අප සොයා බැලිය යුතුය.

Written_by_sAm_ශ්‍රී_Perera_7:12am_23/02/15

කලිසම සහ සිතියම් අධ්‍යයනය... - Box Short & Geographical Studies !!

උණ යනු ලෙඩක්ය. ඒ බොහෝ අයගේ මතයය. එහෙත් සැබෑවට උණ යනු රෝග ලක්ෂණයක්ය. ඒ කාලේ ඇයි උඹට උණද කියා අසන්නේ ගහන්නට බලාගෙනය. උගේ උණ මම හොඳ කරන්නම් කියා කියන්නේ එනිසාය. උණට ලඟින්ම යන ඊලඟ ලෙඩ දෙක නම් කැස්ස සහ හෙම්බිරිස්සාවය. හෙම්බා ගහනවා කියන්නේ සෙම්ප්‍රතිශ්‍යාව හැදුනාමය. හෙම්බා දරුණු වුණාම පීනසය. පීනසයද පොඩි ලෙඩක් නොව එහිද ප්‍රභේද දෙකක් ඇති බව සෑමා දැන ගත්තේ ගල් පීනසය හැදුනාමය. හෙම්බා හැදෙන්නේ නැතුව, සෙම ගල් වී ඔලුව රිදෙන ආකාරයේ ලෙඩක් හැදී සෑමා සිංහල වෙදෙක් සරණ පැතුවේය. ඒ මීට බෙහෝ කළකට ඉහතදීය. එදා වෙදා කිව්වේ බොට තියෙන්නේ ගල් පීනසය කියාය. වල් පීනසය හැදුනාම හෙම්බා දිගටම ගලන්නේය. අවසන නාසයෙන් ලේද ගලන්නේය. කෙසේ හෝ වෙදා එදා සෑමාට ගල් පීනසය හොද වන්නට, ගල් වූ සෙම දිය වන්නට නාසයට උරන්නට කුඩක් දුන්නේය. එය නාසයෙන් ඇද්ද පසු කිවිසුම් පනහක් පමණ ගොස් හෙම්බා සැදී නහය බුරුල් වන්නේය. එවිට ඔලුවේ ඇති සෙම ටිකක් ගලා යන්නේය. එය කොතරම් සෞඛ්‍ය සම්පන්න ක්‍රමයක්ද නොදන්නේය. කෙසේ හෝ තාවකාලික සුවයක් ගන්නට තව මොනවාද ගුලි වගයක්ද දුන්නේය.

සෑමාගේ උණ තාමත් හොඳ නැතිය. එය සුව නොවන උණක් බව හැම එකාම කියන්නෝය. එසේම ගල් සීන් එකද එසේමය. කපනා ඒවා නොව, ගල් වූ සෙම සීන් එකය. විටක ඔලුව ඇතුලේ කැටයක් හෙලවෙනවා වගේ දැනෙන්නේ එක්කෝ මොලයේ ඇණ ගැලවිලාය. නැතිනම් සෙම කැටයක් ලෙස සෑමා සිතන්නේය. තත්වය එසේ තිබියදී මීට දින කිහිපයකට පෙර සෑමාට සෙම හැදුනේය. එය නම් සුපිරිම සෙමක්ය. නාසය උඩට ඇද්ද විට නාසය දිගේ ගොස දිව උඩට වැටෙන සෙම ගුලිය මනරම්ය. ගල් වූ සෙම ඇති සෑමාට නාසයෙන් ගලන හොට්ට තරම් සනීපයක් නොවන්නේය. එසේ දිවට වැටෙන සෙම ගුලිය රෝල් කර ගිල දමා නැවත නාස් කුහරයෙන් උඩට ඇද සෙම ගත හැකිය. ඒ අතරම යන කිවිසුම් වලින් පලාතක්ම ස්ප්‍රේ වන්නේය. මෙය බලා සිටිය නොහැකි තැන කිටියා සෑමාට තර්ජනය කලේ ලේන්සුවක් භාවිත කරන ලෙසය. ලේන්සුවක් හැම තැනකම සෙවූ සෑමාට අතට අහුවූයේ පැත්ත තිබූ ගල් ෂෝටක්ය. පාසල් යන කාලයේ වත් එක දිගට මාසයක් ලේන්සුවක් භාවිත නොකළ සෑමාට ගල් ෂෝට තනි මැකුවේය. ඒ දින කිහිපයක් පුරාවට හොටු හූරන්නටය. එක දිගට දහපාරකට වඩා හූරන හොටු වේලෙන්නට පෙර නැවතත් පිපිදෙන්නේය. විටක අල්ලන්නවත් තැනක් නැත්තේය. කෙසේ හෝ කලිසම ටකරමක් ලෙස වේලී යන්නේ පිසදමන ලද හොටු වල ඝනකම නිසාය.

සෙම, හොටු, කැහි කරදර නිමක් නැති අතර බෝතලයක් කැඩෙන්නේ ඔය අතරය. පස් හයදෙනකු සැට් වී ගෙවල් පැත්තේම සැට් වූයේ සෙම කර කුට්ටං කර ගැනීමේ පරම චේතනාවෙන්ය. බොහෝ උන් කියන්නේ කැස්සට, සෙමට බේත ගල් කියාය. පොඩ්ඩක් ගැහුවොත් ඔක්කොම වේලිලා යනවා යැයි කියන්නේ කට වචනයට විය හැකිය. එක්කෝ බීම සාධාරණීකරනය කර ගැනීමට විය හැකිය. එහි සත්‍ය අසත්‍ය කෙසේ වුවත් තෙල්, කොලෙස්ට්‍රෝල් ඇත්තවුන්ට නම් දොස්තර අවවාදය ඉද හිට හෝ තෙල් කැපෙන්න ඇල්කොහොල් ටිකක් ගන්න කියාය. අපේ උන් එවිට උපන් දා සිට තෙල් කැපෙන්න අඩියක් දෙකක් ගසා බෝතලයක්ම හිස් කරන්නෝය. ගල් නැති තැන, තිබූ වැට් එකෙන් ගසා සෑමා ගෙදර ආවේ වතුර ටිකක් ඇඟට හලාගෙන, ඇඳට වැටෙන්නටය. ඇඟපත සෝදාගෙන අතට අසු වූ ඩෙනිම් ෂෝටක් ගසාගෙන සෑමා ඇඳට වැටුනේය. ඒ අතර කිටියා පැමිණ සෑමාට වද දෙන්නට වූයේය.

“බීලා බීලා ඇවිත් තඩි ෂෝටකුත් ගහගෙන... අර බොක්ස් ෂෝට ඇඳ ගන්නකෝ.. ඕක ඇදන් මේ රස්නේ නිදාගන්න පුලුවන්ද..?“

“පිස්සුද.... කලිසම් ඔක්කොම වැලේ.. ඔක්කොම හෝදලා දාල තියෙන්නේ...“

“විකරද?? ඔක්කොම වේලිලා.. ඇතුලට ගත්තා.. ඉන්නව මම අරන් එන්න...“

“ආ.. මේක ඇඳ ගන්නවා..“ මොහොතකින් කිටියා බොක්ස් ෂෝටක් රැගෙන විත් දුන්නේය. සෑමා ඇඳන් හිටි ෂෝට නිදියහනේ වැතිරීගෙනම මාරු කළේ හොඳ සිහියෙන්ය.

පසුදා අවදි වූ සෑමාට තම ෂෝටේ අමුත්තක් දැනෙන්නට වූයේය. තැන් තැන් වලින් තරමක් ඝනකම් බවක් දැනුනේය. එවිට ෂෝටේ රෑ සිහිනෙන් සිතියම් ඇඳී ඇත්දැයි අතගා බැලූවේය. එහෙත් සිතියම් මෙතරම් ඇදෙන්නට තරම් ස්ටොක් එකක් තිබිය නොහැකිය. තවත් මොහොතක් ගත වෙද්දී ෂෝටේ ඉදිරිපස පමණක් නොව පිටුපස පවා ටකරමක් වැනි ඝනකම් ගතියක් දැනෙන්නට වූ නිසාම ෂෝට ගලවා හොදින් සෝදිසි කිරීමට සෑමාට සිදු වූයේය.

සිදූ වී ඇත්තේ අනර්ථයක්ය. දින ගණනාවක් පුරා හොටු හීරු ෂෝට සෑමා ඇඳගෙන සිටින්නේය. තැන් තැන් වල සුදු, කහ පැල්ලම් තිබුනේ දවස් ගණනාවක මතක සටහන් ලෙස මිසක රෑ සිහිනෙන් ඇතිවූ සිතියම් නිසා නොවන බව පැහැදිලිය. සිදු වූ අවනඩුව කිටියාට කියා අවමන් විදිනවාට වැඩිය බ්ලොග් ගත කිරීම සුදුසු බැවින් මෙසේ ලියන්නට වූයේය.

Written_by_sAm_ශ්‍රී_Perera_17/02/2015

ලව් කරන දවසේ බූට් ගැන යමක්.. - About Boots, More than Love !!!

වසරක් පුරාවට එක එකාට ලව් කළ ඇත්තන්ට එක දවසක් වෙන්කර ඇත්තේය. ඒ තමන්ගේම හරි එකාට ලව් කරන්නටය. එහෙමවත් දිනයක් තිබීම නිසා දහයකට ලව් කරන එකාලාට එකීලාට හරි එකා හෝ එකී තෝරා ගැනීමට අවස්ථාව ලැබී ඇත්තේය. ඒ දවස නම් මාරය. ආදරය කරන්නට දිනයක් වෙන් කරගත්තවුන් එදාට තමන්ගේ හරි එකා සොයා ගොස් ලව් කරන්නෝය. එසේ ලව් කර දිනය නිමා කරන්නෝය. එදාට ඇපොයින්ට්මන්ට් දෙක තුන දාන එකීලා හෝ එකීලා පවා සිටිය හැකිය. ඒ එක එකාගේ දක්ෂතාවය මතය. නැතිනම් ආදරය ලැබීමේ ප්‍රමාණය වැඩි නිසාය. මෑත අතීතයේ සෑමා දුටු ආදර අන්දර බොහෝය. එවැනි ලව් නම් සම්මතයෙන් ඔබ්බටය. පොලොව දෙදරාගෙන අහස උසට විදිනා ලාවා දහරාවක් සේ ගිණි කඳු වලින් ඉහලට විදින්නේ ඒ ආදර කතාවන්ය.

තිස්ස නම් එකෙක් රනිල්ට ලව් කළේය. ඒ වසර දහයකට වඩා පැරණි ලව් එකක්ය. දුකේදී සැපේදී අනාථ වූ විවිධ අවස්ථාවන්හි තිස්ස සිටියේ රනිල් ලඟය. රනිල්ගේ මුවින් වැටෙනා කඳුලු බිංදුවක් පාසා පිසදමාලූයේ තිස්සය. එතරම් අසම්මත පෙමක් ලෝක ඉතිහාසයේ තිබුණා දැයි සැක සහිතය. ඒ අතර කාලයේ මහින්ද පෙමින් වෙලුනේ මෛත්‍රී සමඟය. එය වසර හතලිස් ගණනාවක් පුරාවට විහිදුනු එකක් බව පැහැදිලිය. විටක මෛත්‍රී මහින්දට වඩා පරිනත වූයේ ඔහු මහින්දට වඩා වසර කිහිපයකට කලින් ආදරය කරනා හැටි උගත් නිසා විය හැකිය. එහෙත් මහින්ද මෛත්‍රීට වඩා ඉදිරියෙන් සිටියේ ඔහු එකෙකුට ලව් නොකර කිහිප දෙනෙකුට ලව් කර උඩට ආ නිසාය. එහෙත් ඉහත කී ආදර කතන්දර දෙක අපිරිමිත සෙනෙහසින් යුක්ත වූවා මෙන්ම විටක කඳුළු කතන්දරද නොතිබුණා නොවේය.

සිනහා, කඳුළු මැද දිව ගිය ආදර කතන්දර අතර තුර රනිල් තිස්සට හොරා දිනක් මෛත්‍රීට ඉඟිපෑවේය. පාසල් සමයේ සියළු ප්‍රේමයන්ට මුල් වල ආධාර කරුවන් සිටියා සේම මේ ඉඟියට සහය දක්වන්නට මහා පිරිවරක් තිරයෙන් පිටුපස සිටියෝය. ඒ අතර කලින් ලව් කළ උන් සහ මහින්දගෙන් බූට් කෑ පිරිසක්ද සිටි බව සැබෑය. රනිල් ගේ ලවට ඒ බකප් එක ලැබෙද්දී මෛත්‍රී මහින්දට හොරා ඉඟි බිඟි කළේය. එහෙත් මහින්දට නොදැනෙන්නය. මහත් ඛේදනීය තත්වය නම් ඒ රහස් පෙමට අතරවාරයේදී මහින්ද සමඟ රනිල්ද කෝපි කෝප්පයක රස බැලීමට පවා රාත්‍රී කාලයේ සුහද හමුවීමක්ද තැබීමය. ප්‍රේමය කෙතරම් වේදනීය දැයි මහින්ද නොදත්තේ ඔහු අවංක ප්‍රේමයක් නොකල නිසාවෙන්ය. එකෙකුට ලව් කරනු වෙනුවට තම ප්‍රධාන ප්‍රේම කතන්දරය අතරතුර දහසකට පෙම් කර බූට් තබා සිටි මහින්ද මෛත්‍රි ප්‍රේමයෙන් බැට කෑවේය. ඊට ප්‍රධාන හේතුව වූයේ තමන් පෙරදී පෙම් කළ අතැර දැමූ, වෛරයෙන් නවතා දැමූ අනන්ත ප්‍රේම අන්දරයන්ය. 

විටක චන්ද්‍රිකාය. මහින්දට වඩා චන්ද්‍රිකා කාලයක් මහින්දට පෙම් කළේය. මහින්ද ඒ ප්‍රේමය නවතා දැමුයේ වෛරයෙන්ය. ෆොන්සේකා සමග වැඩුණු ප්‍රේමයේ දළු ඉතා සවිමත් වෘක්ෂයක් වෙද්දීම මහින්ද විසින් ඒ ගස කපා කුට්ටි කර ගාල් කරනු ලැබීය. රාජිත, චම්පික වැනි ප්‍රේම කතන්දරද ඒ අතර වූයේය. සියළු ප්‍රේමයන් අතැර මහින්ද විමල්, ඇස්බී, රත්තරං වැනි සල්ලාල ඇසුරට හුරුවද්දී ප්‍රේමයේ අපිරිමිත අගය ඔහු කෙරෙන් නික්මී ගියේය. එයම මෛත්‍රී ගේ පණ ගසා වැටෙන ප්‍රේමයට ආරම්භයක් වූයේය. රුකුලක් වූයේය. මේ සියල්ල සම්මතයෙන් ඔබ්බට ගිය අසම්මත ප්‍රේමයන් බව සැබෑය. එහෙත් සම්මතයෙන් තොර අසම්මතයේද ප්‍රේමය ගැන අනන්ත කවි ලියැවෙන්නේය. සිංදු ලියැවෙන්නේය. කතන්දර ලියැවෙන්නේය. ඒවා සම්මත ආදරයට වඩා රසවත්ය. සම්මත විරහවට වඩා රසවත්ය. මහින්දගේ ප්‍රේමය නිමා කළ මෛත්‍රී නව පෙමක් ඇරඹූයේ රනිල් සමඟය. එදා රනිල් බිව් කෝපි කෝප්පයේ අඩුව පිරෙව්වේ මෛත්‍රී ආප්ප කෑමෙන්ය.

සල්ලාල ආදරයෙන් පිවිතුරු ආදරයේ වටිනාකම මහින්ද තේරුම් ගත්තේ රනිල්ටද පිවිතුරු ආදරයේ වටිනා කම කියා දෙමින්ය. ඒ රනිල් තිස්ස නම් වූ ආදර කතාව බිඳ දමමින්ය. එකට තමා සමඟ සිටි තිස්ස රනිල්ට පස්ස හරවා මහින්ද පෙම සොයා ගියේය. රනිල් ප්‍රේමයේ පිවිතුරු බව වටහා ගත්තේද එදාය. එකී බිඳුනු ප්‍රේමයේ විරහව අමතක කරලන්නට තරම් සෙනෙහසක් මෛත්‍රී රනිල්ට ලබා දුන්නේ සිතු පැතූ සම්පත් මොහොතින් ලබා දෙමින්ය. එහෙත් තිස්සට මහින්ද වෙනුවෙන් උදා කළ හැකි වූයේ දුක පමණක්මය. පිවිතුරු වුණත් ඒ පෙම මහින්දට ශක්තියක් නොවූ වා සේම තිස්සට උන් හිටි තැන් අහිම කළ පෙමක ආරම්භය එය වූයේය. 

සියල්ල සම්මතයෙන් තොර අසම්මත ප්‍රේමයන්ය. එහෙත් සම්මතයේ කතන්දර වැඩිය ආදර බරය. සම්මතයේ විරහවන්ට වඩා විරහා බරය. සියල්ල මැද තේරුම් ගත යුතු උගත යුතු දේද බොහෝය. මෙලොව සදා කාලික ප්‍රේමයන්ද, සදාකාලික ආදරයන්ද නැති බවය. තමන්ට ලැබෙන ප්‍රේමය, ආදරය රැක ගැනීමට උත්සාහ කිරීම මිසක, තිබෙන ආදර කතා නවත්වා නව ආදර අන්දර ආරම්භ කිරීම මහත් පරිස්සමෙන් කළ යුතුය. විටක එය මහින්ද - තිස්සට වූවා වාගේ තිබෙනා තත්වයට වඩා භයානක විය හැකිය. නැතිනම් රනිල් - මෛත්‍රීට වුවා වාගේ තිබුණාට වඩා සුන්දර විය හැකිය.

දැන් ඔබ තීරණය කළ යුත්තේ තිබෙනා එක සශ්‍රීක කොටගෙන ශක්තිමත් කර ගන්නවාද? අලුත් එකකට යෑමේ අභියෝගයට මුහුණ දෙනවාද යන්න පමණක්ය.

Written_by_sAm_ශ්‍රී_Perera_7:12am_14/02/15